香港人食物太豐足喇！餐餐食量超標，大肚腩就係咁樣形成。最近受咗啲媽媽朋友影響，開始green Monday生活，逢星期一都會自製輕怡沙律做午餐。食咗一排，肚腩真係明顯細咗喎！ 講到自製沙律，用咩嘢沙律汁真係會好影響沙律嘅味道，所以特地買咗3款沙律醬比較一下~ 沙律菜購自吉之島超市，包裝沙律菜已跟埋芝士碎、多士粒、黑椒同埋沙律醬。好方便！我另外再加咗啲粟米、紅腰豆同埋雞蛋，咁簡單就整好一份沙律喇！ 首先試下柚子芝麻醬先啦！芝麻醬帶點酸酸甜甜嘅柚子味，幾開胃。唔錯呀！ 然後試下丘比牌嘅芝麻口味沙拉汁，比起頭先果隻較為杰身，而且好重芝麻味。勁好味呀！*o* 最後，試埋丘比牌嘅千島口味沙拉汁喇！味道同一般千島醬差不多，冇乜驚喜~ 我覺得千島醬一般啫！但晴朗一樣食到lam lam脷喎！睇嚟3款都ok啱小朋友胃口呀！ 3款之中，丘比芝麻最正。相比之下，柚子芝麻嘅味道就冇咁濃，但卡路里相對都會低啲。對於想keep fit嘅朋友，我會推介柚子芝麻醬 (購自一田超市) 最初只係green Monday，但由於健康又好味，已經發展到去green weekdays喇！ 吉之島超市有多款沙律菜選擇，價錢由$2x~$4x不等，每包都可以整到3餐㗎！ 沙律材料可以因應個人喜好啦！想食咩就加啲咩落去囉！除咗雞蛋、粟米、紅腰豆，我仲鍾意加菠蘿同埋車厘茄。見其他媽媽朋友仲會加啲雞肉添！雞肉配麻醬，真係諗起已經流晒口水喇！佢哋對精明眼仲犀利，識得去街市買一份份執好晒嘅沙律菜，既新鮮又經濟。以我所知，荃灣楊屋道街市同埋中環街市有檔攤售賣。其他地方就唔清楚，如果大家知道記得要報料喎！食咗沙律午餐後，加上其他餐進食多菜少肉，肚腩細咗，行步路都輕盈咗呀！大家都一齊嚟加入多菜少肉行列啦！加埋適量嘅運動，瘦身效果會更顯著㗎！Keep fit係女仕們終身嘅工作嚟加嘛！共勉之~ 晴朗天 - 食·玩·育·美·愛の親子平台 facebook專頁：https://www.facebook.com/happytrain123 blog：http://blog.xuite.net/chinglongtin/blog