識玩唔單止要蜎窿蜎罅 仲要識得揀時間去玩 當大家都話天氣麻麻會落雨 我哋就揀呢個時間去一轉大棠荔枝山莊 上一站>>CLICK HERE! 【飲飲食食】元朗 梁記餃子麵坊 今日如常教會主日 完咗簡簡單單食個Lunch 差唔多兩點我哋打的入去大棠荔枝山莊嚟個半日遊 對上嗰次嚟都有3年前喇 http://kimfamilytravel.blogspot.hk/2012/12/tai-tong-organic-ecopark.html 雖然個天有少少暗 但係我估計佢唔會落大雨 同埋會慢慢變番天晴 於是唔理三七廿一 打咗$50的就去到荔枝莊門口 依家個名叫做「大棠有機生態園 」 呢個地方相信好多人都嚟過 因為都好歷史悠久 結果如我所料真係好少人 但係芊芊喺架的士度瞓咗... 我先到售票處買飛 職員介紹有入場券$30及套票$100之分 套票包括4張遊戲券 除了騎馬及腳踏車外要用2張券 其餘活動就只需1張券 3歲或以下可豁免入場費 但係如果佢要玩遊戲都要嚟補番$70遊戲券 其實佢講得太複雜 總之入場費$30(3歲或以下免費) 另外$70係遊戲券 講完 (因為遊戲券唔係跟入場者, 大家可自由使用) 我哋買咗$30 x 3入場券 然後買咗2套$70遊戲券 即有8張遊戲券 入到場內就看見一大荷花池 中間有一個涼亭 感覺好舒服好清靜 因為加上冇咩人 眼見數埋都冇20個人 記得Hysan細個既時侯喺呢度影過一次相 等我影番張對比一下先 Hysan遠處見到個跳充氣床 就嗌住話要玩呢個先 跟住行埋去先知道要2張遊戲券 我同負責職員講2張咁多好似唔係好抵 之後佢話見今日咁少人 一張飛但俾我哋玩耐D 本來玩得5分鐘 但係職員哥哥一路同我吹水 都冇特別要叫番Hysan出嚟 而且人實在太少 所以都冇所謂 最後都差唔多玩咗15分鐘先出番嚟 之後我哋就去交腳踏車啦! 要去番門口附近的小食部 入去小食部隔離個雜物房度揀車 嘩最後俾我哋揀咗架好靚既三級方程式樣既車 跟住就俾咗2張飛小食部姨姨 佢話15分鐘後嚟還車 我哋圍住成個荔枝莊咁踩 懦弱既Hysan去到上斜位又開始係度嘈 要我幫手! 我要佢自己去克服 跟住佢又開始眼濕濕 最後佢真係自己上到之後 就陰陰咀笑 Hysan又藉呢次經歷對自己有信心咗 令佢一陣玩繩網嗰陣仲大膽! 行行吓發現牛牛車又起步 因為他們都係行同一條路的 我就叫Hysan快D行 如果唔係就俾牛趕上撞倒 最後越踩越快, 越踩越順 越踩就越開心! 我追都追唔到啦 其實最後都踩咗差唔多20分鐘 因為少人所以姨姨都冇捉我哋還車 同Hysan玩完之後 就去涼亭度搵番媽咪佢哋 芊芊終於瞓醒喇 因為佢啱啱起身 所以就俾佢餵魚等佢Warm Up吓先 因為廢事喺度買會貴 媽咪頭先喺元朗入嚟之前買咗包大魚糧 Hysan一手拎起魚糧就掉哂落去 唔似得好似芊芊咁 拎喺手度逐粒逐粒掉落去 於是又俾我罰暫停一下 我叫佢餵魚要慢慢餵 觀察吓佢哋係點樣食魚糧 同埋免得佢哋爭得太勢利 同埋我話如果好似佢咁快咁掉哂落去 咁不如成包一次過倒哂落水咪得囉! 我都係第一次見到咁多咁多鯉魚! 之後再行過隔離個遊樂場玩吓 芊芊梗係第一時間要打千秋啦 去到呢個吊橋搖吓搖吓 芊芊話好驚呀... 之後都差唔多4點幾 我哋打探到騎馬到5點就完 所以我哋先過咗去搵馬馬先 仲記得以前Hysan細個嚟既時侯都未夠年齡騎馬 行到指示牌附近 發現以前條吊橋唔見咗... 可能因為安全問題! 嘩好大個木瓜呀! 好多大樹菠蘿呀! Hysan起初話唔肯騎 後來俾我鼓勵多幾次 叫佢諗吓係咪次次話唔敢做既嘢 最後都做得好好 佢自己諗一諗之後就願意去玩喇! 職員哥哥同佢帶上頭盔! 騎埋上隻馬之後真係似模似樣喎 騎馬活動又係要2張飛 (依家總共用咗5張) 之後哥哥就拖住隻馬帶Hysan行咗一個沙圈 職員哥哥話隻馬都有28歲 所以算係老馬 冇哂火氣就適合小朋友騎喇 吓! 咁就行完喇 咁就冇咗兩張飛... 唔好俾佢蝕影多幾張相先 之後職員哥哥就帶番老馬入馬房啦 佢話隻馬由2:00開始做到依家 佢都好攰架啦! 好在我哋趕得切 遲少少都冇得騎 我哋跟埋隻馬入馬房參觀 裡面總共有4隻馬 有啡色又有白色 如果要餵馬 又要一張遊戲券 所以我哋最後冇餵 留番嚟最後去坐牛牛車 番到去繩網陣附近 牛牛車已經坐喺度休息緊 一個人要用1張飛 我哋剩番3張就俾佢哋一齊上去坐吓玩吓啦 師傅會俾我哋影吓相先 唔會咁快開車住 我估隻牛都係好老 我見佢好似中吓中吓好眼瞓咁 好啦開車啦! 同樣好似腳踏車咁 圍住荔枝莊行一個圈 車上面有個鐘 俾小朋友可以搖吓玩吓 搖鐘對隻牛牛應該就冇咩作用 行完一圈 去番起步呢棵大樹就落車喇 飛就用哂喇 時間都差唔多4:30 最後行過去農場嗰邊睇吓動物先 呢度正確嚟講叫做「駝鳥園」 入到嚟第一隻動物居然係孔雀喎 佢身上藍色既羽毛真係好靚 不過想見到佢開屏就真係難D 唔知點解喺孔雀籠隔離瞓咗隻大懶豬喺度 佢冇嘢綁住 又唔喺個籠入邊 一路係咁瞓 當D人冇到 行過孔雀籠之後 就係一個大牧羊場 裡面有好多唔同款既羊 一次過滿足哂你既需要 媽咪話呢隻羊好似鬼仔 真係咩種咩色咩Size都有 牧羊場隔離就見到三隻好似駝鳥咁既動物 但係圍欄貼住張紙 寫住「我不是駝鳥」 好攪笑! 咁究竟佢哋係咩呢? 之後Hysan同芊芊又番埋去個牧羊場度餵羊 我哋冇專登俾錢買草去餵 佢哋就咁執起人哋餵羊跌喺地下既草去餵 芊芊都仲係未敢自己去餵 叫我幫佢餵 我就捉住佢隻手去餵羊羊喇 玩玩吓都5:00 最後離開鴕鳥園出番嚟 俾Hysan再玩繩網陣 (其實頭先已經玩咗1-2次 ^.^) 由頭到尾佢都自己爬上去爬落嚟 其實都真係好高吓 佢都算好大膽! 芊芊又要試吓爬 但係爬咗幾吓就已經叫Daddy 點知簡簡單單行吓地下凸出嚟個位 當平衡木咁玩 已經自得其樂好開心 哥哥玩玩吓仲結識咗新朋友tim 有個大哥哥一路陪住佢 佢上唔到仲伸隻手出嚟扶扶佢 最後玩到5:30我哋就Call的士($50)出番去元朗 呢個半日遊打的來回用咗$100 入場連遊戲套票用咗$230 今日呢個半日遊簡直起爽呀! Photo by CANON 5D Mark III, Len | EF 35mm f/1.4L USM 呀劍評分: 8分 呀劍評語: 好多人都去過的地方，活動不算太種類，地方不算大，但係我欣賞佢有好大個荷花池同涼亭，感覺冇其他同類型農場/俱樂部感覺繁忙，還有繩網陣真係好好玩，值得一讚！ 大棠有機生態園 簡介 本園由1994年創辦至今已成立20周年，為令各位遊人有賓至如歸的感覺，月前我們已進行大規模的復修工程，等待大家蒞臨。在這裡，您可以欣賞湖光山色，盡情吸收空氣中負離子氧氣濃度極高之「天然氧吧」，令您精神為之一振，拋開繁重的工作，既可讓腦袋放鬆一下，亦可親子同樂，必定能令你豁然開朗，樂而忘返。本園的設施包括:荷花池，牛牛車遊山莊，繩網陣，兒童遊樂場，湖心亭。 開放時間: 9:00am-6:00pm 活動項目時間: 10:00am-5:30pm 騎馬時間: 10:00am-12:00pm / 2:00pm-5:30pm (星期一休息,假期除外) 費用 入場費:$30 遊戲套票(4張)連入場券: $100 補買遊戲套票(4張):$70 三歲以下免入場費 地點: 香港新界元朗大棠山道十一號 交通 於元朗大馬路(又新街站)即恆香老婆餅店下車 再沿路步行至千色廣場斜對出的麗都讌客酒樓 轉乘搭 <元朗至大棠> 紅色專線小巴 再沿小路步行約15分鐘便可到達。 電話 生態園: 2470 2201 / 2473 3818 馬房: 2470 3638 有機園: 2470 2027 (以上資料更新至文章當日) >>>【 看更多親子好去處】 <<< Facebook專頁: 呀劍萬帥 kimfamilytravel Blog網誌 : kimfamilytravel.blogspot.hk
