今個暑假仲唔係Staycation玩哂，餓咗咁耐...大家仲唔趁呢兩個月玩番夠本，但係都要識揀至得，要玩一定要開心又抵玩～最近The Luxe Manor 帝樂文娜公館就推出咗「小小夢想家」的住宿計劃，等大人細路都可以玩得開心又有意義！ 酒店就係一個社會的縮影，亦可以話酒店內發生的所有事，都跟我哋日常生活好有關係。今次到The Luxe Manor 帝樂文娜公館 入住「小小夢想家 Be a Dreamer」，可以俾哥哥同芊芊扮演酒店內唔同角色的職業體驗，學習吓點樣照顧自己～ 大家如果未睇過我之前介紹The Luxe Manor，可以睇番 https://kimfamilytravel.com/2019/11/the-luxe-manor.html 呢個住宿計劃超誇張，除咗可以免費自動升級至尊尚客房，客人仲可以提早於中午12時登記入住(Check-in)至翌日下午6時退房(Check-out)都得，真係好抵玩囉！就算到第朝都唔駛滾水淥腳咁趕住要走，仲可以佗佗佻佻食埋個Lunch行陣街先番酒店Check-out，好似一個價錢玩足兩日咁！ 計劃包括： 兒童迎賓長達30小時住宿體驗 (可提早於中午12時登記入住至翌日下午6時退房，視乎供應情況作確認） 免費升級至尊尚客房供最多兩位成人及兩位小童入住 每房每晚贈送港幣800元餐飲消費額於酒店餐廳FINDS及酒吧Dada Bar + Lounge使用 兒童迎賓禮物 免費使用健身室 客房內迷你酒吧及房內用餐菜單半價優惠（餐酒除外） FINDS及Dada Bar + Lounge餐飲七折優惠 (只適用於單點菜單) 免費使用「HAPE遊歷家兒童遊樂園」（開放時間: 上午10時至下午5時45分) 免費參加工作坊及各項親子活動 免費借閱精選繪本享受親子共讀時間 我哋一到步Check-in後，兩個就先收到兒童迎賓禮物，佢哋好鍾意個咭套，裡面仲有房咭，連小朋友都可以唔駛靠大人，可以自己Do入房~ 房裏面仲有個小帳幕，小朋友可以有自己的小天地，而且仲可以向酒店前台借取繪本，在房間內慢慢睇，唔係一定要睇電視㗎嘛～ 今個住宿體驗設有好多工作坊同埋活動，大家可以跟住以下活動日程，選擇邊日入住！我就揀咗星期五入住。 我哋由Check-in後就玩到夜晚，真係超興奮～ 我哋參加咗「小小管家」、「小小調酒師」、「親子瑜珈」、「小小實驗家」同埋「小小廚師」 地下Lobby就係「小小夢想家」的集合地點，我哋準備出發去做小管家lu~ 真係製作認真有埋制服，兩個對住咁大間房都唔知由邊度執起好？！ 大管家(職員導師)教哥哥同芊芊執房每個細節，就連咕????要用角打直咁擺都咁講究，等佢哋知道其實唔容易！ 之後仲要學埋打直舖床，摺大小毛巾，好呀好呀～大管家叫佢哋以後起身都要執床呀！ 講真今日好多小朋友都變哂做港孩，喺屋企好多嘢都由大人做，當然好多時都係父母太竉愛佢哋，又或者大部份係因為日日都太忙，搵得小朋友做不如自己做仲快～ 大管家教佢哋入枕頭袋，結果一個人都攪唔掂，最後兩個同心力將枕頭入好。 執完房距離下一個活動仲有少少時間，兩個怕蝕底的港孩，一聽到話B1層開咗個新地方「HAPE遊歷家兒童遊樂園」，就即衝落去玩～(最重要係免費) 今次係聯乘德國著名玩具品牌HAPE打造的兒童遊樂園，最適合俾小朋友放電，大人又可以趁機抖一抖的好地方。 兩個都已經咁大個，估唔到呢D 小玩具佢哋仲咁鍾意玩。 可能由細到大芊芊都跟住哥哥玩，所以一見到有玩具 廚房，可以玩煮飯仔，就走埋去煮個不停。 哥哥就對STEM遊戲最有興趣，兩個玩到唔捨得走！ 大家如果有陣時怕外面太熱，其實同小朋友留喺呢度玩，人少又唔駛同人逼，都真係幾舒服㗎！ 兩個Band友一齊合奏～ 呀芊坐落去就好似佢去咗小人國一樣 (滴汗...) 嚟到下一個活動啦！我哋上番去一樓的FINDS餐廳，有專業調酒師教佢哋兩個調番杯靚...大家放心，雖然個活動叫「調酒師」但係佢哋絕對唔係調酒，係一杯特色飲品。 芊芊好專心咁聽住講解，唔知佢一陣會調交出一杯咩俾我飲呢？ 原來調酒師都要用咁多工具，如果大人上一堂可能都要幾百蚊，依家入嚟住仲可以一齊上堂，乜都抵番哂！ 最有型的場面出現了～ 芊芊要Show Time啦～真係似模似樣，其實個盅超凍，佢堅持一直Shake，到導師話停佢就即刻放低卒手～哈哈哈 跟住倒番出嚟，再放番兩塊檸檬同薄荷葉，真係唔講都唔知原來係芊芊調出嚟的飲品。 大成功～梗係要同師傅影番張相，多謝佢啦～ 由於太好飲嘅關係，芊芊成杯自己飲哂，都有留少少俾我試味嘅！俾小朋友自己去完成一件事，真係令佢哋有好大成功感，同埋自己親手做的，自己特別喜歡！ 之後我哋捉住師傅，要佢再教我哋做多一杯特飲 今次我哋用士多啤梨做材料，用到另一工具去將佢壓碎。 再Shake過～～～～ 今次哥哥做得靚D喎！真係將有汽水同士多啤梨明顯分開兩層！ 又完成多一杯，兩個真係好似覺得自己已經好叻咁喎！ 呢個人話要試吓兩杯溝埋一齊飲睇咁咩味。 最後仲頒發埋證書，嘩！第日咪可以拎住呢張證書去搵Bartender工，哈哈哈～ 然後我哋番到Lobby大堂玩 Surreal Hunt 超現實遊蹤。(所有任務就在Check-in時派的「探索護照」內) 其中一個任務就係要小朋友自己加上創意，創作另一個蒙羅麗莎肖像。 芊～你好似整蠱佢多D喎！ 哥哥最近中咗「鬼滅」之毒，竟然將彌豆子Crossover蒙羅麗莎，服咗你！ 完成哂所有任務，兩個都得到小禮物一份～ 夜晚仲可以拎住800元餐飲消費額到FINDS食晚餐，就算過咗Limit都仲有七折優惠。 我就點咗個海鮮冷盤 呢個鮮蟹肉煎餅，真係好香，表面微脆，裏面啖啖蟹肉～ 小朋友食的兒童餐都一樣咁正，係由FINDS X Done by Deer 的兒童套餐 夜晚番到房繼續玩，在小帳幕裏面，有個投影小夜燈，上面有好多唔同的海洋生物，真係好夢幻呀～ 第一日嘅節目真係好豐富，希望佢哋兩個呢晚可以發個好夢～ 第朝起身，兩個竟然真係記得大管家講嘅嘢，真係執番好張床喎，我一廁所出嚟見到，即刻要影低呢個情境(因為我唔知仲會唔會有下次～) 之後我哋就先去參加第二日的第一個活動「親子瑜珈」，先嚟做下熱身運動！ 呢招忍者步走，佢哋兩個最拿手！ 好幾個Yoga動作都難唔到佢哋，我就做到喘哂氣。 然後第2 Part就精彩，跟住video一齊做，要原地跑、跳、蹲、趴同瞓底！ 連呀Sir都頂唔順呀！本來預備咗玩到Level 3，但芊芊主動要求，希望可以玩埋Level 4 & 5... 一早起身做完瑜珈運動，即刻特別開胃，我等唔切要即刻上去FINDS食早餐啦～ 餐廳環境真係好舒適，我哋一家都好鍾意呢度，芊芊仲話如果可以以後都住喺度就好！ 食飽抖足精神，我哋就要參加早上最後一個活動「小小實驗家」。呢個活動係由「Little Scientist小小科學超人」合辦的科學探索STEM工作坊。 今次導師教哥哥同芊芊認識恐龍，佢哋兩個恐龍小粉絲都好有興趣。 兩個先用放大鏡，學習一下仔細觀察恐龍，睇睇有咩特徵，同埋要佢哋將恐龍分類。 然後再教佢哋用輕黏土去製作屬於自己的恐龍化石。 然後再安排佢哋去將恐龍分配去相應地區，其實係想同佢哋重溫今堂學習過的內容。 講到呢度係咪都已經玩咗好多嘢，係時侯Check-out呢？！但係今次住宿體驗，最遲可以到6點先至Check-out，所以我哋下晝仲可以參加多個活動「小小廚師」 哥哥同芊芊又可以玩多一個活動齊齊整Pizza 唔知係咪整過好多次，所以真係越整越好，哥哥個塊就麻麻哋，但係芊芊個塊都真係整得幾好，個pizza型仲好圓！ 好正就係自己親手整自己食，仲可以當埋係個下午茶！又可以慳多一餐。 同樣都有證書頒發俾佢哋兩個天才小廚師！多謝哂靚仔廚師哥哥～ 其實The Luxe Manor仲有好多間好有特色的主題房間，好似呢間叫「NORDIC」成間房都用咗「冰」做設計，覺得自己好似去咗Elsa城堡咁。仲有我上次入住的「SAFARI」主題套房，客人都可以優惠價升級入住。 加上好多毛毛配搭，真係好有愛斯基摩人Feel~ 周圍都係冰，我覺得最靚係呢個洗手盆，都係半透明好似冰咁嘅設計 衣櫃裏面仲真係放有好多維京人裝同埋Elsa裙，不過呢兩個人都係適合做野蠻人多D～ 一個價錢一連兩日玩足30個鐘，多個工作坊同活動俾小朋友參加，大人真正可以有個悠長假期叉叉電，而且酒店極具高級格調，處處都係打咭靚位～絕對係超值之選！ 短片介紹：https://www.youtube.com/channel/UCT-bP38c1Xrn-dyeUGdpC-Q Photo & Video by Sony A7III FE 16-35mm F/2.8 + iPhone11 Pro 想跟我去體驗其他活動，快D報名親子團，同埋留意專頁公佈詳情啦！http://goo.gl/forms/CNZMEPoMIWkouK8o2 The Luxe Manor 帝樂文娜公館 地址 香港九龍尖沙咀金巴利道39號帝樂文娜公館 入住期間 即日起至2021年8月31日 (包括首尾兩日) 訂房查詢 +852 3763 8880 rsvn@theluxemanor.com 網址 https://www.theluxemanor.com/zt/offers/be-a-dreamer (以上資料更新至文章當日) Facebook專頁: 呀劍萬帥 kimfamilytravel Blog網誌 : www.kimfamilytravel.com
