【 有卡通獨木舟坐的免費主題遊戲場 】 位於沙田的「 史諾比開心世界」，係以史諾比漫畫為主題的遊樂場，成個遊樂場範圍不大，但就有多個史諾比漫畫的場景可以俾我哋影相，有得玩又有打卡位，仲要係免費入場的，玩完就可以入番商場行街，好方便。   史諾比開心世界最受歡迎一定係獨木舟，小朋友可以坐著係上面順著水流慢慢前進，沿途可以欣賞到史諾比各種探險的可愛場景。小朋友需要自己坐一個位，家長可以坐後座，船上需扣上安全帶。 但因為係免費的，等候人數會好多，要有心理準備會等好耐，果日我哋一去到就叫爸爸去排隊，小朋友就邊玩邊等。   場內仲有「棒球主題遊戲場」，細心睇成個遊樂設施都有好可愛的棒球裝飾，仲有多款滑梯選擇，當中一條勁高的旋轉滑梯望落好似好高，但原來唔係好刺激的，小朋友瀡落嚟時唔會太快，哥哥玩完一次又一次，好開心。   講到父母們最鍾意的相信就係史諾比校車，因為入面係有勁涼的冷氣呀，上到去完全唔捨得落車。   史諾比開心世界開咗好多年，經歷過日曬雨淋，所以部分場景都比較舊，但因為角色們都好可愛，都值得去玩下架！ ～～～～～～～～～～～～～ ｛ 史諾比開心世界Snoopy's World ｝ 地點：新界沙田區新城市廣場購物中心一期3樓平台 開放時間：早上十一時至晚上七時 ————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com