搬咗嚟深水埗住成個星期 終於叫做差唔多執好屋企可以放假去嘆番吓 今日就先嚟呢度叫「添好運點心專門店」嘆番一盅兩件啦！       我晨早一起身就建議話不如去附近呢間點心專門店試吓   但係我知成日都好多人排隊所以就一支箭刷牙洗面就落去拎飛先   未去到門口已經見到好似排隊買新iPhone咁企哂踎哂喺門口     我梗係快快手去門口呀姐面前拎番張飛先   拎到個number係168，飛就叫到158   因為好多都係2個嚟(我要4個位枱)，所以等咗15分鐘度就到我     不過呢度要齊哂人先至俾入去   就算我隔離有個人佢話其他人行緊過嚟都冇面俾   呀姐話「行緊過嚟即係未齊啦」跟住就嗌另一張枱入   冇辦法因為人哋真係唔憂做，見到好多人係一個個Gip拉住入去食   勁做遊客生意，反而Local人佔少數   冇計啦！香港人都唔鍾意排隊，見到咁多人即閃   我同呀姐講話未齊人，可以一陣間齊人再話佢知就有得入   咁我就拎住張點心紙Tick住先(有好多筆喺度唔駛驚冇筆)     雖然佢點心紙有d點心打咗粒星星係側邊   但係打星嗰d點心都唔係Openrice推介嗰d   所以覺得有少少好似會中伏嘅感覺就冇揀到     坐喺度等等吓之際望去門口   原來佢來頭真係好巴閉！   連續幾年米芝蓮指南推介(心諗是咪真係咁勁先)   但係我見佢嘅價錢又唔算好貴喎     其實如果齊人的話同埋早少少應該唔駛等好耐   但係過咗十點半之後就越嚟越多人   差唔多十一點佢哋嚟到啦   我同呀姐講番168號齊人跟住唔駛1分鐘就入得啦     我哋坐咗張四人枱(唔記得影室內環境)   有冷氣，頗懷舊裝修，坐得唔算舒服仲幾迫   呢度茶錢不分年齡位位$2   但係茶冇得揀，唔駛諗住有鐵觀音定水仙   全部一式一樣都係好似茶餐廳你一坐低送嚟個杯食筷茶   不過嘢食上得好快(可能因為人流快卦，所以我估廚房一路做樓面一路出點心)   唔知有意無意首先嚟咗個酥皮焗叉燒包做頭盤   拎上手熱呼呼，外面脆卜卜，裡面叉燒熱辣辣！10分我俾9分！     之後就嚟咗籠蝦餃，合格之作，仲有d鹹！   勝在皮係實正，唔會一夾就爛   蝦都算大大隻，唔會混水摸魚落埋d蝦膠充大粒     呢個豬潤燒賣掂，塊豬潤真係用紹興酒醃過嚟   食入口真係連口都聞到香味，但係下面舊肉就平平冇奇！     輪到呢個古法糯米雞   個個話嚟親都要叫   我專登夾開俾大家睇   如果有食開一定知道食親糯米雞對筷子一夾落去就黐住哂d糯米   但係呢個糯米雞真係食得出新鮮，糯米好爽   裡面唔會好似大家樂咁放隻雞翼喺度咁唔正宗(不過都食慣咗幾好食)   有大大隻冬菇同新鮮雞肉同臘腸！   仲有一個驚喜就係潤腸   雖然唔大條，只係一細楷！但係一食落去就知道唔係揸流撻！   10分我俾滿分！     跟住嚟個鳳爪排骨飯，冇咩特別   純綷Hysan鍾意食所以嗌俾佢食！     仲有個齋腸(拉布腸)   佢係滑，不過好多地方都做到，所以唔算特別！     呀劍評分: 7分   呀劍評語: 好唔好食見人見致，老實講「唔好食」一定唔輪到佢，但係你話佢特別好食又唔見得上，不過以我食糯米雞咁有經驗嚟講真係算唔錯，其他仲有酥皮焗叉燒包同豬潤燒賣好食！ 添好運點心專門店 簡介 地址 深水埗福榮街9-11號地舖 電話 2788 1226 營業時間 星期一至五: 10:00-22:00 星期六至日: 09:00-22:00 招牌菜 古法糯米雞 / 布拉腸粉 / 杞子桂花糕 / 晶瑩鮮蝦餃 / 酥皮焗叉燒包   (以上資料更新至文章當日)     Facebook專頁: 呀劍萬帥 kimfamilytravel   Blog網誌 : kimfamilytravel.blogspot.hk