平日大家都要返工返學咁忙碌，所以放假都鍾意帶小朋友到戶外親親大自然，呼吸新鮮空氣之餘又可以認識一下自然生態。今次我地就去左嘉道理農場暨植物園舉辦嘅蝴蝶導賞活動，除咗好玩仲好有教育意義！     嘉道理農場位於香港最高山脈 — 大帽山北坡，係香港最大嘅自然保護區，佔地約148公頃，比海洋公園（92公頃）同中文大學校舍（137公頃）仲要大！嘉道理農場亦收養左受傷和待康復的動物，當中有一部分係曾被非法飼養作寵物最後慘遭遺棄。   喺香港大約有250種蝴蝶已被記錄，而單單喺嘉道理農場就已經記錄左201種，佔蝴蝶種類的80%！   當日嘅導賞團由高級自然保育主任Philip負責，首先簡單介紹嘉道理農場嘅背景，就開始我哋嘅觀蝶之旅！佢帶我哋去唔同嘅果樹同溫室，捕捉蝴蝶唔同嘅一面。我哋見到好多平時好少見嘅蝴蝶品種好似Birdwing，真係又靚又大隻，亦有機會見到蝴蝶卵同幼蟲。     期間Philip亦會為我哋詳細講解，無論大小朋友都絕對係長知識！佢仲帶備平板電腦，打開圖鑑等大家可以近距離觀賞。後尾佢仲捉咗隻蝴蝶同我哋介紹，小朋友都睇到好興奮！   除咗蝴蝶，我哋仲可以喺園區內睇到一啲平時好少見到嘅動物，就好似鷹、貓頭鷹、豹貓等，真係大開眼界！     參觀完仲有工作坊，可以製作手工木製鑰匙圈，當中所用嘅木全部都係園內回收木材，小朋友可以發揮創意喺上面畫上唔同圖案，造成獨一無二嘅鑰匙圈，更可以時刻提醒我地要好好愛護大自然！     今次賞蝶活動真係好玩又意義，可以等小朋友遠離繁囂，探索一下大自然，擴闊視野，認識香港嘅動植物，唔洗成日對住電子產品，仲可以強身健體！     同時亦可以教導佢哋點樣可以為保育環境出一分力，其實只要係我地於日常生活中作出少少改變，已經對環境保育有莫大幫助！就好似農場堅持「走塑」、支持有機食物等等。   農場仲有機雞蛋出售，又香又好味，我哋都買咗盒返屋企！   *黎緊8月24同31日，嘉道理農場會再次舉辦蝴蝶導賞活動 *活動詳情：https://www.kfbg.org/tc/events/summer-eco-tour-butterfly-walk   呢個活動真係令我地獲益良多，除咗可以增加對生態嘅知識，亦能夠灌輸小朋友有關保育環境嘅重要，絕對係一個非常好嘅親子活動，非常推介俾大家！   #環境保育  #賞蝶  #生物多樣  #攝影  #靚相  #打卡 #家庭樂  #親子  #捉緊夏天尾巴 #放低電話  #有機  #無添加  #走塑 #嘉道理農場暨植物園