Day 2 : Vivocity亞坤 -> 入聖陶沙島-> 玩Skyline Luge -> Ports of lost wonders -> Palawan Beach-> Southernmost point of Asia ->Vivocity 無招牌海鮮 昨日由起身出機場到玩完返酒店足足20小時, 所以昨晚個一覺真係瞓得特別舒服呢. 今日既行程就係全日入聖陶沙島大玩特玩, 所以入島前就係Vivocity既亞坤食個早餐. 莎拉都知道香港都有亞坤, 但就從來都未食過, 所以今次嚟到新加坡就食要試吓地道新加坡式既早餐. 亞坤既位置在Vivocity既basement(即係地鐵站出口那一層), 店舖細細但全部都迫滿一檯檯既遊客.  嚟到亞坤當然要食佢最出名既咖椰土司套餐(S$4.5)及咖椰french toast套餐, 收銀姐姐收錢後即場係面前打開隻半熟蛋俾你, 之後跟手就沖咖啡, 其實未食之前對新加坡式既早餐沒有什麼期待, 因為點整都係一隻半熟蛋, 食之前加了少少豉油及少少胡椒粉, 用匙食一啖又真係估唔到好好味, 因為好香濃既蛋味, 加埋個香濃咖啡真係very good.  因為生意太好, 所以個咖椰土司其後先送嚟, 薄薄既土司烤濃濃的配上咖椰醬, 中間夾了住一塊牛油, 一啖咬落去真係又香又脆, 好好味喔.  平時唔會食包既陶寶B, 一件一件不停食, 佢仲加埋杯美祿, 食到飲到唔停口呀.  至於咖椰french toast都好食, 不過咖椰土司既味道係最令莎拉最回味, 返到香港後仲記住果仲味道好想再食翻.  食飽就上4樓出發搭sentosa express啦, 不過因為早上係入島既高峰人潮時間, 所以有條好長既人龍排隊買車票(S$4), 如果有ez-link就可以唔需要排隊, 直接拍卡去入閘, 方便好多呢.  今次嚟新加坡, 莎拉沒有安排去大熱景點Universal Studio, 雖然陶寶B唔駛錢(4歲以下免費), 但研究過陶寶B能夠玩場內既機動遊戲只得1/3, 所以不如搵一啲陶寶B能夠參與既景點玩意吧. 莎拉就安排了玩Skyline Luge(斜坡滑車), 因為應該都幾刺激架.  搭sentosa express去到尾站beach station, 因為Skyline Luge就係siloso beach附近.  話明係斜坡滑車當然要上山上面啦, 而上山既方法就係坐吊車, 呢啲吊車其實同滑雪既吊車都差不多, 所以陶寶B第一次坐時又開心又興奮呢.  坐吊車上山仲可以高高咁望到Sentosa島既景色添.  安全至上, 玩斜坡滑車既就一定要一人一頂頭盔, 今次真係又要威又要戴頭盔.  小朋友戴頭盔點戴都形過大人既! 因為陶寶B未夠6歲所以只可以同大人同車(小朋友同車需要每次另加S$3) 第一次玩斜坡滑車前, 工作人員會教你點樣剎車及控制左右, 所以唔需要擔心唔識玩, 至於賽道就有兩條,  各有各好玩. 好啦, 出發去玩啦, YEAH!!!!  其實呢個斜坡滑車短短由山頂滑到山腰只係大概1分鐘, 但係呢一分鐘都可以玩到好刺激, 陶寶B玩到極之開心, 一到了終點時就急不及待要排隊再玩多次.