有冇嚟緊要申請入讀 K1 嘅小朋友家長呀？N班都未讀但又要準備報K1啲嘢喇 悠悠嚟緊都要考K1，所以我又再睇番幼稚園啲資料，幫大家整合咗部分。 大家諗好會報讀私立定教育局 #幼稚園教育計劃 下嘅 #幼稚園 未呢？私立顧名思義就係私人營運嘅幼稚園，後者則有 #政府大幅資助，多被稱為 #免費幼稚園 ，但其實又未至於免費，只係學費比私立少好多，有啲每個月俾百幾蚊學費就可以喇。 如果你仲心大心細，都最好申請定 #幼稚園入學註冊證，呢張證用嚟報讀「幼稚園教育計劃」下嘅幼稚園㗎，之前一心想唯b讀私校，但都有申請定，做媽媽要有兩手準備嘛 提提大家，下年9月讀 K1 嘅小朋友係要今年申請「幼稚園入學註冊證」㗎   申請幼稚園入學註冊證懶人包（by唯媽） 點先知心儀幼稚園有冇參加「幼稚園教育計劃」？ 想知你心儀幼稚園有冇參加呢個計劃，除咗打去學校問之外，上各大學校官網或者介紹學校嘅網上平台都會見到。亦可以參考政府資料：https://bit.ly/3dAdIX6 （呢個已經係最新，2020/21學年嘅資料）。   有入學註冊證先報名幼稚園？ 唔係唔係唔係呀。有啲幼稚園嘅報名時間，係早過申請入學註冊證嘅時間架，你要把握報名時間去報幼稚園，唔使等有註冊證先報名架。   申請時間： 一般而言，申請入學註冊證時段係9月至11月，但2022/23嘅確實時間仲未有，到時再提大家啦。   點先合資格申請？ 小朋友必須係香港居民，擁有香港居留權、入境權或不附帶任何逗留條件（逗留期限除外）嘅有效香港居留許可。而如果申請 2022/23 學年入讀幼稚園嘅小朋友就必須喺 2019 年 12 月 31 日或之前出生。   要交咩文件*： - 父/母身份證副本 - 幼稚園入學註冊證申請表 - 小朋友出世紙副本 - *如小朋友唔喺香港出世，交嘅文件就比較多，詳見https://bit.ly/3wcJYWz 的第16問。　　   點拎「入學註冊證」嘅申請表？ 可以喺各區民政事務處、郵政局或教育局區域教育服務處索取。最方便梗係去教育局網頁ttps://www.edb.gov.hk/k1-admission_tc 下載啦！   申請費用係幾多？ 全免。   點交申請表？有以下3個方法： a) 將表格+所需文件寄到 香港灣仔郵政局郵政信箱 23179 號；或 b) 將所有文件封好，在信封面寫明「申請幼稚園入學註冊證」，於教育局嘅辦公時間內投入香港灣仔皇后大道東 213 號胡忠大廈 14 樓的局收集箱內（辦公時間：星期一至星期五上午 8:30 至下午 1:00，下午 2:00 至 6:00，星期六、日及公眾假期休息）；或 c) 於網上遞交電子申請表格（網址：https://eform.one.gov.hk/form/edb005/tc/）。遞交電子申請表格後，申請人需於10個工作天內將已簽署嘅的「承諾及聲明」正本郵寄至教育局香港灣仔郵政局郵政信箱23179號。   幾時有證拎？ 教育局收齊資料後，一般需時6-8個星期處理申請同郵寄註冊證俾大家。   拎到證要點做？ 於「統一註冊日期」（今年嘅參考日期：2021年1月7至9日）去最心儀而又取錄咗你小朋友嘅幼稚園，提交「註冊證」同註冊費，完成註冊學位。而教育局為免一人多學位嘅情況出現，每一位小朋友只能將呢張證交俾一間心儀幼稚園作註冊用途，如果交完之後想轉校，要去嗰間幼稚園拎返張證，但註冊費就唔會退回喇。所以，最好就揀定先交啦。   如果你仲有有關申請幼稚園 / 入學註冊證嘅其他問題，歡迎去我哋個Facebook paget留言，我會以我所知同經驗同大家交流～或者，去教育局網站睇吓啦 https://www.edb.gov.hk/tc/edu-system-policy/kindergarten/index.html 。   預祝大家嘅小朋友考到心儀嘅幼稚園！   Like & follow us https://www.facebook.com/weplaynlearn/  https://www.instagram.com/kly.chu/