12 APRIL 2016(MON) 好姊妹外遊回港，當然要出嚟見個面，順便拎手信啦。今次我地仲誤打誤撞之下入左Verde MAR餐廳，初嘗墨西哥菜呀~ 其實當初我地都係未決定食啲什麼，正當我地行過Verde MAR時，見到個佈置都幾特別，再加上見個價錢都唔算貴，所以就決定入去一試啦~ 先嚟一杯米漿，看似有點像杏仁糊，但入口有好香濃嘅米香味，而且都算好甜，所以都幾啱我口味呀~ 先嚟米脆片配牛油果醬 - 新鮮自家製墨西哥脆片，真係卜卜脆好香口，再配以新鮮嘅牛油果醬，真係食唔停口。一向我都唔太"好"牛油果，原來咁食法又真係幾好味，攪到我有少少鐘意左食添~ Chorizo Quesadilla - 墨西哥餡餅配自家製辣肉腸，再加埋牛油果醬，少少辣但又帶點牛油果嘅甜，味覺上都幾特別~ Chicken Wing Habanero - 依個可以話係挑戰我嘅極限，因為係用左全世界第二辣嘅辣椒-Habanero嚟腌製，之後煎封雞翼。坦白講...其實真係好辣，不過佢辣得嚟又唔會太搶喉，只係嗰種辣KEEP好耐都未散~ 嚟到今晚嘅主角 烤仙人掌扒 - 初時都以為仙人掌總係怪怪味，不過食落又幾得意，將食用仙人掌加點鹽烤，之後加點青檸汁作調味，入口有點似青椒，咬落又有點似鮮蘆薈，我自己就覺得幾好食，仲食左大半碟添...哈哈哈~ Agua Chile Snapper - 腌製過的紅魚刺身再配以青檸汁，進食時再加埋一片青瓜一齊食，既有爽口得嚟又有魚嘅鮮味，整個感覺都好清新呀~ Shrimp Cocktail Mexicana - 墨西哥特色番茄凍湯，配上其他材料，好似有大蝦、牛油果、洋葱、番茄、芫荽、香葱，拌匀後就可以飲啦。凍湯本身已經好清甜，再加埋爽口嘅大蝦，同埋一眾配菜，真係令凍湯味覺更加層次呀~ Birria Beef Stew with Mexican Rice - 其實係一碟慢煮燉牛肉，由於我唔食牛肉，所以我就冇食到。 不過好姊妹話味道唔錯，牛肉個咬口唔會有太多脂肪，燉得夠入味又淋呀~ Whole Chargrilled Chicken - 原來墨西哥都有烤鷄，佢仲係即叫即焗，所以每日限量供應，我地真係好彩可以食到今日最後一隻..哈哈哈。雖然經過考焗，不過肉質都非常嫩滑，就連鷄胸都非常滑，依個都俾一個讚呀~ 嚟到甜品時間，依個墨式香蕉船真係要俾個爆LIKE佢，先將香蕉焗熱後變成焦糖狀，再配以自家製粟米雪糕一齊食，個粟米雪糕真係好食得唔識形容，既滑滑又勁香粟米味，真係好想再去食呀~ 自家製玉桂脆條Churro配朱古力醬 - 同樣係自家製嘅玉桂脆條，由於即焗即食，所以特別外脆内軟，再配上濃郁朱古力醬，都幾香口呀~ 開開心心又過左一個晚上，原來墨西哥菜有特式得嚟又咁好食，今晚都真係大飽口福啦！     **我地嘅FACEBOOK FAGE，唔知大家LIKE左未呢？** 小小豬的成長日誌 大家一齊嚟交流下煮飯仔及去玩嘅親子樂啦