20 APRIL 2016(WED) 依排天氣濕濕笠笠，都真係令人周身唔舒服，見朋友仔介紹左依款袪濕茶，見簡簡單單咪又買材料煲下。袪下身體入面嘅濕氣，人都醒神啲啦~ 煲新涼茶我當然先問一問相熟那位藥材店店員先，佢話依幾款都係啲性質較平和嘅袪濕料，都係有健脾益胃及袪濕嘅作用，所以都好啱依家天氣飲用。到左夏天我地成日出入冷氣房，都一樣好啱飲，因為成日叫冷氣都會令人體積左好多濕氣。 材料只係需要雲苓、白朮、扁豆衣、白芍、抱心伏神及蜜棗兩粒，藥材份量方面你同藥材店職員講大約幾多人飲用，佢就會幫你執份量啦~ 將所有藥材浸洗備用~ 於煲內準備12碗水份量，然後加入藥材~ 待水滾後，轉慢火加蓋煲一小時~ 大約煲埋有6杯左右份量，待涼後就可以入樽放在雪櫃，因為雪凍左好飲好多呀~ 其實依款涼茶又真係冇乜味道，加上又有少少藥材味，所以小小豬都唔多願意飲，所以俾小朋友飲用就要有心理準備要威迫利誘先呀...哈哈哈。但其實我又覺得唔係咁難飲呀，只係一杯有味嘅水咁啦！ 溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！       **我地嘅FACEBOOK FAGE，唔知大家LIKE左未呢？** 小小豬的成長日誌 大家一齊嚟交流下煮飯仔及去玩嘅親子樂啦