【 不一樣的玩樂體驗。深圳兒童探索館 】 好有驚喜呀！呢間位於深圳婦兒大廈內的「深圳兒童探索館」勁好玩，足足有兩層，一個價錢就能全日任玩，仲可以自由出入，玩到攰出去食飯休息下，唞夠再入場繼續玩。 「深圳兒童探索館」分成六大主題，館內面積非常大，玩樂設施多元化，我哋當日仲有消防安全示範，小朋友也可以參與其中，兩個仔勁開心。 一入場兩兄弟就被活力城市吸引住，係腸粉店賣點心腸粉，扮寵物醫生照顧小動物，做消防員救火，最特別係扮地鐵維修人員，真係好似置身於隧道一樣。 館內有一座大型的攀爬設施，仲有條超長滑梯，好受小朋友歡迎。仿真大漁船真係有得玩捕魚卸貨，開動機關就能搬運貨品，考驗手眼協調。 感官小屋有唔同的光影效果，有一些豆袋沙發，父母可以坐低休息，望住小朋友係旁邊玩。 當然唔小得專為0-3歲低幼齡小朋友設立嘅親親寶貝遊戲區，全區都有厚墊保護，也有母嬰室，方便小朋友換片飲奶，好貼心。 值得一讚嘅係，每個遊戲區都有工作人員睇住小朋友嘅安全，也會溫柔提醒小朋友玩樂嘅守則。洗手間好乾淨，有提供拖鞋。 我同爸爸都覺得呢度比起一般嘅playhouse 更好玩，而且可以邊玩邊學習，好值得帶小朋友嚟體驗呢！ 安妮媽媽溫馨提示 : 記得提前在「婦兒大廈」網上預約，每日有限額架。 大人小朋友也必須穿著有膠粒的防滑襪，入場會檢查。   深圳兒童探索館 地址 : 福田區景田路78號，婦兒大廈內 ————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com