大仔於2022-23年入讀幼稚園了。在報讀之前，我還是一頭霧水，加上我不是將軍澳區長大，老公住這區也不懂那間幼稚園好，於是由我一手包辦。   首先上論壇找資訊，又問身邊朋友。之後在書展買了幼稚園攻略，這本書影響我最大。   我報幼稚園條件是要卷校，希望學校不要太谷學術，最好讀半日，下午班尤佳。因為我不想小朋友早上太趕急及迫車，希望他有足夠精神。另外是排名不要太差，及小學派位理想。不過聽聞小一派位好像跟讀那間幼稚園沒太大關係。我閱讀幼稚園攻略，及查看全港100名內小學，如果派位大部分在100名內，我還是會報。   我本身擔心我仔面試不出聲，因為他怕陌生人，所以打算報很多幼稚園，我應該報了10間有多，排了第一志願及第二志願，希望有一間學校會收。我事前沒有給他面試班，只有大約2歲開始帶佢上playgroup. 題外話，個人認為我間playgroup都學到幾多野同有學術及體能訓練、遊戲中學習同冇限制小朋友要好守秩序。另外是平日買flash card 及在日常生活教仔仔生字及句子。   最後很幸運面試沒有撞期，差不多每間都有去面試。有些我去，有些因為我不想請太多假期及因為生病了，所以由老公去。我個人認為小朋友去面試，他們覺得是去玩，似上playgroup, 所以也不算太辛苦的。   先說我報的幼稚園及每間感受。   方王換娣：去左開放日感覺不錯。入學校會先有一個號碼，之後坐低。好快就有老師叫名入課室面試。個老師都幾風趣。一開始叫我仔讀擇一盤玩具，我仔選了切菜。老師考下佢蔬菜名、碟既顏色。又問左我大仔有冇讀N班，點解唔選擇讀。平日會同仔仔去邊。主要都是測試小朋友。基本上仔仔都能完成指示，並主要以英文答蔬菜名稱。在臨走會送禮物給小朋友，但我仔拒收及尖叫，本以為唔收我仔，最後有AM offer.   培恩：呢間網上好少評價。校長都有參與面試，感覺主任同校長都好友善。一開始玩一陣遊戲，之後開始面試。考圖卡、顏色、聽指令做動作，考小手肌（叫我仔打開衣夾夾杯），又有唱下歌仔。呢間面試前會打黎提你，又叫你帶家庭照，讓小朋友辦認人物。之後再用相片整相架，整完相架會比小朋友去遊戲地方玩，玩完就可以離開。其實在玩遊戲角時，我仔一隻腳上平衡木，另一隻腳貼住地下行，個老師叫我比佢試下學習雙腳一齊走平衡木，佢有少少迫我要我仔雙腳行平衡木既感覺，所以果刻感覺麻麻。我首選全日班，派左上午班。呢間幼稚園好在11月就公布，唔洗等太耐。整體感覺其實唔錯，感覺係好有愛既校園。   易澤峰：我老公帶仔見。老公話面試等好耐，同感覺老師一般，沒有太大耐性。因為最後面試完結會送蘋果，我仔不想要，老師有少少迫佢拎的感覺。最後得備取生資格。   慶恩：要父母同行。一位家長與校長對話，另一位家長帶小朋友面試。一開始幾位小朋友聽故事，我仔係咁問我爸爸係邊，都不太專心。但他有主動答問題。之後去另一課室玩玩具。玩玩具我見老師都冇咩同我仔傾計交流，都只係問左2-3句。我見老師同有d小朋友交流多點。可能已經決定不取錄我仔。之後老師送禮物，我仔拒收，由我代收。之前出席過這間幼稚園開放日，感覺都很不錯。最後得備取生資格。   基博：基博感覺面試老師幾好，有愛心。排隊時有3個Net招呼。我地首先坐大堂，之後排隊交報名費。之後叫名入課室面試。面試一開試是一班面試生在一個課程，模擬開生日會，叫小朋友齊唱歌做動作。之後逐個逐個點名出去拎生日帽。之後個別面試。我仔一入課室，見壁報板上有很多交通工具，於是係咁講巴士、港鐵列車⋯⋯一段時間才開始面試。主要比圖片呀仔睇，問下係咩黎，有咩用途。如杯、碗、牙刷，又有幅圖係小朋友食野，問佢知唔知係咩野食。唔識老師會教返佢，我覺得好唔錯。走的時間，我仔冇泊櫈，老師也有教他，還幫我泊埋。最後得到下午班offer,但我唔記得係未報下午班了。   青商：老公同呀仔去，好似問點解報下午班，同問家長幾條問題。呀仔就疊積木，考顏色、形象、動物叫聲。我沒有去，都係聽老公講。最後有下午班offer. 我覺得呢間排名唔錯、小一派位也不錯，不過多負面傳聞。   聖安德肋：WhatsApp interview 的，話2:30-3:00期間會有老師打黎做5-8分鐘面試。我2:25同仔仔準備，3點先打黎，本身我仔都坐定定，因坐係度太耐又冇野做，佢唱歌，唱到老師打黎都仲唱緊。之後問下問題，唱下歌，郁動下。感覺老師都好好，好有鼓勵性。最後有下午班offer。   獅子會：封面試信擺埋左一邊，冇去到面試。聽聞呢間都好好，希望下年弟弟有機會去面試。   樂緻：拍一段3-5分鐘既片，之後打電話同家長做面試。面試前幾分鐘會send WhatsApp 同學校簡介影片我們看。我果時如廁，老公接左電話，由老公負責。會根據影片問一些問題，問小朋友會否自行收拾玩具。又問點解會選舉佢地學校。最後係後備生資格。套片搞左我2個淩晨????   循道衛理：要拍片，放棄左冇交影片   力勤：老公見，有下午班offer. 唔記得面試係點。我有去開放日參觀，場地我覺得一般，最深刻係有個機械人，用黎教學用途。不過我仔好驚個機械人。但呢間排名同口碑都好。   原來我報左12間，最後去見10間。不過好好彩呢12間都冇撞時間。本身好擔心冇學校收，因為我仔大約2歲多才帶他多接觸別人，之前老公太擔心疫情，他大部分時間留在家。我沒有帶他去面試班，感覺順期自然就好，不想他太大壓力。現在他沒那麼怕人，也會願意答問題，按指示做動作，感覺長大了。我只希望他有快樂的童年。