【 刺激好玩的室內大型遊樂場｜EpicLand歷奇王國 】 Aidan早前約左幾個朋友仔一齊去愉景灣「EpicLand歷奇王國」玩，而家天氣咁熱， 係室內涼住冷氣玩就啱哂啦！   眼見星期日都幾多人，我哋人多，所以有預先預約，確保有得入場玩。去到填寫好資料，量體溫消毒雙手後就可以去玩喇！ 大家一入場就一枝箭衝去玩，媽媽們追都追唔切。   爸爸就先帶弟弟去幼兒專區玩，EpicLand入面設有一個For 三歲以下玩的區域，有哂軟墊，有短滑梯又有大型軟積木，啱晒弟弟搬上搬落慢慢玩。   EpicLand的遊戲設施好多元化，有刺激，有考驗體力，有動有靜，大人都可以一齊玩，我哋班媽媽都玩得勁開心呀！   Aidan哥哥好玩推介 : *彩虹滑梯 呢個三層樓高的彩虹滑梯，又長又刺激，真係超好玩呀！我地玩左勁多次呀！   *五層樓高玩樂區 呢個大型的綜合玩樂區入面有繩網、多個關卡、攀爬設施、多組款式的滑梯等等，超級多野玩，可以俾小朋友自己去探索，好似一個立體迷宮咁，仲有刺激感十足的垂直滑梯，就敢望都有d驚驚，我哋竟然無人敢挑戰。   *飛索 好考膽量的一個遊戲，Aidan第一次玩，玩完話好刺激，但又有d驚驚，點知之後越玩越開心，我哋玩完一次又一次，勁正！   *迷你高爾夫球場 小朋友們可以係場內唔同的賽道上玩Golf，訓練下手眼協調。   *彈床區 每節限4人玩，小朋友可以係上面盡情跳，盡情放電。   *攀石區 Aidan未敢玩，見到其他小朋友會由工作人員的協助下，帶好頭盔同裝備先開始接受挑戰。   場內仲有小食部，有提供三文治，魚蛋燒賣和飲品等的小食，方便大家坐低休息食下野，而且價錢仲唔貴呀！  呢個歴奇王國真心正！我哋玩足4個鐘，大人小朋友都盡興而歸，放哂電，已經約定下次要再去玩喇！   ======================= *  @EpicLand 歷奇王國 *  網址 : www.epiclandhk.com 地址：香港大嶼山愉景灣愉景北商場地下G31 開放時間 : 上午時段：上午9:30 – 下午1:30 下午時段：下午2:30 – 6:30 交通： 港鐵到欣澳地鐵站，出閘後轉搭DB03P巴士，直達北廣場。   其他交通方法： 中環3號碼頭坐船到愉景灣，轉乘 4 或 9 巴士去北廣場。 東涌港鐵站坐DB01R到愉景灣，轉乘4或9 巴士到北廣場。 機場坐DB02A 到愉景灣，轉乘4或9 巴士到北廣場。 ————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com