民以食為天，一講到食，有邊個唔開心㗎！仲記得細個成日跟媽媽去大排檔食早餐，就算火腿炒蛋都炒得好夠鑊氣，好好味㗎！簡直係每天嘅好開始呀！不過而家啲大排檔買少見少喇！聽講有檔成間搬咗上樓，乜你唔知咩？咪妹記大排檔囉！雖然上咗樓，但大排檔風味依然。跟住嚟啦！ 妹記有兩間店，我哋今次試嘅係尖沙咀加拿芬廣場分店~ 響門口見到餐牌上嘅小食同菜式已經流晒口水喇！ 仲有妹記個樣做生招牌添！唔知係咪老闆娘後生嘅樣嚟呢？XD 用菲林筒嚟做廁紙筒，又幾特別喎！夠晒懷舊呀！ 坐低嘆番杯茶先！連水杯都印埋公司名，印像分攞滿分啦！ 大圓木枱、膠櫈、紅膠燈，成個環境都十足十大排檔咁，認真成個檔口搬咗上嚟~ @.@ 牆上貼滿推介菜式，有冇一款啱你口味先？ 唔只牆上，就連玻璃窗嘅空位都唔好嘥，不過咁樣設計仲有氣氛啦！ 「你今日食左x未？」，究竟個x係代表咩呢？XD 乳鴿$68，又畫得幾cute喎！ 去大排檔咁高興梗係要啤啤佢啦！但係響呢度飲啤酒唔係用玻璃杯，係用雪到凍冰冰嘅戰鬥碗，特別顯得豪氣呀！ 飲勝！ 未齊人，先嚟啲餐前小食啦！椒鹽八爪魚咀 - 新鮮炸起脆卜卜，八爪魚咀有口感，好鍾意佢面頭果啲香脆蒜粒，份量同味道都啱啱好呀！ 椒鹽鮮魷 - 炒魷魚好似唔係咁吉利喎！但佢炸到咁香口味美，點忍得口？魷魚爽滑，炸粉酥香，配埋椒鹽，真係食到停唔到口~ 連餐牌都設計得咁有特色。睇下有咩好食先！hoho~ 落完order唔駛一陣啲餸菜已經陸逐上枱，效率好高。見到成枱都係食物，心情特別興奮呀！ 高漲嘅心情，唔好畀佢停！齊人囉！飲勝！ 古法羊腩煲 - 平民聖品！仲好記得以前響街邊凍冰冰咁食熱辣辣嘅羊腩煲，食到暖笠笠嘅情境。雖然已經食唔番果種風味，但邊滾邊食一樣食得好滋味。啲羊冇羶味仲啖啖肉，好入味，冬天必食推介！ 魚香茄子煲 - 茄子煮得夠淋，配埋辣椒、香蔥，香味陣陣撲鼻。熱辣辣香噴噴，少少辣，味道煮得洽到好處。送飯真係一流！ 香麻小雞雞 - 咳咳~ 落order嘅時候我叫唔出口！吞吞吐吐咁...結果侍應問我係咪要「小雞雞」，朋友們都笑了。雞肉嫩滑，少少麻辣，幾惹味又開胃~ 鬼馬油炸鬼 - 有幾鬼馬呀？仲以為係特色嘅炸油炸鬼添！原來係炸到脆卜卜嘅墨魚滑，墨魚好彈牙，點埋甜酸醬咁食，酸酸甜甜+脆口，又一食到停唔到口之作！ 豉椒炒蟶子 - 好夠鑊氣！蟶子肉質爽口，配埋豉椒汁好好味！但失色之處係食到少少唔知係沙定殼碎，如果唔係就very good喇！ 煎蠔餅 - 外層超鬆化，入口即溶化。油香十足但唔覺油膩，不過蛋比蠔更香。唔知係好事定壞事，對於我麻麻地熟蠔嘅人嚟講！好啱口味！^^ 脆皮炸大腸 - 好鍾意食豬大腸，我都知係唔健康㗎喇！但間中食下唔怕！一向好味嘅嘢都係唔多有益㗎啦！炸得好脆，乾身唔油膩。一塊一口，已經數唔到食咗幾多口喇！ 招牌脆皮豬手 - 啲肉好嫩滑，而且皮炸得夠脆，重點係唔油膩，必食之選呀！ 蒜蓉炒豆苗 - 冬天係食豆苗嘅好時候呀！蒜蓉夠多，炒起味道夠濃，而且菜夠滑冇渣。果真正菜！ 「隊」咗三大支清島後想轉下口味，哈爾濱清清哋都幾好飲喎！ 最後加單一味菜乾豬肺燉湯潤一潤佢，燉湯比起一般煲嘅湯更入味，好好飲呀！添多碗丫唔該！ 今晚十一餸、一湯、四大啤酒，簡直係大滿足！要抱住個大肚腩離開妹記。祝大家新一年讚到盆滿砵滿，好事陸逐有來！雞年行好運呀！ 今餐真係勁豐富！雖然已經叫到成枱都係，但仲有好多款想試呀！好似沙嗲肥牛煲、溏心皮蛋、黑椒薯仔炒牛柳粒、蜜桃咕嚕魚、豉油皇炒麵、炸豬手、炒蜆......等等，下次一定要試埋佢。又要度度期擲日重賽喇！呢度上菜快、鑊氣夠、乾淨企理，係相約親友聚會嘅好地方。嚟得呢啲地方服務方面都冇咩要求，但飲湯嘅時候，送湯果位姨姨好好傾，仲同我哋講燉咗好多個鐘，好足料㗎！好回味昔日嘅大排檔風味，雖然唔似得十足十嘅大排檔，但我鍾意佢一年四季都冷氣開放。好欣賞餐廳嘅裝修設計，睇得出佢哋好用心形造大排檔氣氛。We'll be back!!! 妹記大排檔 Mui Kee Cookfood Stall 尖沙咀店：尖沙咀加拿芬道20號加拿芬廣場5樓 電話：2721 2123 旺角店：旺角通菜街1A-1L威達Deli 2商業大廈2樓B舖 電話：2833 6228