好多小朋友都鍾意玩 Barbie，因為可以發揮創意，換吓衫仔，玩吓造型，係好好嘅消閒活動。 而喺我哋屋企，Barbie 更係一位 DIY 老師、創意指導員、環保教育大使、同人生導師。 ` 為 Barbie 設計嫁衣裳 Keicy 大約 3 歲嘅時候，用紙巾包住 Barbie 公仔個身，然後用膠紙貼住條腰。 原來，當時佢係想幫 Barbie 創作婚紗，咁有創意，我當然大讚啦！ 之後，我畀啲畫紙同顏色筆 Keicy，鼓勵佢設計唔同嘅裙畀 Barbie 着，Keicy 亦都好比心機，不斷創作，而家，仲會同 Kassy 一齊分享創作構思！ 但係，呢個過程，係需要教育嘅。 ` DIY 學環保 培育創意 因為小朋友畫畫好多時畫兩筆就唔畫，好嘥紙，所以我叫 Keicy 成張紙都填滿顏色，然後變成畫布，幫 Barbie 造衫，咁就唔會嘥嘢啦！ 另外會鼓勵 Keicy 循環再用物資，好似呢次咁，就係用好靚、有花邊，但已經唔啱着嘅 BB 襪。 只要剪穿襪頭，就變成 Barbie 嘅 Tube Dress 喇！ ` 香水樽，係由珠仔同膠拼埋一齊黐。 梳化，就係由紙巾盒改裝。 床，係金莎朱古力嘅盒。 布料，係喺深水埗搵倒嘅布料色版。 只要花小小巧思，就可以將舊物再造，變成 Barbie 嘅夢幻小天地。 低成本製作，就有咁靚嘅效果，順便教埋小朋友要學識環保，玩幾多次都得啦！^^ ` 條黃色裙同下面啲花花，係 Keicy 自己穿嘅，靚唔靚呢？ 佢自己都要着埋一份呀！:) ` 玩 Barbie 啟發思考 由畫畫到環保 DIY，都能夠啟發小朋友嘅組織同思考能力，而呢啲正正就係現時學校功課需要嘅。 而家 5 歲嘅 Keicy，除咗對畫畫、造衫愈嚟愈有興趣，選色、用料同剪裁都愈嚟愈有心得！ 佢話最鍾意紗紗，因為好滑好舒服，用紗紗造嘅裙，着起嚟好似 ballet 裙一樣，轉圈嗰陣靚啲！   夢想由快樂孩子創造 無論學跳舞、溜冰，定係 DIY Barbie Dress，最緊要係 Keicy 開心！ 有家長嘅參與，就成為優質嘅親子活動，大家關係更 close，亦令小朋友更勇敢追夢。 Keicy 同我講：「我嘅夢想，係幫媽媽同 Barbie 做一條好靚嘅裙！」 身為媽媽，聽到當然超冧啦！ 不過，我唔會規限 Keicy 將來要做設計師，唔會要三姊弟行我想佢哋行嘅路。 只要佢哋大個行條正路，我就會 100% 支持！ ` 因為我相信，路，係由人行出嚟嘅！ （有片）蘋果日報訪問 ` ` FB: KeicyKK