自從上次晴朗爸爸玩過愉景灣Epicland嘅空中漫步之後，一直想搵番類似嘅活動玩，實行向難度挑戰呀！朋友介紹我哋試下Spark Adventure嘅活動，佢玩過話好玩同值回票價。一睇啲相就覺得「係喇！係我哋想要嘅嘢！」。心動不如行動，仲唔馬上報名？跟貼啲，跟住嚟啦喂！ 一大清早嚟到西貢保良局北潭涌營地，各個家庭為嘅就係想親身體驗冒險歷奇嘅一天 教練介紹梗一啲個人防護裝備同器材，保護做好啲，咁就玩都玩得放心啲啦！ 「Hey!! Are you Ready???」我哋準備好喇！ 活動一：泰山飛索裝備好之後，第一個活動係富有挑戰性，亦都係我哋最期待嘅「泰山飛索」。教練正向學員講解基本知識，好快就可以變「飛天紅豬俠」喇！woo~ ho~ 晴朗爸爸做咗白老鼠，大家正合力拉梗佢上去樹上面呀！1~ 2~ 1~ 2~ 用力拉~~~ 上到去樹上面，望番落嚟！你都咪話唔驚呀！樹枝好似咁單簿咁嘅~ 心理壓力都好大㗎！ 第一飛~ 晴朗爸爸飛呀！泰山來也~ 唔駛幾秒，話咁快就已經飛咗落嚟喇！晴朗爸爸話由樹上踏出去雙腳離開樹枝果一刻會驚啲，之後飛梗果陣就好鬼high~ XD 跟住落嚟到朗朗喇！朗朗似乎信心十足咁喎！ 1~ 2~ 1~ 2~ 用力拉~ 小朋友嘅體重同大人差好遠，幾乎一個人之力已足夠拉到佢上去樹上面 在樹上嘅朗朗好似有啲緊張，捉實咗教練隻腳~ @.@ 唔駛驚呀！我哋會為你打氣㗎！加油！ Wow~ ho~ 飛~ 呀呀呀呀！ 可以笑住咁飛落嚟，即係唔驚啦！yeah!!! 晴晴已經預備好喇！但我開始有啲擔心... 呢個仲輕啲，拉上去簡直係不廢吹灰之力啦！ 我真係有啲擔心，唔知晴晴上到去會唔會喊住要落番嚟！/_\ 已經開始聽到晴晴不停問教練嘢，好似唔係太夠膽飛出去咁... 當我行到去遠處位置預備影相嘅時候，晴晴已經「起飛」喇！見佢有勇氣嘗試，真係好開心呀！哥哥同我哋一樣戥晴晴緊張，係咁追住佢嚟跑~ XD 落到嚟面露笑容，仲話想玩多次。原來之前嘅擔心係諗多咗~ @@''' 活動二：泰山爬樹我哋正學習點樣爬樹，大家都好留心聽。目標係爬到去最頂位置然後敲鐘！奸爸爹！ 又係推晴朗爸爸出去做白老鼠嘅時候。XD 爬樹嘅時候需要兼顧右腳踩繩同埋將繩頭推高，不斷循環咁做呢幾個動作，話咁快就可以爬到好高㗎喇！ 朗朗都好努力嘗試，但始終小朋友都係爭少少力，不如改為玩打韆鞦啦！^o^ 晴晴都好享受在樹與樹之間打韆鞦呀！哈哈！ 親身體驗過爬樹之後，可能係入門級關係，感覺冇想像中咁難。切記唔好用牛力，反而慢慢哋，溫柔咁細步踩繩上，冇咁嘥力之餘，仲好快就可以敲鐘添呀！ 第一次爬樹就爬到咁高，都算係咁啦！我已經好滿意喇！yeah!!! 上午活動到此為止，係時候要開餐補充體力。晴朗食飽又去玩，在沙地上都可以玩一大餐，趁機會仲可以親親大自然添！ 下午活動正式開始！教練同小朋友講每個活動完咗之後都可以得到一塊碎片，上午進行咗兩個活動，就可以得到兩塊喇！ 但係究竟碎片有咩嘢用呢？唔知播！收埋佢先啦！ 活動三：猜衣夾每個人都獲派3個衣夾，夾晒響身上。要去同唔同嘅人猜包剪揼，猜贏咗就送一個衣夾畀對方，最多衣夾嘅就係loser。晴朗為求達到目標，唔怕羞主動去搵人猜，好好笑呀！ 最多衣夾嘅爸爸正在受罰，究竟佢嘅表情係開心定係慘叫梗呢？XD 活動四：珠行萬里每人都要負責一條軌道，當個波碌到過嚟嘅時候要做好運送工作，唔好畀佢跌呀！ 大家都緊守崗位，個波碌完自己條軌道就9秒9由最尾跑到去最頭繼續接駁落去，確保個波可以不停咁碌，好緊張刺激呀！ 賽事完成後，又多塊碎片！保存好佢先~ 活動五：筷子接力賽兩個人一組，要用一對筷子將波運過去對面然後番番嚟起點，過程中要保持個波響筷子上，唔好跌呀！gogogo~ 晴朗小心翼翼將波傳送，好考手眼協調同耐心，快慢要適中，唔係就好易失手~ 黃色碎片到手，又儲多一塊，距離目標又近一步喇！ 活動六：三扶手爸爸媽媽雙手變為一張櫈，合力運送小朋友過對面嘅呼拉圈位置 張櫈要整好，小朋友要扶好，一家人要合作好！ 運送小朋友都唔係難事，難在運送完嘅小朋友要企晒響呼拉圈裡面唔准走出嚟。不過估唔到佢哋為求達到目的，都乖乖聽話喎！仲攬到實一實添！XD 班小朋友開始玩到熟晒！連攞碎片嘅姿勢都咁有默契！ 第5塊喇！仲爭兩塊就可以達標！ 活動七：同心運球 爸爸媽媽同小朋友要透過頭貼頭、手貼手、手貼pat pat咁運送個波到對面，再番番來起點 上下齊心，其利斷金。我哋果組好快就完成，獲得勝利！yeah!!! 活動八：信心系列 小朋友首先要為自己和爸爸媽媽設計好獨一無二嘅眼罩，大家都好認真咁喎！ 你睇我唔到！你睇我唔到！ 然後小朋友集合好，聽教練嘅指示做 每個小朋友搵好有利位置之後，爸爸媽媽就開始搜索行動~ 搵咗一陣，發現有啲唔對路... 原來就算幪住晒眼，班小朋友都會覺得我哋睇到佢哋咁。有啲跑到老遠，有啲仲要喱埋咗添！真係大考驗~ XD 今次調番轉由小朋友搵我哋啦！但唔係咁容易㗎！爸爸媽媽會先諗好一種動物叫聲，不停咁叫，直至小朋友搵到自己為止 咩~ 咩咩咩~ 我哋扮梗羊咩咩呀！晴晴好快就搵到我哋喇！ 朗朗用咗一啲時間終於搵到我哋，只靠聽覺嚟搵爸爸媽媽，相信小朋友都係第一次。幾得意！番屋企可以再玩過~ XD 小朋友最興奮就係攞碎片時間喇！ 爭1塊咋！好快就達標！ 活動九：松鼠搬家 兩個人手貼手建成一間松鼠屋，每間屋最多可以住兩隻松鼠咋！ 夾手夾腳，好快就建起幾間松鼠屋，啲松鼠仔都入住好晒喇！ 大家要聽住「松鼠搬家」、「森林大火」...等指令來走動，要夠快，唔係就冇屋住喇！XD 活動十：彩虹傘 好鍾意玩彩虹傘果種熱鬧氣氛，每個人都努力將波拋起。大家都玩得好投入呀！ 最開心係要收埋啲小朋友入彩虹傘入面嘅時候，情緒極度高漲！ 教練突然要小朋友鬥快過來掂個波，成班小朋友衝晒過去，原來目的係趁機可以畀爸爸媽媽收好彩虹傘~ 呢個方法好明智！XDD 最後一塊碎片都攞埋喇！原來仲有最後終極任務㗎！ 將收集好總共7塊碎片砌成一塊7巧板就大功告成！ 任務完成！我哋都過咗精彩刺激嘅一日呀！YEAH!!! 親子「Happy」冒險日內容好豐富呀！除咗有我哋期待嘅飛越森林和泰山爬樹之外，仲有一系列嘅解難挑戰。我最鍾意嘅係「泰山爬樹」，由地面爬到上去敲鐘，自信心同毅力都有所提升，原來我都做得到㗎！而晴朗爸爸就比較鍾意「泰山飛索」，可以挑戰本身對高度嘅恐懼，好有滿足感！之前低估咗晴朗嘅能力，原來佢哋都得喎！唔錯唔錯！好滿意！ 下午嘅親子活動都唔錯呀！能夠拉近親子距離之餘，又可以考考解難能力。仲可以提升親子間嘅互動同信任添！好玩、刺激又有益！真係值回票價喎！最欣賞嘅係教練專業，對小朋友有愛心，而且每團都有限制人數在24-32人之內，確保參加者有足夠體驗機會。我哋下次想試埋佢哋嘅露營同夜觀螢火蟲，一定仲更加刺激難忘啫！ Spark Adventure 燃動歷奇訓練中心查詢電話：61991004網址：http://www.sparkadventurehk.comfacebook：https://www.facebook.com/SparkAdventureTraining