近日復考TSA 嘅傳聞甚囂塵上, 反對嘅反對, 害怕嘅害怕, 因為一旦復考, 沒完沒了嘅試題操練噩夢好可能會重臨。   其實TSA 原意係評估全港學生嘅中英數水平, 結果可以為課程設計, 政策制定提供參考數據, 出發點係好, 可惜時移世易, TSA 係執行上已經扭曲左原意。但我今日唔係想講TSA 好壞, 係想講另一個故事。   八、九十年代讀小學嘅香港人, 對學科測驗有冇印象? 學科測驗可以算係TSA 前身, 教育署出題, 考中英數, 但同TSA 嘅最大分別, 係當年做緊小學雞嘅BoxinigDad 同埋成班同學, 一聽到有學科測驗就會好開心, 點解咁奇怪?   每當老師宣佈黎緊有學科測驗時, 通常都會加上一句:「題目由教育署出, 冇範圍。」嘩, 發達喇, 冇範圍即係唔知出乜, 唔知出乜即係冇得溫, 冇得溫即係唔洗溫, 唔洗溫即係放學可以睇電視, Yes! 番屋企阿媽Check 手冊, 雖然寫到明有測驗, 但我振振有詞講教育署出卷冇得溫之後, 阿媽即時俾我「大」走左, 唯有做完功課後俾我睇閃電傳真機, 兩個字: 霸氣!   當年有一位學生, 係學科測驗成績公布之後, 震驚了十四億人! 呢位學生中英數三科測驗總分係…300分, 你冇睇錯我冇打錯, 冇範圍冇得溫, 中英數三份卷都係100 分滿分。   學校想知呢個學生平時係屋企會做D 咩, 點樣溫書, 所以叫左佢嘅家長去學校傾計, 得到嘅答案係:「就係平常咁溫下書, 冇特別做D 咩喎。」   見完家長, 一切回復正常, 學校冇特別對待呢個學生, 個學生亦同其他同學一樣如常番學, 做功課, 做運動, 玩樂, 過左一個平凡但快樂嘅童年, 呢個學生就係我本人。   我有時會幻想, 如果今時今日出現當年嘅情況會點呢? 我會唔會係學校「被栽培」? 要為校增光? 須知而家間間學校都想做名校, 學生中有個天才兒童點解唔趁機會省招牌? 定係我離開校園太耐, 而家呢D 滿分學生已經一街都係, 不值一晒?   無論如何, 見到今日奉行精英主義嘅教育文化, 令我好感激當年冇當我係精英嘅父母、學校。   即LIKE BoxingDad FB 專頁, 同BoxingDad一齊學做老豆! https://www.facebook.com/BoxingDad-910474595721112/