早前喺德望學校聽咗一個有關孩子成長嘅講座，值得同各位家長分享，所以節錄咗部分出嚟。 ========= 「你點樣形容自己嘅小孩?　公主? 港童? 聰明? 孝順? 醒目? 蠱惑?」 無論答案係點，相信各位家長都鍾意見到小朋友成材，好叻，甚至成功，但係點先做得到呢? ` 【建立喜樂的心】 「返到屋企瞓喺梳化度飲嘢打機，好舒服，唔使出力好開心。」 呢種唔係真正嘅快樂，千祈唔好太追求呢種舒適嘅快樂 (sofa-happiness)，因為會麻醉。   家長要話畀小朋友知，需要喜樂。 不過，咩係喜樂？   喜樂比較深層，唔係靠外在嘅物件或事情，係靠內在嘅態度。 ` 認識自己長處 助面對困難 凡事積極樂觀，識得知足、感恩，非常重要，要識得欣賞自己擁有嘅嘢，包括自己嘅長處。 華人家長對於其他人讚自己嘅小朋友，通常會話：「邊係吖」 不過其實家長需要講小朋友嘅長處，要承認，同發揮佢哋嘅長處。 相反，亦都要令小朋友知道自己有咩弱點，慢慢將其弱點改善。   全球趨勢，年青人或者小朋友都好怕困難，一遇到困難，好易應付唔倒，跌到起唔倒身。 但其實真正嘅快樂或者喜樂，係跌到之後，能夠靠自己爬起返身，做得更加好，呢種喜樂，係內在嘅，令自己更有動力向前。   家長可以隨住小朋友長大，帶領佢哋做更多反省，因為了解自己，就可以了解到他人，從而做到接納他人，會去關懷其他人，分享自己所有嘢，就可以得到真正嘅喜樂。 ` 反省自己　接納自己 除此之外，反省可以幫佢哋認識自己，例如自己有咩叻，尤其是幫小朋友揀課外活動嘅時候，畀佢哋講吓、諗吓知唔知道自己鍾意乜嘢。當小朋友知道自己有能力，就會比心機去做。   呢個，係接納自己嘅過程，尤其是我哋好容易同其他人比較，因為如果唔去接納自己，就會問： 「點解人哋得，自己唔得? 」 每個人都唔同，每位小朋友係獨立嘅個體，家長需要令小朋友接納自己做得好，或者唔好嘅事。 ` 【責任　由自理開始】   低年班或者年紀細嘅小朋友，唔需要叫佢哋幫人，但一定要先由自己做起，要有自理能力。 當佢能夠自理得好，儀表乾淨，或者好令人喜歡，就會知道其他人會喜歡佢，佢自己都會快樂。   不過如果外表好污糟邋遢，小朋友會好寂寞，因為其他小朋友會話： 「佢好污糟，唔同佢玩……」 我哋好多時會聽到小朋友咁講，無論家長可以制止咁講，但小朋友童言無忌，就係咁直接，所以當小朋友得到快樂，起碼有一班人同佢玩，佢自己都會做好。   小朋友可以透過參加義務工作去實踐，例如做圖書館館長、班長、助手等，令小朋友明白，幫到手都係好事。   另外，家長亦可以畀適量嘅責任仔女負責，唔好咩都攬晒上身，搞到仔女唔識長大，例如欠交功課，欠帶書本等，就要小朋友自己負責返。 ` 【培養閱讀習慣 靠家長身教】   家長嘅一舉一動，都係小朋友嘅學習對象，對佢哋影響最大。 「每次你喺公事包或手袋拎出嚟嘅，係電話，定係書本？」 「小朋友多數見倒你撳電話，定係有一定時間睇書？」 家長行為會影響小朋友，不過好多時唔睇書嘅家長，都希望小朋友熱愛閱讀。   呢個情況，正等於好多家長坐車時都會手機不離手，睇 Whatsapp 睇報紙。 仔女自己玩手機，家長就叫佢哋唔好玩，但自己又不停撳手機，咁仔女會唔會聽話呢?   現代人都用電話睇資訊，不過想仔女少啲用手機，甚至有閱讀習慣，就要喺佢哋面前以身作則，要自己留意返。 ` 鼓勵以書本作為禮物   唔少家長為小朋友買好多物質，每個月畀好多錢去學習，參加課程，但用咗幾多錢買書? 有次喺希慎誠品，有位約三年班嘅小朋友手上拎住一本書，跟住再拎一本， 問媽媽:「我想買埋呢本。」 媽媽答:「唔買! 你買呢本咪得囉! 」 而媽媽當時手上有7、8袋戰利品，而大家都知道，希慎1-8樓都係百貨公司。   肯花錢買戰利品畀自己，但吝嗇買多一本書本畀小朋友，佢嘅閱讀興趣，就畀呢個堅定語氣扼殺咗。 ` 買衫 vs 買書 各位媽媽，你從來唔會因為衣櫃擺滿晒靚衫，而唔買下一件靚衫。當見倒下一件靚衫，每次都係用堅定語氣話: 「買啦! 擺得落!」 咁就買咗。   買書嘅小朋友又點呢？   呢個唔係錢嘅問題，而係家長有冇為仔女犧牲。 家長要買書畀佢，陪佢一齊讀，關心佢點讀，讀咗乜嘢，畀時間佢講佢想講嘅故事，佢喺書本學到嘅嘢。   除咗買書做禮物之外，周末的家庭活動，有冇包括行書局? 家長會關心小朋友今日喺學校食咗咩，或者買咗咩畀佢哋食，但有冇關心最近佢哋睇咗咩書? 又有冇喺學校借咗書，但冇睇呢?   家長需要為小朋友安排閱讀環境，包括空間及時間表，如果小朋友嘅學習生活日程已經密麻麻，唔會有時間或精神睇書，而升上中學嘅小六學生，需要廣闊嘅視野，不過現時有唔少同學從來唔睇書，唔睇報紙，唔知呢個世界發生緊咩事。   書本係孩子一生最好的領航員，為小朋友建立美好嘅人格，高尚嘅品德。 例如《狐狸與小馬》呢本故事書，係講一隻小狐狸起初唔接受一隻聾咗嘅小馬，因為對方聽唔到，唔可以一齊玩，但最後一頁見到狐狸攬住小馬隻腳，做咗好朋友。   知識可以幫我哋令孩子飛得更高更遠，而教育孩子嘅家長，就好似放風箏咁，希望我哋嘅小風箏翱翔天際，但一切嘅翱翔，都有賴地面嘅爸爸媽媽，傾盡心力。 希望閱讀可以令我哋嘅小風箏飛得更高更遠，有更闊嘅視野。 希望家長可以享受一段短暫、甜蜜嘅放風箏日子。 ========= 【後記】 老師曾引用名人甘地一句說話，我非常認同： 「無論你間學校點樣，或老師幾有學問，永遠都代替唔到屋企同父母。」   而且現時好多學校都好主張閱讀，Par Par讀緊嘅 PN 班都已經有閱書計劃，所以我係時候喺屋企訂立讀書日，一家人每星期圍埋一齊睇書。當小朋友睇書嘅時候，我會攞返一份報紙或雜誌，做返個好榜樣。   另外，我去 shopping 嘅時候，會抽時間同3姊弟一齊去行書局買一本……唔係唔係，買幾本書! 一齊喺屋企閱讀，享受 the secret of joy! ^^     FB: KeicyKK