好似我呢類80後香港人, 尤其男仔, 大多數都睇過 <浪漫風暴> 同 <阿虎> 呢類港產打拳電影, 睇完仲會FF 自己就係主角, 無他, 電影裡面嘅拳手通常都係擂台上嘅英雄, 加上身邊一定有個超正嘅女人 (可參考李若彤及常盤貴子), 個package 咁正點抗拒? <浪漫風暴> 李若彤劇照 <阿虎>常盤貴子劇照 現實世界嘅拳手又係點架呢? BoxingDad睇左大台個 <我的志願> , 呢個係崔建邦真人show, 放下你對佢過去一切嘅成見, 你可以睇到一個拳手, 以致任何一個運動員, 佢地嘅生活就只有兩個字:刻苦!   有興趣重溫呢個節目, 可以上番MyTV 睇。 http://mytv.tvb.com/tc/cat_variety/ed_dailytvbvariety/dreaminthering/295256   不論你覺得崔建邦打成點, 佢都係經過好刻苦嘅訓練先可以上擂台, 對意志力係好大考驗, 捱得過, 已經贏左自己。   做男人, 其實唔難, 最緊要「硬淨」。BoxingDad作為一子之父, 當然希望下一代「硬淨」, 將來做一個有承擔嘅男人。運動係一種好好嘅磨練工具, 磨練意志, 體能, 建立團隊精神, 紀律性, 面對逆境, 低潮等等。由細開始有呢種磨練, 將來面對困難同挫折時, 就唔會咁易放棄。所以BoxingDad 將來一定會安排個仔去參加體育活動, 能夠精於至少一項運動更好。   當然運動係男女都可以做, 但幻想下成班男人踢完波, 成身臭汗走入更衣室換衫沖涼, 再赤條條咁高聲談笑頭場波邊個蝦碌, 邊個好波, 再講下沖完涼去邊度食飯, 個種男人獨有嘅浪漫, 不足為外人道呀。