第一次同8個月大BB去迪士尼，之前都有聽過大家都話其實無野岩太細個既BB玩，玩完又係咪咁呢   媽媽都明白，不過今次媽媽意外獲得一張免費入場券，咁就去啦，無期望無失望，當去影下相都好☺️ 去之前，媽媽真係要做足準備! MUST BRING ITEMS  1/ BB 車 2/ BB孭帶 3/ 野餐地墊( 細細地都夠 ) 4/ 足夠的尿片，奶粉，粥仔，玩具，小食 5/ 保暖衣物 6/ 防曬產品，遮同太陽眼鏡 7/ 消毒用品   話説我地係抽中第一日「香港迪士尼．香港管弦樂團．奇妙交響夜」免費入場卷，另外買多張同婆婆一齊入去影下相 去到第一樣野就係多人！非常多人！同埋要行好多地方，真係必備BB車，又可以放下果個10萬噸既奶粉袋，又可以比BB瞓覺     仲有必備BB孭帶，係必備！ BB玩到差唔多就會熄機，短短地瞓半個鐘，甚至BB扭計都可以孭係身上面瞓再活動 影相又好，行入店鋪又好，可以輕鬆行動，因為BB車行動都唔太方便 仲有玩機動設施之前，入去排隊之前，工作人員都會叫你泊好BB車先 咁最好都係上孭帶，等10分鐘15分鐘手抱都可以，但有時排20分鐘，真係手都酸 婆婆抱住一隻肥鴨   仲有睇睇下SHOW會瞓，無孭帶又係好難搞 BB瞓住睇LION KING，其實音樂都幾大聲，但佢都瞓得好冧     去迪士尼重點當然係影相同睇巡遊啦！所以帶張野餐墊真係好重點 可以放BB坐喺地下影相墊一墊，同佢影下單人照 等巡遊果時又可以墊住坐地下等，食住米餅一齊等，好似小野餐咁，真係好使好用 不過今次既DUFFY巡遊都可以慳番喇，好少野睇，得3架巡遊車，非常無睇頭 我見勁早就有人霸定路邊位，有點失望，希望疫情完後以前既Parade會回來       講開影相，假如大家真係影到電話無電，或者尿袋用到無電都唔使驚 CITY HALL係有充電服務，放低電話充電，可以救到下命架   而家遠距離影相，非常搞笑????   而家DISNEY已經無紙張Leaflet，記得下載個APP，咁就可以睇到遊戲既排隊時間同埋適合玩既年紀 8個月BB，最喜歡應該係小小世界同Winnien the pooh 雖然佢地未識表達，但都會睇到左右望，開心到UNUN下   另一樣媽媽一定要知就係，育嬰設施既位置 育嬰室係美國大街街尾，有房換尿片同餵人奶，如果唔夠尿片呢到都有架 不過其實每個厠所都有換片位，唔使一定呢到 而且DISNEY係有BB車租，$150一日，先租先得   消毒同保暖媽媽一定會做足，都唔使點提 不過有樣野可能會唔記得，就係防曬！ DISNEY真係曬到爆，中午就係熱，城堡前等睇SHOW真係曬到滾 重點係曬到眼花，真係好曬，帶帽又好太陽眼鏡又好遮都好，幫BB遮下眼 曬到4，5點都仲係曬，由熱辣辣變西斜，大人都覺得眼好辛苦 帶齊野就玩得開心又放心 BB去完一日DISNEY係非常開心，婆婆又開心，但好可惜BB紅左屁屁 無留意佢大左便便，搞到損曬，大家記得唔好好似我咁大意（嗚～）   --------------------------------------------- 金寶豬豬 IG ： https://www.instagram.com/gamblepig/ 金寶豬豬 FB：https://www.facebook.com/gamblepig