今年好矚目的消暑活動「盛夏森林」 ，周圍都見到佢哋廣告，集玩水、美食、音樂於一身，呢個暑假點都要去玩先似放緊暑假！   活動分咗三大玩區，原野森林 ＋ 樂活森林 ＋ 水動森林，「原野森林」暫時設有少量遊戲，射水遊戲、大力搥等。「樂活森林」就係餐飲區，玩到攰攰地可以去食嘢叉叉電，D嘢食仲要好好味同抵食！仲有個大舞台於黃昏後就有好多表演同比賽～     不過主角都仲係「水動森林」，多個玩水大充氣裝置，大人細路都啱玩，不過大部份都有高度限制(140cm)，同埋會按12歲以上(成人)就戴綠色手帶入場，4-11歲(小童)就係藍色手帶。     哥哥先嚟玩「泰山飛索」，最開始冇咩人排隊，大家可以選擇先玩呢個，而且呢個遊戲唔駛濕身住，用嚟 warm up 下都幾好！     轉個頭兩個就去咗玩「猩林探險」，好容易認，因為個充氣裝置有兩隻大猩猩。呢度只適合4-11歲及身高100-140厘米玩。     轉個頭兩個就番去原野森林嗰邊玩水上大滾桶，呢個遊戲係按次收費，只係$20/5分鐘，都算抵玩！       之後大家仲可以買番支水槍，有無限咁多水俾大家 refill 去互射！我都仲俾好多細路圍攻...「我路過咋！～」         之後又番入去玩水，今次玩「高拋滑梯」應該係最刺激的其中一個。     嘩！我影到呢張「無影床」好勁呀，哥哥好似凌空瞓咗喺空氣上面。     大家可以接近5-6點先玩呢個，會少D人排隊可以勁玩 玩完再玩～     芊芊雖然玩唔到「高拋滑梯」，但係都有呢個大笨象啱佢玩，「大象物語」滑道較短，對芊芊嚟講佢又夠膽玩又夠刺激。   「森林之王 障礙賽」都係一個半濕身的遊戲，除咗一開始好高咁瀡落去會濕身外，之後一直就係要過重重障礙。           玩咗咁耐，又攰又肚餓，去「樂活森林」食飽飽後，又再玩過，芊芊要求再去大滾桶玩多次～       最後臨走前，哥哥話要試埋最長最勁的「百米滑道」，爬上去幾層樓咁高的滑梯，然後好爽咁坐住個水泡滑落去，哥哥話一D都唔勁，仲好爽！     到咗接近黃昏，我哋再買D嘢食，坐喺舞台前睇Show食花生，台上正舉行緊啤酒競飲大賽！       玩足一個下晝，到7點幾個天都仲係咁靚～今次呢個「盛夏森林」絕對適合一家大細！如果小朋友太細，唔駛擔心，官方話會陸續再新增一D適合細個D小朋友玩的設施！   Photo & Video by iPhone11 Pro 想跟我去體驗其他活動，快D報名親子團，同埋留意專頁公佈詳情啦！http://goo.gl/forms/CNZMEPoMIWkouK8o2   盛夏森林 Splash N' Forest   地址 元朗大棠有機生態園區內   日期時間 2021年7月2日開始至10月逢五、六、日(15:00-22:00)；註：水動區至21:00 購票 https://www.klook.com/zh-HK/activity/58096-splashnforest-hong-kong-2021   網址 https://www.splashnforest.com/   (以上資料更新至文章當日)     Facebook專頁: 呀劍萬帥 kimfamilytravel   Blog網誌 : www.kimfamilytravel.com