13 MAY 2016(FRI) 其實我自己都幾鐘意食蜆，所以好多時都會煮蜆，之前試過用清酒、豉椒或忌廉嚟煮。前兩日見有朋友介紹用沙嗲煮蜆，見又好似幾特別，所以我又嚟試煮食個惹味嘅沙嗲炒蜆啦~ 依個沙嗲炒蜆同平時煮嘅豉椒炒可以話差唔多，只係主角變左係沙嗲醬同洋蔥，所以我都幾有信心可以煮好呀！ 由於我地七大一細食，所以材料就多少少，蜆兩斤、蒜頭1粒、芫茜及蔥段少許、沙嗲醬2-3湯匙(視乎個人口味)、洋蔥1個、紹酒1湯匙~ 蜆用鹽水浸至吐沙，洗淨瀝乾水份~ 洋蔥去皮切塊；蒜頭切成蒜蓉；芫茜及蔥切成小段~ 下油爆香洋蔥、炒一會、下蒜蓉炒勻~ 炒香後再加芫茜及蔥段炒勻~ 下蜆略炒至大部分半開口~ 然後下紹酒、沙嗲醬及少少鹽~ 快手炒至蜆口全開就可以食得啦~ 蜆其實好易煮，每一次我煮大家都好鐘意，所以係其中一個我偽大廚鐘意煮嘅餸。當然啦...見佢地食得咁開心，我又真係好有滿足感嘛！     **我地嘅FACEBOOK FAGE，唔知大家LIKE左未呢？** 小小豬的成長日誌 大家一齊嚟交流下煮飯仔及去玩嘅親子樂啦！