剛剛才post完3月份既芭提雅曼谷親子行, 又咁快出了去玩, 其實都係要多謝陶寶B呢, 因為6月份生日既佢給了我們一個借口去旅行喔 (明明係自己想玩就賴個囝><). 因為短時間連去兩次旅行, 所以都係盡量慳啲, budget有限因此今次就選擇坐廉航Scoot飛新加坡. Day 1 : Scoot 7:00起飛 -> Hotel Check-in -> Maxwell food court(天天海南雞飯) ->天宇旅行社 ->Garden by the bay (water play) -> Supertree Groove燈光表現(19:45) -> Satay By The Bay 7am起飛, 咁即係要天都未光就出發去機場呢, 之前都擔心陶寶B會唔會唔願起身, 點知叫醒佢話去機場搭飛機, 佢9秒9即時彈起, 平時起身返學係咁就好. 廉航沒有包寄倉行李, 但有小朋友同行, 想帶少啲行李都唔得, 所以點都係要加錢將行李寄倉的. 廉航無飛機餐, 所以要食飽飽先上機, 但係原來6am前好又多餐廳都未開, 而營業中既大家樂都係得二款早餐揀, 就係糯米雞及火腿通粉, 無法啦無得揀. Scoot鮮黃色既機身顏色好sharp好醒晨, 等我同飛機影張靚相先. 雖然係廉航, 但登機及起飛時間都好準時, 呢張相出發前要影是常識吧. 飛機睇嚟都好新淨, 因為個窗係用電子調較光暗架, 莎拉都係第一次見(好大鄉里呢). 而機倉內坐位既寬闊度同普通航空公司都差不多, 而係就係無咗部電視機姐, 陶寶B一坐定就問部電視機係邊度?! 同埋開定張檯打算食飛機餐呢?! Sorry呀, 今次搭廉航呀, 所以兩樣嘢都無呀!!! 不過其實有無電視機或有無飛機餐都無所謂啦, 今朝天都未光就起身, 轉頭你就瞓著啦, 果然不出所料, 未take off就已經瞓咗啦. 坐得廉航就一切酒水都要自費, 最後都用咗S$4買咗呢罐好好飲既Honey lemon及S$15買了張5days既sim card. 差不多4小時既機程話咁快就到達熱辣辣既新加坡, 過海關及取行李都非常快, 不槐為全球十大最佳機場排名第一. 一家三口加2大喼行李, 最快最方便就係搭的士直到酒店. 不消30分鐘就到達Ramada Hotel at zhongshan park了, 車費大約S$18, 點解香港既的士可以咁貴架?! Book酒店時做資料搜集都知道新加坡既酒店一啲都唔平, 如果任聖淘沙內既酒店最平都要HK$18xx/晚, 而我地既行程只係需要3晚酒店, 如果住一晚聖淘沙加兩晚市區酒店的話又好麻煩, 所以最後就決定3晚都住市區酒店, 而近牛車水或烏節路一帶既酒店起碼都要HK$12xx/晚, 所以最後就揀了近Novena 地鐵站既Ramada Hotel at zhongshan park, 埋單平均HK$1000/晚, 新加坡嚟講都叫做平架啦. 每次旅行揀酒店最緊要係乾淨企理, 唔好太舊就已經ok, 而Ramada既房間都符合要求, 而房間都未算太細, 起碼開到2個大喼之餘都仲有位行, 合格了吧. 雖然話酒店近Novena地鐵站, 但係如果行去都要差不多15分鐘, 係新加坡日間戶外15分鐘都真係好熱吓, 所以好彩酒店每30分鐘都有shuttle往返地鐵站. 小朋友係新加坡搭地鐵既票價好得意, 如果小朋友身高少於0.9m, 就可以免費乘括地鐵及巴士, 但如果小朋友高於0.9m但同時又7歲以下的話, 同樣可以免費乘括地鐵及巴士(不包括Premium Bus Service 及Night Rider Service), 但就要去申請一張Child concession card http://www.transitlink.com.sg/PSdetail.aspx?ty=art&Id=50#2), 申請方法其實好簡單, 只要帶小朋友既passport去任何一個地鐵站內既票務站(transitLink ticket office)登記就可以, 呢張Child concession card可以一直使用直到小朋友7歲. 另外大人就買了ez-link card, 用法與香港既八達通儲值卡相同, 不過每張card就S$12但內只有S$7可使用價值, 因另有S$5係non-refundable既, 雖然係咁, 但係出入乘搭交通工具(包括sentosa express S$4)用ez-link card係方便好多, 唔使吓吓去排隊買票. 一人一 張Card就出發去食傳說中既天天海南雞飯啦! 天天海南雞飯位於Maxwell food court, 搭地鐵去Chinatown站, 行大約10分鐘就到了. 自從呢個世界出現了自能手機加google map後, 自由行就已經再無難度. 路經五顏六色既Pagoda Street, 影相好靚. 再繼續行就經過牛車水美食街, 不過今天我地既目標係天天喔. 話咁快就到了, 眼前既呢條本地人又有外國遊客又有既人龍就係排緊隊買天天海南雞飯. 雖然佢係咁出名, 但係價錢都係依然大眾化, 一碟雞飯都係S$3.5-$7.7, 連Anthony Bourdain都大讚. 雖然我地2大1細, 但係呢個moment真係好肚餓, 所以就叫咗半隻雞加2個飯. 陶寶B已急不及待一口一口大大吃了, 嘩,,,,真係唔係講笑, 個飯真係好好味, 好似Anthony Bourdain咁講真係淨食個飯都已經好好味了. 而個海南雞既肉又滑又唔肥, 配埋個飯好滋味. 食飽就行返去地鐵站附近既Chinatown Point商場內天宇旅行社買景點門票順便換錢. 沿途一定會經過牛車水出名地標彿牙寺, 雖然唔入寺但都係門口影張相到此一遊. 頭先趕住去食飯, 而家先見到間TinTin Shop, 鍾意TinTin既朋友就唔好錯過呢. 食飽飯成個人醒晒, 開心喔. 路過見到啲磁石貼, 呢位小朋友話要買記念品喎, 自己揀之後俾錢好自豪.
