去科學館睇恐龍展覽一定係今年必備嘅暑期活動，我終於都book到入場嗱！話說去呢個恐龍展係必須要預約，而佢地啲飛通常一放出嚟好快就俾人book晒，我每次都失敗而回。有日下午1點半左右，見喺屋企無咩做，心血來潮上klook望下有冇即日飛，有喎！有1點場可供選擇，但我見佢係分時段，我好驚張飛過咗一點又唔知入唔入得呢？我即刻打去科學館問如果我遲啲3點先入場得唔得？原來佢話無問題架！於是我哋即刻出發！ 平時睇侏羅紀公園多，但現場望到其高完整度嘅恐龍化石骨架，又真係好大好誇張！貝貝不斷問我香港仲有冇恐龍？不過以貝貝呢個年紀，佢黎呢度嘅目的都只係想集合晒啲蓋印！但都好開心佢因為呢次嘅活動，記住咗幾款恐龍嘅名稱！後來佢都有拎住本場刊，問我勁多關於恐龍嘅問題，求知慾強！大家可以黎呢到睇多啲關於恐龍嘅資料，但好似貝貝呢啲未識睇中文字嘅小朋友，都有啲互動野俾佢地玩，最好玩係果條地下投影隧道，間唔中會有恐龍擘大口食佢地，好多小朋友尖叫，但唔知點解貝貝今次異常冷靜，話知道佢地係假！ 其實恐龍展唔算好大，反而係玩埋成個科學館先花時間，佢有好幾個區域同我細個黎嘅時候，仲係一模一樣！貝貝花最多時間喺鏡子世界、磁電廊，兒童天地！可以自己做到好多實驗，又可以解題，玩得好開心，佢幾乎每一樣都唔想錯過，剩係留喺兒童天地玩上螺絲，維修架車都玩咗半個鐘！ 貝貝係第一次去科學館，而我亦一早打聽過啲小朋友每次大概玩4-5個鐘！最後我地玩到差唔多關館先走，足足玩咗3個鐘，但又真係玩唔晒！有啲部分我見唔啱貝貝玩，已經skip咗，但係好似仲爭力學都未入過去！貝貝勁唔捨得走，成晚都提住要我帶佢再去，咁又真係獲益良多，仲勾起我好多科學知識！大家有時間就記得預約，恐龍展覽去到11月就完，展覽期間嘅科學館仲係免費入場添架！ 展覽詳情 香港賽馬會呈獻系列：八大．尋龍記 | 展覽 | 香港科學館 日期：2022年7月8日 ‑ 11月16日 時間：10:00-19:00（逢星期一至三,五）| 10:00-21:00（逢星期日,六） 地點：香港科學館 票價：免費 預約：https://hk-science-museum.partner.klook.com/zh-HK/activity/73613-hongkong-science-museum-special-exhibition/  現時逢星期一早上十時更新，每次開放預約未來一星期之入場時段（星期四休館日除外），其後每星期更新一次。   ——— FB：https://fb.me/bowlpui IG：https://www.instagram.com/bowl_lam/ Blog：https://www.mamibuy.com.hk/home/18060   #貝貝Alice #90後媽媽 #香港媽媽 #新手媽媽 #新手爸爸 #育兒日記 #育兒生活 #科學館 #klook #八大尋龍記 #尖沙咀恐龍 #暑假活動 #暑期活動 #親子活動 #放假好去處 #室內親子活動 #室內活動 #週末好去處 #文化 #打卡 #恐龍