台北動物園係貝貝其中一個最期待嘅行程，好彩我哋果斷叫長老自己搵節目，因為又曬又多路行，有時又會突然勁大風好凍，都唔想佢哋跟啲小朋友行程咁悶，佢哋最後自己搭捷運去「淡水」自己玩，夜晚再會合食飯。我事前做晒攻略先入園，務求一日可以行晒想去嘅地方，盡量skip咗啲平時都會見到嘅動物。我哋12點去到，玩到5點關園，都行晒我本身計劃去嘅地方，中間仲有時間坐低食野添！ 行程路線推介：臺灣動物區>昆蟲館>無尾熊館>坐列車>兩棲爬蟲館>蒙古野馬>非洲動物區>Mos burger>沙漠動物區>穿山甲館>貓熊館>兒童動物區 臺灣動物區有8成動物都睇唔到，完全唔知去晒邊，一度以為呢個動物園大伏。 昆蟲館值得去，個格局同「動森」嘅博物館一模一樣，啲蝴蝶勁多又會活生生咁喺你身邊狂飛，我印象中香港無呢類展館。不過佢兩父女勁驚，入到去都係左閃右避。 一心黎睇長頸鹿、大象、河馬、斑馬、獅子，全部都好大份，貝貝終於可以見識下多啲唔同嘅動物，長頸鹿睇咗最耐，最好睇！我哋連駱駝都研究咗好耐。 列車一定要搭，可以快快地由起點直接去園內最遠果個區，再慢慢行返出嚟起點直接離開，慳咗唔少腳力同時間。 呢度嘅樹熊同熊貓都勁敬業，睇佢哋食嘢同搵野食都好好睇，絕對唔係香港見到咁懶。穿山甲區原來無穿山甲。成個園區睇得最多係烏龜同猴子，睇到我哋一見到龜就話：「又係龜！」 園內有好多休憩空間，廁所都乾淨，因為空間太大，所以一路行都唔覺邊度特別多人，行得好舒服，不過我略嫌啲指示牌有少少混亂。 回程我哋就搭捷運，玩得太盡興，貝貝都火速瞓著覺！ ——— FB：https://fb.me/bowlpui IG：https://www.instagram.com/bowl_lam/ Blog：https://www.mamibuy.com.hk/home/18060 #貝貝Alice #90後媽媽 #香港媽媽 #新手媽媽 #全職媽媽 #親子blogger #hkblogger #parentblogger #hkinfluncer #台北 #台北親子好去處 #台北親子旅遊 #假日好去處 #台北之旅 #親子旅遊#親子好去處 #台北親子 #台北親子景點 #臺北市立動物園 #台北動物園 #臺灣動物區 #昆蟲館 #圓仔 #圓寶 #圓圓