二月份嘅生日會一浪接一浪，今次嚟到焱咲自煮理平板燒概念店為一班2月出世嘅小朋友舉行生日會，場面好熱鬧呀！考考大家，知唔知「焱咲」二字點讀？我識我識！讀「艷」「笑」，查實我都係上網search㗎咋！XD 位於荔枝角一座盡是美食嘅工廈，競爭咁大，點樣可以突圍而出呢？跟貼啲，跟住我哋嚟啦！ 餐廳主打平板燒，每枱都設有電磁爐同抽氣設備~ 開放式廚房外放滿玩具同車車模型，好吸睛喎！ 不過點都唔及呢間兒童遊戲室吸引，不愧為親子餐廳，誠意度攞滿分！ 有孖住瀡嘅滑梯... 波波機... 不同款式嘅馬仔同車車... 仲有玩具櫃添呀！ 由餐廳座位區可以透過大玻璃窗望入去遊戲室，家長望到小朋友玩嘅情況，食都食得放心啲啦！ 好喇！講番我哋個party先！今次有16位壽星仔女都係同年同月出生，靜係禮物陣容都已經夠晒壯觀喇！ 爸爸媽媽們正為生日會作最後準備~ 每位壽星仔女都有屬於自己獨一無二嘅foam board，設計得好靚呀！ 各小朋友召集！預備入去遊戲室玩過痛快囉！情緒十分高漲~ Action!!! 你瀡我又瀡！班小朋友已經non-stop咁不停瀡滑梯喇！XD 鍾意瀡滑梯嘅又點止小朋友丫！連大人都忍唔住要玩埋一份~ XDD 乜真係咁好瀡咩？睇下小朋友瀡到落嚟嘅笑容就知啦！^o^ 晴晴話馬仔都要瀡埋一份，見住啲馬仔we晒落嚟就笑到咔咔聲。哥哥快啲去幫手接住啲馬仔啦！ 好好玩！兩個笑到見牙唔見眼喇！XD 喱埋響呢度自成一角一樣咁開心！ 捐癃捐隙我至叻！hehee~ 最受歡迎都應該非呢部波波機莫屬。每次彈出一大堆波波出嚟嘅時候，就引來全場起哄！ 有啲執波、有啲放波、有啲拋波、有啲仲托埋個兜去接波，總之咩玩法都有齊，玩到勁high呀！ 去到情緒最高漲嘅一刻就係咁嘅樣，呢張簡直係代表作啦！XD 除咗以上設施之外，馬仔、車仔都好搶手㗎！ 大戰過去，遊戲室變得頽門敗瓦。小朋友嘅威力真係唔可以看小~ ^^''' 開餐lu！我哋所揀嘅食物有鹽燒海蝦、香煎雞翼、燒菠蘿、雜錦炒烏冬、海鮮焗飯、肉醬螺絲粉、牛油蜜糖粟米杯、迷你熱狗、炸魚薯條、春卷拼咖哩角、雜錦串燒、一口餃子、雜果沙律同埋椰絲啫喱糖。好豐富呀！ 顧掂班細路，媽媽們都可以四出搵食喇！ 我哋唔客氣喇！~~~ 平時開party多數叫到會，今次有廚房即煮即上，啲食物熱辣辣。好正！有美味嘅食物，梗係開心啦！yeah!!! 食物唔係一次過放晒出嚟！而係不停煮，不停添新款。啫喱糖同雜果就係啱啱擺出嚟㗎喇！ 口乾仲可以到雪櫃攞飲品添！好多選擇呀！ 如果唔夠亦可以自費添嘢飲，好似呢幾支咁可愛嘅兒童香檳$88/支，啱啱尋日先空運抵港㗎咋！ 生日會咁高興，梗係要啤啤佢啦！不過畀得小朋友飲嘅，當然係冇酒精成份嘅啦！ 嘩！我至愛嘅燒菠蘿出爐喇！*o* 餐廳嘅食物以清淡為主，因為佢哋主打係小朋友都可以食得，所以味道唔會太濃。如果大人覺得唔夠味，可以加少少放在枱上嘅調味料。但我又唔覺唔夠味喎！啲食物ok好味，我仲不停添食添！XD 小朋友食飽就梗係繼續玩過啦！生日會活動即將開始，are you READY?? 集體遊戲時間，大家都玩得好投入呀！ 既然咁落力玩遊戲，禮物就人人有份啦！ 到戲肉喇！去到生日會嘅高潮 - 切蛋糕時間。睇下班小朋友幾落力一齊去吹蠟燭~ XD 晴晴5歲大個女。生日快樂！最緊要身體健康呀！ 分享蛋糕時間~ so happy~ 臨走帶埋份生日大禮物回家，拆開好surprise，晴晴樣樣都咁鍾意，仲要攬住bear bear一齊瞓覺添呀！zZz..z.. 焱咲地方唔算好大，但差不多一半空間去咗兒童遊戲室度，店主都好重視兒童嘅快樂指數喎！我哋party套餐係殘廢餐，店員會煮埋畀我哋食，實在太好喇！之前仲擔心又要照顧小朋友，又要自己燒，唔知顧得邊樣添！最欣賞佢哋嘅係即煮即上，食物新鮮熱辣，平時party叫到會梗係冇得比啦！開完party都唔覺個身大油煙味，唔知同佢哋嘅無油燒烤有冇關係呢？不過唯一唔好嘅係booking太full，我哋係半年前book定㗎喇！係咪好誇張呢？相信食物同服務質素好先繼續有咁多捧場客。有機會都想再嚟過呀！下次一於試下自己燒，嘗試動手自煮理嘅新體驗！ 焱咲自煮理平板燒概念店地址：九龍荔枝角長沙灣道883號億利工業中心9樓916室電話：6295 0918facebook：https://www.facebook.com/焱咲自煮理平板燒概念店-香港親子餐廳-761583603967607