曾經睇過一個電視節目 註冊護士分享過「母親唔會唔夠奶水比BB飲」 憑住依句說話，我堅持母乳餵哺至寶寶自然離乳 寶寶出生後10小時，當時我仍在醫院 姑娘話我可以嘗試餵母乳，叫我試下用手揸奶 就喺嗰時起，開始咗我嘅母乳生涯 剛開始揸奶，試過兩次分別揸到0.4ml同0.1ml嘅時候 因為拎唔實枝針筒，跌咗落地下 當時我真係大嗌咗出嚟，我嘅黃金初乳呀….. 揸得勁辛苦，竟然跌咗落地 晒曬我啲心機之餘，寶寶仲要無得食，勁肉赤 除咗手揸奶，寶寶都有埋身食 相信每個寶寶都一樣，開頭唔識埋身食奶 口仔張得唔夠大，啜到nipple損晒，勁痛 每次埋身餵食，都好似受刑咁 (其後，陪月姨姨教我，每次親餵後可以手揸1-2滴母乳 用自己嘅母乳搽返損嘅位置，傷口好快就好返) 明知埋身餵食會痛會損，但為咗寶寶嘅健康 寧願自己痛，自己辛苦，都要比寶寶最好 所以媽媽真係好偉大，幸好我嘅黄金初乳都夠寶寶食 住院3日，寶寶一切正常，又無黃疸，可以安排出院 返家後，我不分晝夜，每隔兩小時就餵奶、掃風、換片 坐月期間，基本上都無好好休息過 好記得寶寶出生後第五日，寶寶嘅黃疸指數偏高 直至出生後3個月先退黃，詳文可看： 全母乳餵哺 之 結束歷時3個月的黃疸症 同好多餵母乳嘅媽媽一樣，我都經歷過奶量下跌 陪月姨姨走咗之後，我飲水少咗、湯水又少咗 膳食亦都無陪月姨姨喺到嘅時候咁豐富，隨之... 我嘅奶量就急急下跌 大家都知道，母乳嘅來源來自水份 吸收水份少咗，輸出母乳自然都會少咗 當時我嘅奶量由5-6oz，減少至3-4oz 心情如熱煱上嘅螞蟻一樣，好焦急 有一次，打算同爸爸出街，諗住暫託寶寶喺婆婆到 然後叫婆婆餵之前已儲放喺婆婆屋企嘅雪奶比寶寶飲 誰知，婆婆問都無問就掉咗包人奶！ 當時遇著奶量下跌，加上產後荷爾蒙影響 我當時真係發咗癲咁鬧婆婆： 「點解問都唔問就掉咗包奶」 「唔識就上網睇下啦，雪奶可以儲放5日架」 「我無奶呀」 而婆婆一句「無奶咪餵奶粉囉」 相信每位母乳媽媽聽到依句說話 都會覺得依句話難聽過粗口 最後，我嬲咗婆婆五日 到第五日，爸爸攞住一大煲湯放工返嚟 原來婆婆煲咗上奶湯比我，叫爸爸攞返嚟比我飲 當時，我一邊飲一邊流眼淚 覺得自己當日好不孝 食完晚飯，我立即返娘家 攬住婆婆講對唔住～ 之後，我上網搵咗好多上奶資料 又買咗好多上奶食品、飲品 又飲返多啲水同上奶湯，奶量好快又上返 人奶路一直都好順利，餵哺母乳期間 無經歷過塞奶、石頭胸、乳線炎等狀況 奶量最高峰時，試過單邊泵到10 oz 亦試過冰奶多到整壞咗個雪櫃 從寶寶出生至8個月，我全天候24小時照顧寶寶 到寶寶8個多月，我重回職場 當時，如我所料，我嘅奶量直插式下降 詳文可看： 人奶路走到一歲check point 試過不同方法追奶，而我覺得最有效嘅方法就係Power Pumping追奶法 詳文可看： 十個媽媽 · 十個媽媽都會成功 之 Power Pumping 有效追奶法 奶量大跌，即使追奶後，奶水仍然唔夠寶寶食 全母乳餵哺至寶寶11個半月後，便要開始補奶粉 我選擇咗成份最接近母乳嘅奶粉比寶寶 每日寶寶進食schedule 如下： 早上：親餵/奶粉 午餐：飯仔 下午茶：親餵/冰奶/奶粉 晚餐：飯仔 睡前：親餵/冰奶 隨著寶寶開始大，下午茶可以改食固體食物 例如：水果、餅乾、pancake、麵包等 下午茶餐奶都可以cut 我親餵或泵奶嘅次數，由寶寶加固後嘅一日3次 減少至早晚各1次 當時仍然係空服嘅我，當人奶媽真係超。級。辛。苦 首先，每次返工都要帶好多架撐 另外，因為工時不穩，作息時間又不穩定 我亦要定時泵奶，不論飛長途機或短途機，只要時間一到 即使喺機上工作中，都要找地方泵奶 好好彩，飛過咁多個阿哥阿姐都好體諒 而阿仔阿妹都好配合，自動自覺做嘢，唔需要我操勞 講到最辛苦嘅時期，一定係飛美國 當時每月必定有一班美國機 好多媽媽同事都會因為小朋友而唔飛長途航班 但無咗一班長途機，嗰個月嘅人工就會少咗好多 所以我盡量都唔會swap機，公司安排我飛咩，我就飛咩 嗰段時間，簡直係人。間。地。獄 首先，因為時差問題，我睡得超級差 然後再要定時泵奶，泵奶時間跟回香港時間 美國同香港嘅日與夜差不多係顛倒 即使我想睡覺，睡前都一定要校定鬧鐘起身泵奶 醒來，泵奶過後，又睡不回去 到想睡嘅時候，大部份餐廳又差不多打烊 我要喺店舖關門前，快快食完我嘅dinner 試過因為長期唔夠休息，我每兩個星期就病一次 當我病好了，又要再飛美國 當時，我嘅人生就只有寶寶、食藥、飛行、餵奶同泵奶 每次飛完美國，就帶住一疊奶返香港 如果我不在港嘅時候，會定時泵奶 在港嘅時候，會選擇親餵 一來，親餵嘅奶量，一定比泵奶多 二來，當時我泵奶嘅奶量每次只有唔夠2-3ml 奶量少到咁，我仍然未放棄母乳餵哺 的確，我係超級堅持，亦係好硬頸嘅母乳媽媽 我在港嘅時候，每晚睡前，只要對寶寶講「食奶奶啦～」 寶寶就會自動攞餵奶枕比我，然後餵佢食奶 當寶寶食飽，佢就會自己走開，再冧之之對住我笑 雖然過程真係非常辛苦，但換嚟寶寶嘅健康及微笑 就算再辛苦，一切都覺得值得～ 當寶寶再大啲，可以連睡12小時，直至早上10點 我就直接cut埋早上餐奶，改食早飯 嗰段時期，當我不在港嘅時候，每日就只需泵奶1次 減少親餵及泵奶次數，增加咗我嘅休息時間 多出嚟嘅me time，可以做自己鍾意嘅事～ 寶寶約一歲五個月左右，試過連續幾晚 睡前親餵，寶寶只係吸啜一啖就走開 當時我已經意識到，寶寶唔再需要我 一直希望母乳餵哺至寶寶兩歲 但寶寶突如其來嘅自然離乳 原來我可以咁冷靜去面對 知道好多媽媽會因為寶寶唔再需要母乳而唔捨得、失落、甚至會喊 當我仲係母乳媽媽嘅時候 我都難以想像寶寶唔再需要我嘅一刻，我會點？ 會唔會好似上述嘅媽媽咁，唔捨得而喊 但原來，當事情真係發生嘅時候，我反而無太大嘅失落感 只係順著寶寶嘅意願去調整自己心理，好快，我就接受事實 正式結束我嘅母乳生涯 附錄： 未當媽之前，我都唔知原來自己可以因為“母乳餵哺”而咁堅持 可能係因為自己係奶粉寶寶，自小身體潺弱 自覺又不夠聰明，相對起同齡嘅母乳寶寶 我多方面都不及其他母乳寶寶 而喺我讀書嘅時候，已經立定將來必定要餵哺母乳 當時仍然係小妹妹嘅我，已經知道餵哺母乳好處多多 心想將來有小朋友的話，一定會餵哺母乳 唔希望自己將來嘅小朋友，好似我咁 結果，我真係做到，完成我人生裏最有意義嘅事～ 想追蹤更多愛女及愛犬咖哩的生活日常 歡迎like & follow以下專頁, 亦歡迎產品試用或合作 #Facebook #Mamibuy #PressLogic #Blogspot #ohpama #UBlog #ESDLife 另想查詢代購資訊，可到以下facebook專頁 飛行媽媽雜貨代購團
