1 MAY 2016(SUN) 雖然我就成日都煲湯，但我炒嘅餸又真係成日都係嗰幾款，其實都真係有點悶。所以今日又嚟攪攪新意思，整個快靚正嘅照燒洋蔥豬肉片，等小小豬開心下啦~ 點解小小豬會開心？咪因為依隻豬仔係洋蔥怪，佢真係可以我炒幾多佢就食幾多...哈哈哈！ 材料超簡單，只需要豬肉片、洋蔥同埋照燒汁醬~ 豬肉片先用老抽、糖、粟粉、麻油各1茶匙及水1湯匙，醃最少15分鐘~ 洋蔥切片，我今次用左紫洋蔥，因為聽朋友仔介紹話紫洋蔥炒出嚟係會甜啲呀~ 落少許先用油爆香洋蔥，然後盛起備用~ 唔洗洗鑊即時再加少少油(真係少少好啦)，然後將豬肉片略煎至約7成熟~ 其後加入洋蔥快手炒勻~ 最後加入半包照燒汁及2湯匙水~ 煮至洋蔥熟透及個汁杰身，就可以上碟啦~ 哈哈哈...連埋醃豬肉片，全程真係唔洗30分鐘，仲要個味道又真係唔錯，個汁包住啲豬肉片，食落好JUICY。 紫洋蔥又真係比普通洋蔥爽口啲又甜啲，就連我一向唔多"好"洋蔥嘅，都食左少少呀！       **我地嘅FACEBOOK FAGE，唔知大家LIKE左未呢？** 小小豬的成長日誌 大家一齊嚟交流下煮飯仔及去玩嘅親子樂啦