「睡美人出沒注意」話說前一個post嘅公主精品店講緊好易跌錢，但好戲在後頭呀！諗住影完相就周圍行下啦，點知行去後面少少，喺Pandora 店隔離，竟然有啲咁邪惡嘅地方！之前我地喺去frozen展已經避開過一次，點知又畀貝貝見到有得扮公主！重點係，有呀婆係度，加上貝貝嘅攻勢，呀婆當然有求必應！於是乎，佢終於有得扮公主嗱！ 呢個係快圖美期間限定店，開正喺公主展隔離，真係想迫死所有家長！影相最低消費$399，隨住你想要幾多場境同實物，換幾多套衫再加錢。最後貝貝揀咗自己衣櫃無嘅睡美人公主，全程佢都心心眼，真係頂佢唔順，幫佢紮頭髮同戴皇冠，前所未有坐得咁定！換完出嚟仲當正自己公主出場，好怕醜咁慢慢行出黎！不斷同我講：「媽咪，我真係好鐘意呢條裙呀，你下次買畀我ok?」最可怕嘅係，影完晒之後，發脾氣唔捨得除衫呀！不過影相過程係幾愉快，啲哥哥姐姐又好有耐性氹佢，好nice。雖然貝貝真係好怕閃光燈，成日都眨眼瞇眼，但我睇得出佢好努力擘大眼同影學生相時候嘅對比爭好遠，我睇得出佢好努力忍住！影完仲唔夠喉，要我用手機再幫佢影！ 大家行過，記得小心！   ————————— FB: https://fb.me/bowlpui   IG: https://www.instagram.com/bowl_lam/