由孖寶差不多4個月人仔開始，孖媽就要開始回復返working mum的身份。每天早出晚歸, 還記得復工當日我有多麼的不捨，雙眼通紅地和孩子道別之後出門上班去。 平時全靠奶奶同姐姐幫忙照顧Caydan Ramsey。基本上我一放工都係9秒9沖返屋企搵仔s，希望盡量利用晚上孩子訓前僅餘的小小時間去同孖寶相處， 建立出好嘅親子關係，而放假孖爸同我都會親力親為照顧兩兄弟，帶他們外出去看世界。 Caydan 哥哥有個壞習慣好多時都要姐姐抱住先訓，有時比如好似佢跌倒小小，抑或有咩需要安慰時，我每次都會走過去想抱起他來安撫他。但很無奈地他都會推開我，只係要姐姐抱。因為咁孖媽我真係喊過無數咁多次，個種心如刀割的感覺相信只有當媽的先會明白(因為孖爸完全唔明，亦唔理解仲問: 咁你想佢點呀?) ，我真係唔識解釋比佢聽，媽媽咁努力咁辛苦帶你們來到呢個世界，共生共存，無時無刻一起過了我們的34週，偏偏係自己個仔最需要人安慰的時侯佢推開你只要姐姐，個種感覺真係慘過被仔飛。 基本上講到呢度，我通常都會開始聽到各位朋友對我講嘅安慰說話，thank you呀！ 「咁咪好囉，即係你姐姐對你個仔好囉，BB先會like佢唧！」 「如果你個仔見到姐姐喊，你仲驚呀！」 「唔洗唔開心呀！佢大大下就唔會再係咁架，慢慢會知道邊個係媽咪！」 但實不相瞞其實都係撫平唔到孖媽嘅內心，我每次都只係tune自己好阿Q咁去諗孖媽唔開心唔緊要，只要孩子過得開心就可以了。 但我都唔係只會自怨自艾，坐係度咩都唔做的人。唔開心還唔開心，都總要諗辨法盡力去解決嘅啦。我明白係時間上以我目前係working mum黎講絕對係無咩可能多得過姐姐，唯有希望以quality取勝，我放工回來有時都會帶佢地出去行一陣玩一陣，希望佢地知道爸媽先係會帶佢地出去玩的人。而同佢地唱歌同玩個陣都會好投入同好開心，我們堅持星期六/日放假盡量自己搞哂。 孖媽好記得，早一兩個月有一日係打風，多了星期五一日的假期，連續3日和孩子整天黏在一起，到第3日星期日個晚Caydan哥哥係需要安慰的時候竟然係堅持要我抱，而唔去姐姐度。個一刻我真係開心都唔識形容呀。咁亦都係印証咗其實quantity都真係好重要啦。 以家兩兄弟都會嗲人，好多時都會叫「媽咪 媽咪」來幫他們手。真係好喜歡被孩子依賴嘅感覺。 孖媽承認自己是正宗「發仔瘟」無誤！ 還是那一句, 孖媽很愛 很愛 你們！     我和孖寶的Facebook Page: 荔枝與孖寶  我和孖寶的 Instagram IG#: laichimama MamiBuy香港媽咪幫：駐站部落客 Sunday Kiss: Featured Bloggers SuperMami HK：Featured Bloggers Beauty Exchange：Certified Blogger WeShare HK 親子： 推薦博客 ESDlife: 「靚太星級榜」Blogger   If there is any question or you looking for me and the boys,  please feel free to contact LaiChiMaMa via Email: cherrywcchan@gmail.com