上回講到我哋申請咗自行派位 (文章回顧) 【 小一入學大作戰 Round 1 ★ 自行分配學位 】 包包以首名子女及適齡入學(共十五分既情況下) 竟然於第一Round入到心儀學校 實在難得 親朋戚友都戥佢高興 所以都想同各位(準備出年為升讀小一大作戰)既家長分享下少少貼地式育兒心得 爲升小學作準備 其實每個小朋友都係一張白紙 透過校園生活 家庭日常相處以及家長為佢哋安排嘅課外活動 每天一點一滴地為白紙著色 他朝一日白紙都會變成一幅美麗嘅圖畫 以包包為例 佢專長係畫圖畫同做勞作 所以會多參加與視藝有關嘅比賽 (不論校內或校外) 除咗享受過程 當中亦都幸運地拎到唔少獎項及證書 不經不覺為升小作另類準備 而包包4歲開始就俾佢接觸跆拳道 除咗可以增強抵抗力 仲可以透過考晉級試 令佢以運動學會堅持 從而體會自己一天一天嘅進步 至於音樂方面 佢自己最鍾意係唱歌 但係都希望佢可以認識到唔同嘅樂器 所以都畀佢接觸過學琴同埋打鼓 希望慢慢你都會搵到一種自己鍾意嘅樂器 作為海豚式家長 都希望可以透過課外活動畀佢學習同人相處同埋訓練膽量 所以就選擇Drama 除左可以訓練記台詞及面對觀眾 仲可以好好感受一下團體精神以及一個演出係大夥兒嘅努力 所以誠意推薦小朋友學兒童話劇 除咗學術性嘅活動 我都希望可以透過義工活動培養小朋友嘅同理心以及可以回饋社會 所以就參加咗賣旗活動 透過"先生 可唔可以幫我買支旗呀?" 訓練一下勇於開口 邀請陌生人幫忙買旗 從而幫助他人及相關機構籌款 之前更認識到一個好有意義嘅活動 就係BB醫生 透過小朋友到訪老人院表演及派禮物 為長者帶來歡樂 但因為疫情關係活動 現暫停活動 期待有機會帶細佬b做BB醫生 以上就係包包小時候既育兒分享 至於我地所選既心儀學校 非常重視一體一藝 所以喺Round1遞交申請表格時連同活動證書及視藝獎狀遞上 可能因為校方同我地有共同育兒理念 所以喺Round1憑十五分 竟意外地獲得心儀學校嘅學位 所以每位家長衹要多花心機同時間 按小朋友嘅潛能而安排活動 陪伴小朋友成長 日常活動記得影多啲靚相及生活家庭照 以便爲日後升小學作準備 緣分到了 小朋友自然入讀最合適嘅學校 佛系家長叩門準備小分享 家長們記得先了解心儀學校既叩門方式 (需注意校方收唔收自薦信/Portfolio) 如收Portfolio 需按校方要求頁數規限 用心製作 視覺上需整潔 簡單介紹小朋友既個人資料 內頁透過日常生活相片突出性格及個人專長 增加面試機會 另外需了解學校理念 例如學術宗教或一體一藝等 盡量展現小朋友嘅優勢 獨特個性強項及潛能 如參加活動嘅證書或比賽得獎證書都可以放入portfolio 務求令校方在眾多叩門申請當中凸圍而出 從而感受得到家長有幾多時間同心機投放在小朋友身上 希望派位未如理想嘅家長同小朋友 可以順利攞到叩門入場券 叩門前需要準備嘅文件 先填妥小學後補學位申請表 幼兒證件近照 出生證明書副本 父母身份證副本 教育局小一註冊證/自行分配學位申請表/ 統一派位選校申請表副本 幼稚園高班評估或成績表副本 學術或者課外活動出席證書及比賽獎狀副本 至於推薦信方面 可以準備幼稚園校長推薦信及父母推薦信 另外亦都要準備回郵長信封及貼上足夠郵票 (記住寫上小朋友嘅姓名同地址) 如有宗教信仰嘅學校可以加埋小朋友領洗紙證副本或者所屬教會證明信 當收到面試通知嘅時候 家長們都要同小朋友一齊努力應戰 首先要用平常心面對 可以先同小朋友預告我哋將會去心儀學校同老師傾計玩遊戲 完成後可以準備啲小獎勵例如去公園玩 買玩具或者食雪糕 面試前一日需要充足嘅睡眠 保持身體健康 另外面試問題都有機會同日常生活有關 所以外出時 不妨多啲同小朋友分享生活常識及見聞 或模擬練習一些處境題 都會有助小朋友嘅腦筋急轉彎能力 切忌要小朋友死記機械式答案 家長亦都唔好心急代答 仲有要注意禮貌 提一提小朋友面試對答時眼睛要望住老師 唔好四圍望 保持微笑 等待面試時要有耐性 禮貌同耐性都係身教同教導小朋友而日積月累所得來的 注意儀容及服飾 穿著簡約整潔就可以了 避免穿著太隆重或浮誇既服飾 最緊要令小朋友著得舒服 女孩子紮好頭髮 記得剪指甲 保持整潔形象 另外面試除咗了解小朋友 仲會面試家長 所以家長都要喺面試時注意行為舉止 思想談討大方 需要清楚學校嘅辦學理念同家教是否一致 另外亦都要真正明白自己小朋友嘅性格優點缺點同愛好 爸爸媽媽小朋友都要加油呀 希望大家都入到心儀嘅小學啦  ★ 米高媽媽手作教室 ★ 【 小一入學大作戰 Round 1 ★ 自行分配學位 】 【十大熱門幼稚園面試】必答題 【變變變 ♥ 讓廢物變成獎項】 【傳統燈籠 ★ DIY】 【德國AVENIR KIDS送禮 ★ 創意藝術教材禮品包 】 【Gifthing送禮 ★ 寶寶手足印禮盒set 】   Like & Follow 包包陪細佬b看世界 facebook專頁   會有更多入學育兒資訊分享