我係一個不折不扣的車控, 我認, 所以家姐同細佬都坐過好幾款不同的BB 車, 要買BB 車的媽媽們真係要考慮清楚你想要咩先好去買車 好多時用落先知揀錯車同亞B唔肯車情況 媽媽們可以諗下以問題, 再睇下自己係需要部咩類型車仔 ~你想要部咩用途的車? ~BB或者小朋友幾大? ~重定輕身? ~可唔可以平瞓? ~單定雙手收車? 以上有答案, 你就可以對準目標去揀BB車啦! 其實媽媽們都係想去行街舒服啲, 唔駛抱住亞B, 出生頭2個月, 出親街, 個個都爭住抱, BB車用途係放袋同換下片, 真係用時間係超短, 如果唔係有朋友比車仔, 建議可以等BB 大約3個月時, 帶埋佢地去試車, 避免佐好多媽媽話的, BB唔肯坐情況出現, 仲要唔係試一次, 最好試多幾次, 一田, 千色, AEON 呢啲, 應該大部車款都有DISPLAY, 可以慢慢試岩先買 小朋友大過2個月, 我個人覺得唔需要平瞓車, 我2個都有用枕頭, 所以其實一出世已經唔係平瞓, 如果唔需要平瞓車, 選擇有更多 重定輕身, BB 8個月大前, 我諗媽媽們都係要求要車身重, 因為穩陣啲, 過佐11至12個月大, 因為開始行, 媽媽們可能需要一手抱B, 一手攞車, 呢個時間一定係揀部輕身方便自己 單手定雙手收車, 如果多數有爸爸同行, 可以揀雙手收車, 反之媽媽同BB單對單出街多, 最好揀單手收到車 以上都係大家參考下, 自己想揀邊一邊, 覺得鍾意就 GO FOR IT! 家姐時, 第一部車仔係朋友比, COMBI 的, 呢款單手收到部車摺起, 但收完仲要對摺, 收到上車, 落車都開唔返  後來因為覺得輕身, 自己去買佐部自己覺得好正O既車, 結果同想像中有點出入, 所以以後朋友買車都叫佢考慮清楚先買 呢部COMBI 車顏色設計其實唔太差, 重大約6KG, 開頭我地無諗過輕重問題,可以平瞓, 但無平瞓過, 單手及底籃有野都可以收到車, 可雙向, 但調轉佐頭要時間去了解點推, 因為調佐車杆後, 變佐後輪先可以360度轉, 攞彎位時要控制後輪黎轉, 買時只係諗, 可以向住我都幾好喎 CHICCO 呢部車, 因為大車籃而揀, 婆婆要帶埋家姐去買餸, 又唔可以邊推車邊攞餸, 呢部避震好好, 穩陣, 又裝得多野, 習慣佐用腳幫一幫, 都可以單手收到車 呢部其實唔錯, 坐位闊落全蓬, 穩陣O既車, 都唔會係輕身 到家姐差唔多1歲, APRICA 出佐部2.9KG, 呢部真係好好好用, 我單手抱住家姐, 都可以單手收車, 攞上巴士, 完全無問題, 就算到我陀住細佬, 都一樣好輕鬆 後來因為去完旅行寄倉攪到部車花佐, 而我又CLAIM 到錢, 結果, 我補錢換新車 同樣地換返APRICA, 但呢部係日版, 仲要輕佐0.1KG, 揀佢原因係香港無紫色, 點知一訂完返黎, 出佐港版 P3呢部車我想擁有好耐, 到細佬出世前我平價買佐部2手, 因為我預計只用頭3個月, 呢部車非常穩陣, 重成7KG, 有企位, 係我其中睇中的一點, 但原來要將背位拉到好直先得, 去迪士尼成日, 我就帶呢部車, 等細佬可以瞓得舒服啲 到細佬識坐, 又興起係淘寶買呢部VOVO, 平玩心態, 家姐同細佬都坐得舒服, 又好推, 摺得細, 可以調較至160度斜度, 因為都實正, 所以部車都唔輕, 收車第一下要雙手收推車扶手位, 跟住可以單手收到車, 呢部車係好多人去旅行之選, 貪佢可以放上 OVER HEAD LOCKER, 亦都有媽媽話呢部車開始都要寄倉, 可能係個別航空公司唔同 呢款車我見到出佐改良版, 收車類似COMBI 款, 單手可以收到同摺得細, 媽媽們可以上淘寶望望 到細佬1歲, 可以換返輕身車, 咁樣出街, 可以攞得方便, 而佢地又可以坐下唔駛我地成日抱住 買佐部2手Quinny Yezz, 坐位一幅過, 拆洗都方便, 可單手開收車, 家姐同細佬都坐得舒服, 但椅背無得調低, 瞓著就中中下, 重大約4kg多啲, 岩岩去台灣, 我揹住細佬, 一手拖住家姐, 都可以單手應付到攞住 全球暫時最細的Pockit, 真係摺到好細, 但係BB重身的話, 部車推起就覺得部車唔實正咁, 買呢部車係我想家姐坐少啲, 佢可以調低扶手, 家姐可以幫手推下細佬, 咁樣可以叫佢唔好坐 買時我只見到淘寶有新版可調低椅背款, 但爸爸話唔知係咪國內自行研製, 叫我唔好買, 最後搵佐好耐先比我搵返第二代的車, 原本想買牛仔布色, 但已經斷晒貨, 最終係反斗城比我搵到有粉紅色, 照殺, 男仔坐都好好睇呀! 不過2代就唔可以拆洗, 3代係可以的 以上係我車控的意見, 媽媽們岩用可以參考下, 士的車摺起係細部, 但係其實佢一啲都唔輕身, 部部都4至5KG, 但勝在有D 價格抵, 平用係好好選擇 可以話, 真係帶埋BB們去揀車, 我而家手上得返QUINNY 同POCKIT, 呢2部車, 家姐同細佬試上有5至6次以上, 細佬坐上去唔扭我先買 價格方面, 可以睇岩款, 等各大公司做特價先入貨, 有啲樓上鋪都會提供公價8折的購物優惠, 格下價, 做個精明慳錢媽媽, 希望媽媽們買到岩心水, 岩用, 抵用的BB 車 想睇更多 2A o既相, 可以LIKE  黃家 2A 的快樂日誌 FB 頁 Facebook: https://www.facebook.com/wongaretha 歡迎邀稿試用 E-mail: 2Amamawendy@gmail.com   有關BLOG, 可到以下連結 MyBB Blog: http://www.mybb.com.hk/home.php?mod=space&uid=9473&do=blog&view=me Mamibuy: https://mamibuy.com.hk/home/448/article  生活易WOW: http://wow.esdlife.com/space.php?uid=62614&do=blog&view=me Blogger: http://2amama.blogspot.com/