踏入24週的大事記，就係去醫院做糖水測試。人家都係24-29週去做，個個腹大便便，就只有我—剛踏入24週就被安排去檢查，原因係早前的抽血報告唔合格被母嬰健康踢咗去醫院（基本上只有健康有異樣的孕媽才會安排去醫院的）。醫院醫生希望我儘快檢查糖尿，如果無事就可以儘快將我移交返比母嬰健康院（感覺自己變咗人球-__-），所以咪咁早囉～ 孕婦糖水測試的主要目的是為了測出因爲懷孕期間荷爾蒙改變、或因懷孕期進食量增致肥胖，導致孕媽胰島素敏感度降低，致身體無法耗盡從食物中吸收的糖分，令血液中的糖分過高。 檢查糖尿病的方法有三種：(一) 空腹抽血，但有啲人係飯後血糖才高的就會測唔到；(二) 飲糖水測試，係最傳統嘅測試，但較麻煩因為要空腹好耐及抽成三支血，一般私家醫生都少做呢個：(三)糖化血色素測試，嚴重貧血或妊娠者不準確。 好喇，講返自己先。 檢查前一晚的00:00起，我就開始禁食，晨早09:00到醫院等候檢查。人都未瞓醒就已經抽走第一支血，幸好姑娘手勢不錯。然後，就過去另一位姑娘度，正式飲糖水喇！第一啖飲完我仲同姑娘講『都幾好飲喎』，姑娘笑住話第一次聽人咁講，並叮嚀我要5分鐘內飲完、同千祈唔好嘔返出黎呀，唔係要下次再黎。大嗱嗱250ml葡萄糖水真係唔講得少，因為真係好甜，越飲喉嚨越辛苦，加上胃空空的，飲完胃酸倒流好辛苦。最慘係咩？係姑娘話飲完糖水係唔可以飲水，只可以漱口！仲等我傻傻地買咗成大支水，建議大家唔洗專登買水，因為結果只會有得睇無得飲….T_T 之後，姑娘會比一張紙你，上面寫明你幾點抽第一支血，幾點飲咗糖水，陣間第二及第三支將會幾點抽，之後叫我返出去坐。呆坐一個小時後，就係抽第二支血，今次姑娘係同一隻手嘅側面抽，嘩！原來痛好多架！所以去到抽第三支時，我即刻要求姑娘抽另一隻手，以免歷史重演。 最後，而家可以做嘅就係默默等待下星期的驗血報告，希望唔好中糖尿啦！ >>>【看更多媽咪的懷孕日記分享】<<< 【Main Blog: https://educatemybaby.com/】 (電郵：nataliepuipui@gmail.com) (Facebook: nataliepuipui) (微博： NatalieUn) (Instagram: @natalie_cyp)