最近又去咗一個bookmark咗幾年都未去嘅放電好地方，今次約埋朋友一齊去放電放足一日!! 俾咗入場費，場內所有嘅設施都可以免費任玩 (除飛索體驗及充氣彈床外)。     天氣涼涼地，最適合去戶外、農莊玩。 如果想去玩，記得先到佢哋網站預約再出發。 因為佢哋不設walk-in到場玩樂㗎~   馬上同大家分享有咩好嘢玩先~~       滑草道 嚟到一定會無限玩嘅滑草!! 呢到足足有成28米咁長~ 和牛b同妹妹玩完一次，馬上就再排隊再玩。         滑梯、沙池、攀石、鞦韆 位於入場門口附近嘅滑梯，你可以選擇用車軚或者直接瀡嘅滑梯~ 滑梯設於沙池，旁邊仲有個小攀石。   ^ 睇和牛B個表情就知，好刺激好好玩! (哈)   打卡鞦韆     手搖船 水池空間都算大，船都有唔同尺寸，而且家長可以同小朋友一齊乘坐手搖船，佢哋有分大船同細船。小朋友亦可以自己一架船仔，家長亦可以自己一架船仔㗎~         漂移車、單車 入面有多款車可供選擇，當日我哋人唔多，所以差唔多全部款式都試玩晒~   甩尾飄移話都冇咁易呀，不過都有機會炒車㗎~           幼兒玩樂區 入面有玩單車、滑板車嘅地方，仲有唔同嘅兒童遊樂設施 (包括彈床)，仲有適合親子、朋友玩嘅乒乓球、桌球等。                     兒童區入面嘅車場，仲有滑板車提供。 如果小朋友較年幼，家長可以帶佢哋嚟呢邊玩。       兒童區入面仲有兩個適合幼兒嘅彈床~       羊公館 除咗玩樂設施之外，呢到仲有羊咩咩。 當日我哋都買咗飼料($10/份)餵羊咩咩，場地職員仲話可以摸羊咩咩，佢話佢哋好乖唔咬人㗎。 (當然，家長都需要照顧同行小朋友啦)         必影打卡位 近入場門口，一入場就會見到呢間風車屋。       魚池       滑水梯 必濕身嘅滑水梯，雖然我哋當日有帶替換衣服，但當日天氣比較涼，我哋就冇玩到了。 下次一定要挑戰，除咗替換衣服，仲要記得帶拖鞋呀!         飛索體驗 (**付費活動) 呢到最特別嘅設施就係飛索體驗!! 如果想玩，記得入場時要即刻去買定遊戲票啦! 因為真心搶手，活動會喺下午進行。     活動涉及高風險活動，購票前建議考量自身/小朋友體能後，再決定參加與否!! 費用: $60/兩次 (同一名參加者)      ^ 排隊準備穿上裝備   ^ 穿上裝備   ^ 準備出發啦~   和牛B今次係第一次挑戰飛索，喺朋輩影響之下。 真係好唔同，如果只有佢自己，佢一定唔敢挑戰!!     我見到成功挑戰飛索嘅佢，作為媽媽真係覺得佢好叻!! 因為真係好需要勇氣，咁高、又快，其實都真係超級刺激!!     充氣彈床 (**付費活動) 彈床滑梯都好高，所以都幾刺激! 有職員睇住小朋友玩，家長係唔可以進入彈床內。     費用: $30/20分鐘         場內設施: 基本洗手間、洗手設施都有的。   場地會為每位訪客預留一張台，可以放低手袋、行李 (注意! 貴重物品需要跟身)。 場地亦歡迎訪客自備食物或於場內小賣部購買簡單小食 (有叮叮點心、杯麵、薯片、汽水等)      我同朋友準備嘅午餐~     有午餐，自然也準備了下午茶 (哈)     小賣部   育嬰室 比較簡陋，只有一張長台同埋幾張櫈。 如果小朋友要瞓低換片，自己一定要攜帶換片墊舖台上面換。       吸煙區 場內禁止吸煙，所以場地都好細心。 安排咗一個吸煙區，供需要人士使用。       收費: (資料來源自禾田喜山官方網站)   全日任玩套票價格 (10:30-16:30)： 成人/小童：$ 150/位 ​幼童/長者：$  80/位 半日任玩套票價格 (13:30-16:30)： 成人/小童：$ 110/位 ​幼童/長者：$  80/位 ​全日任玩套票 + BBQ價格： (燒烤時間為12:00-15:30) 成人：$ 270/位 小童：$ 250/位 ​幼童：$ 180/位 長者：$ 200/位 ​備註： 1. 成人 (13-64歲)、小童 (3-12歲)、幼童(2-3歲)、長者 (65歲以上) ​2. 2-3歳及65歲或以上為優惠價 ​     (此為最優惠價，不得與其他優惠同時使⽤用，本園擁有最終解釋權) ​3. 2歲以下免費 4. 園內沒有獨立BBQ入場，BBQ必須附帶全日任玩套票 5. 如因黃、紅，⿊雨 或 3號風球以上可免費改期 (半年期內)。 ​6. 個人原因取消預約：      活動日前2日至活動日前14日取消預約，退回70%；      活動日前14日至活動日前30日取消預約，退回90%費用；      活動日前30日前取消預約，全額退款。 7. 從2023年2月份開始，每個燒烤爐開爐費用為 $80，而出席任食BBQ的每位付款會員可獲得 $10 的開爐費代用券乙張(長期有效) 不得退換或兌現。 不設walk-in; 須於最少2天前在禾田喜山網站預約及繳費。   【禾田喜山網站】 https://www.wadakiyama.com/   前往方法:  公共交通工具 ​     ．専缐⼩小巴55k  (上⽔港鐵站旁⼩巴總站) 車程約30分鐘      ．巴⼠ 78k  (上⽔港鐵站) 車程約40分鐘 自駕      ．最新可經香園圍公路至本園(九龍塘至園區，車程 30-40mins)      ．在龍山隧道出口落迴旋處，第四個出口“沙頭角”箭咀方向入沙頭角公路      ．約70停車位由村民供應(必須預約，現場付款，⽇泊$80 <1030-1645> ) **相片來源自禾田喜山網站**     【禾田喜山@沙頭角】 地址: 新界沙頭角塘肚村(沙頭角農莊直入) https://www.wadakiyama.com/ https://www.facebook.com/wadakiyama     ============================   記得Follow埋我哋Facebook、MeWe同Instagram呀 https://www.facebook.com/80smami https://mewe.com/p/和牛b的成長日記 http://www.instagram.com/wagyubmami/ ============================ 和牛B & 和牛媽媽 YouTube Channel  https://www.youtube.com/c/Wagyubmami ============================