13 MARCH 2016(SUN) 今日行過超級市場，無意中見到有包大菜，突然間又醒起N..N...N...時，老公話過佢想食返大菜糕蛋蛋，所以就買包同小小豬齊齊整依個蛋花大菜糕，等老公懷舊一下啦~ 有齊材料就上網搵食譜，原來依個蛋花大菜糕係勁簡單，只需要四樣材料同幾個步驟就得啦！ 材料有大菜絲10g、水 1300ml、雞蛋 1隻、冰糖隨個人口味，不過最少都要有130g，因為本身大菜係冇味菜要靠啲冰糖帶出個味呀，當然仲有好重要嘅蛋殼啦~ 大菜係一般街市雜貨店或者超級市場都有得賣，蛋殼就係啲上海街或者一啲賣蛋糕材料店都有，相信復活節將至，應該都唔難買到。 洗淨大菜絲，然後剪碎浸軟~ 打勻雞蛋備用~ 煲內準備水，待大火煲滾後，加入大菜絲~ 然後加入冰糖~ 慢慢攪拌至大菜絲及冰糖完全溶解後，就可以關火~ 最後加入蛋液，再打散蛋液成蛋花~ 等到大菜糕液微暖之後，就可以用雙手拿著雞蛋殼蓋住大菜糕液體~ 過程或者有點不雅，不過我地係做之前都洗乾淨雙手，所以都係可以接受嘅。小小豬一成功蓋住雞蛋殼，佢幾開心又有成功感呀~ 今次我地嘅份量就整到十隻小雞蛋，同埋四個啫喱杯啦~ 放入雪櫃雪至凝固後就食得啦~ 可能小小豬第一次接觸，所以佢覺得好新奇，對住隻蛋蛋要研究好耐，又不停問點解會咁...粒蛋蛋好攪笑。有時對住依個少少事都可以問一餐又笑一餐嘅傻仔，都唔知好嬲定好笑。不過小朋友就係應該要咁嘛，依啲先叫童真呀~ 咬落都好彈牙，我自己就覺得唔錯啦~ 小朋友表現就最能反應出個味道，小小豬連食我兩大粒就知有幾好味啦。其實都唔差啦，不過老公都係嗰句...唔夠甜哦。唉.....我都又係嗰句.....俾小小豬食就唔好咁甜啦！           **我地嘅FACEBOOK FAGE，唔知大家LIKE左未呢？** 小小豬的成長日誌 大家一齊嚟交流下煮飯仔及去玩嘅親子樂啦