仲有幾日就情人節, 今年第一次以父親身份過, 心情同以往好唔同, 以前拍緊拖, 或者結左婚但未生小朋友時, 都會plan 下點樣同女朋友/老婆過, 可能會book 間好D 嘅餐廳, 買份有心思嘅禮物, 食完飯去一個浪漫嘅地方之類, 但我自出娘胎都未試過係情人節送花, 你可以話我孤寒, 但呢D 都係多年黎我同另一半嘅共識。   今年同太座商量過後一反傳統, 決定情人節係屋企過, 原因今年係Boxing 仔人生第一個情人節, 我地想話佢知乜野係情人節 (雖然佢未必明), 同佢一齊渡過。 如果我地兩公婆出去慶祝, 好可能帶唔到佢出去, 佢就唔知道咩係情人節喇。   某港產片大導演講過:「女人由八歲到八十歲都一樣, 鍾意俾人氹。」, 由拍拖到結婚都係二人世界, 小朋友出左世之後, 可能由於忙於照顧小朋友, 好多時老公都會忘記左對老婆要維持戀愛嘅溫度, 漸漸將以前拍拖嘅野都放低晒, 話題越來越少, 生活越來越枯燥, 所以好多夫婦, 去到大約五十歲, 仔女大晒之後, 又唔係另結新歡, 但無端端話要攪離婚, 因為佢地已經冇左戀愛嘅感覺, 冇俾人氹好耐, 對方只係一個冇感情嘅同屋主。   當然我地已經唔係十八廿二, 好難再好似D 後生咁激情, 但至少, 係呢個咁浪漫嘅節日, 為對方做番少少野, 讓大家重拾一D 戀愛嘅感覺, 我保證, 將來你要去同D 豬朋狗友打牌吹水飲酒, 要放人都鬆手D。   預祝大家有一個甜蜜嘅情人節!