終於有機會去期待咗好耐嘅屯門共融公園! 因為住得比較遠，加上想去埋有電動船嘅屯門 #百田遊園，所以直頭book一晚屯門staycation，可以連續去2日公園呀 呢度遊樂設施好齊全，地方都算大，有彈床、平衡轉盤、傳聲筒、音樂敲擊管、鼓陣、攀爬塔、繩網、攀爬繩、滾筒滑梯、滑梯、搖擺旋轉球、各式韆鞦，仲有奶油仔最鍾意玩嘅嬉水設施 （疫情關係，沙池不開放～) 我見好多小朋友都自備唔同嘅容器，例如水樽、膠袋去玩水~就算個太陽幾曬，都無阻大家玩嘅心情，公園四圍都係歡樂嘅笑聲~ 告示牌寫逢星期一7am-1pm係保養日，公園唔開放，但一開始只見玩水嘅設施無開。去到10:30am見工作人員已經完成檢查，開封返啲玩水設施。如果想星期一早上去要留意下，有機會摸門釘～ 共融公園旁邊就係爬蟲館，地方好乾淨~我地9:30am去一次，11:30am又入一次，好明顯9:30am個次因為係佢地嘅早餐時間，有專人餵飼緊，所以好少會見到啲爬蟲咁活躍！有興趣睇舞動中嘅蛇，可以踫下運氣，揀呢個時間去~ -小插曲: 不下一次提過今胎阿娘陀到變左超健忘金魚腦…第一日去帶漏條褲替換...第二日終於帶返條褲，但竟然留咗條底褲......去得屯門共融公園嘅家長，一定要 #帶齊套衫同口罩 俾小朋友更換呀~因為一定會玩到全身濕晒! 另外，我地第一日泊車係h.a.n.d商場,去完公園，差啲迷路揾唔返架車...原來商場有兩邊停車場，一邊好近公園個邊，行5-7分鐘就到，係正街市上面。另一邊就要經商場又上又落先去到，不過就近百田遊園～大家如果想泊車就睇清楚先啦! 謝謝收看！   想睇更多阿娘懷孕分享，歡迎光臨Facebook Page《奶油阿娘與寶寶》和Follow Instagram《nylemamaandbaby》。