有冇兔仔嘅fans呀？ 之前買咗Miffy同Boris嘅模具，終於有時間整曲奇喇（大兔係另一個模），兩兄妹都有份幫手印模 曲奇係低糖版，對小朋友嚟講已經好夠味 嚟緊復活節，同小朋友一齊整吓啦！   材料： 無鹽牛油 100克 蛋 一隻（我用L size蛋） 低筋麵粉 230克 糖 10克   做法： 1. 先將牛油切粒，放室溫至輕微軟化（呢排天氣溫暖，3-4分鐘已夠） 2. 用電動攪拌機打散牛油 3. 加糖，打到奶白色就可以 4. 將蛋液分兩次加入，用電動攪拌機混合 5. 麵粉分三次箍入，拌勻（此時係好似平時麵粉凝固一條條咁嘅狀態） 6. 用手搓成麵團，搓到成團就好，太耐會起筋 7. 先舖一層保鮮紙在枱上，放上麵團，再舖上另一層保鮮紙 8. 用麵團棍壓平麵團，不要太厚/薄 9. 將麵團包好，放入雪櫃冰格30分鐘 10. 取出麵團， 將曲奇印模沾上少少麵粉，印出圖案 11. 可以將剩下的麵團搓圓，再壓平及印圖案 12. 以180度預熱焗爐，然後放入曲奇，焗大約15分鐘，見微微金黃就完成*   *每個牌子嘅焗爐火力不同，請自行調校時間/度數 **每個人嘅體質同身體狀況都唔同，如對上述分享嘅食材有疑問，記住問吓專業人士先     Like & follow us： https://www.facebook.com/weplaynlearn/  https://www.instagram.com/thaddeus.kesli/