最近知道港島東區有一間kids friendly嘅餐廳入面有一個小小play area 比細B 玩，啱曬有細B嘅我哋！所以趁Alfred上興趣班之前，帶埋佢同弟弟嚟呢度食個早餐兼玩一陣！   呢間kids friendly餐廳叫Q Time Café，佢係喺鰂魚涌地鐵站A出口附近嘅商業大廈入面（由鰂魚涌地鐵站A出口步行約6分鐘）。       餐廳面積唔算好大，環境光猛企理，但就勝在有個小小嘅play area 專為3歲以下嬰幼兒同父母而設。所以場內有好多嬰兒用品免費提供使用，包括：每張枱都有ProWays殺菌消毒噴霧、babyganics搓手泡泡、順順兒濕紙巾同Californiabear暖奶器，以及部分枱會有 Rayqueenbabysterilizer嘅 UV消毒機添！如果係獨立房用餐嘅話，仲有BB床提供添。                 ▲小朋友等餐期間，可問餐廳拎畫筆同畫紙消磨時間   呢度收費以入座人數計算並以每人一個套餐為最低消費。如果有客人等候入座，用餐時間為 90分鐘。今次我哋2大2小，所以總共叫咗4個餐，我同爸爸各自叫咗一份早餐，Alfred 就叫咗一份「兒童餐Kids DIY Pizza」，另外，弟弟已經唔食果蓉，所以我哋需要叫一份$88嘅小食去抵消返「BB餐ready foods」 $88 嘅費用。至於食物味道，個人覺得還算不錯。   ▲Q Time 全日早餐$108    ▲黑松露炒蛋及巴馬火腿牛角包 $78   ▲小食嘅炸雞翼 (6件) 伴蜂蜜柚子醬 $88   至於Alfred 嘅「兒童餐Kids DIY Pizza」$103，可以從十款餡料中（包括：水牛芝士碎、車打芝士碎、粟米粒、火腿、煙肉、香腸、番茄醬、菠蘿、蘑菇同車厘茄）可揀其中四款去做。另外，只要小朋友叫兒童餐嘅話，就可以免費玩埋Q Time 兒童DIY 無蛋蛋糕裝飾，共有六款裝飾可揀其中三種。最後，仲可以玩扭蛋一次添。                 至於呢度嘅遊戲區，個人覺得真係比較細，所以最多只可供五位小朋友玩，而且適合3歲以下嬰幼兒玩（如果有小朋友輪候，餐廳會作出分齡同輪流15分鐘玩嘅安排）。不過場內就有一個小滑梯、小小兒童閱讀區，以及一啲小玩具。對於細Ｂ其實絕對夠玩，不過地方真係有點細（如連埋大人上去嘅話），加上，遊戲區高咗一級，所以家長要小心看顧兒童，以免發生意外。                   最值得一讚嘅係，呢度有一間設備尚算齊全嘅育嬰房，基本嘅arm chair、換片墊、清潔用品都有，估唔到連 UV消毒機同泵奶機都有添！           總結：個人覺得呢度無設最低消費都幾抵玩，環境同食物質素方面都唔錯，不過個人覺得有啲玩樂設置已經有損壞嘅跡象，同埋滑梯組合嘅樓梯級衛生尚欠理想，我見到有小量食物碎同頭髮。希望呢方面會有待改善啦！ 溫馨提示： - 疫情緩和都唔可以鬆懈，記得勤手洗/搓手，勿摸眼、口、鼻。 ========================================== Q Time Café 親子餐廳 訂座熱線: 2383 3322 WhatsApp: 9092 6580 地址: 香港鰂魚涌英皇道1001號12樓01室 營業時間: 星期二至日 9am - 10pm *逢星期一休息 ========================================== （以上資料更新至撰文當日） 聯絡電郵： alfredbb325@gmail.com 最近開始玩IG，歡迎追縱：allaboutalfred 最近開始玩MeWe，歡迎追縱： https://mewe.com/p/AllAboutAlfred/   追踪更多育兒生活分享，請按 Alfred 成長日記