「嘔奶」，相信好多新手爸爸媽媽都遇過，我亦都唔例外。   依稀記得小JM第一次嘔奶個陣， 我真係俾小JM嚇左一大跳， 可能係因為「第一次」面對呢種突發情況， 所以真係點啲不知所措，真係又緊張又擔心。   再加上被長輩們既緊張氣氛包圍之下， 對於人奶媽媽既我而言， 當下真係有種莫名既壓力， 所以當長輩們離開房間之後都忍唔住抱住小JM喊左一陣。   相信有唔少新手媽媽們都會面對過同樣既事情， 亦明白箇中既感受。   原來嘔奶既現象係最常發生係初生小B們身上既， 而健康院姑娘都有教媽媽們點樣掃風同處理嘔奶問題， 媽媽們有唔明就請教姑娘了解一下，咁就自然容易處理好多架啦。   嘔奶既成因 其實係因為小B們既食道同胃之間既「幽門」仲未發育成熟而引致既。 小B們食完奶之後，幽門因為會暫時未能夠緊密地關閉， 所以每當小B們飲得太飽、太快、四圍郁或仰睡既時候， 奶就會好容易由胃倒流出來，就會產生「嘔奶」既情況。 但當小B們慢慢長大之後，呢個情況亦會慢慢得到改善。 所以爸爸媽媽們唔駛要太過於擔心同憂慮既。   嘔完奶係咪會餓架？ 長輩們每每聽到小B嘔奶就會擔心小B嘔完奶會肚餓， 會想再次餵小B飲奶，但其實係唔需要既。   其實姑娘都有解釋過小B嘔奶只不過係飲奶飲得太飽或太快， 而引致小B將多餘既空氣吸左入個胃仔度， 所以先會有嘔奶既反應，而唔係因為小B們病左或者有咩唔舒服既。 因此都唔需要急於再餵小B們飲奶， 否則就會有機會造成"過度餵食"（Over feed）， 攪到小B飽得滯，肚仔就會好辛苦架啦。 再者，小B頭幾個月既營養未算太多， 所以嘔少少奶其都唔會對健康有太大影響既。   點樣減少嘔奶既機會？ 1.）    需要檢查奶咀既出口孔大小適中，以確保小B飲奶個陣唔會有太多空氣係奶咀，     減低小B吸入空氣既機會   2.） 盡量唔好等到小B太餓先至餵，因為當小B太快吸啜都有機會吸入空氣架   3.） 如果小B真係唔願意進食既話，唔好強逼進食，以免造成過度餵食   4.） 可以將一餐奶分開兩部份進前，食完一半後，可以先拍嗝，再餵，待完成再拍嗝   5.） 如果發現小B肚脹脹既話，可以用「搓暖」雙手再幫小B按摩肚仔，         以紓緩肚仔內空氣積聚既情況   6.） 小B食奶後若拍嗝未能夠吐氣既話，可以用毛巾或三角枕墊高小B背部，         變成稍稍側卧既睡姿，         有助減少嘔奶之餘亦可減低因仰睡嘔奶而造成既窒息風險。     如果對小B嘔奶或嘔吐情況有擔心既話就可以帶小B見醫生。 另外，因為小B嘔奶時會有機會令嘔吐物流入氣管， 如果小B們嘔奶後持續咳或呼吸急促， 甚至皮膚、嘴唇變藍既話，就要立即到急症室救醫。     點樣為小B拍嗝？ 長輩們曾經分享經驗提到有三種方法可以為小B們拍嗝， 分別有： 1.）讓小B坐起托腮拍嗝 2.）抱直小B趴係肩膀上拍嗝 3.）小B趴轉訓係大腿上拍嗝   而我只係用過其中兩個方法，就係 小B坐起托腮拍嗝 同 抱直小B趴係肩膀上拍嗝。 兩個方法都好用，但最方便、安全就緊係前者啦，因為媽媽可以唔駛企起身， 而且可以清楚見到小B有無嘔奶。  （唔駛整到媽媽一身都係）   小分享：  1.）讓小B坐起托腮拍嗝法     －先安置好小B係大腿，頭仔要向前（即小B面向媽媽既左或右方）     －以紗巾墊住小B領口位，以防拍嗝時嘔奶     －用手輕扶小B下巴及肩膀位置，以固定頭部     －用另一隻手由下而上幫小B拍嗝，而手掌形狀需要呈拱形，慢慢輕拍背部   （附小JM拍嗝醜態） （以下非正確姿勢 （因為側左個頭埋一邊），因為小JM已醉倒。真係失禮）   2.）抱直小B趴係肩膀上拍嗝     －先將紗布巾放係媽媽既肩膀上     －扶穩小B頭及頸，將小B下巴靠係已墊著紗布巾既肩膀上     －媽媽可以一隻手扶住小B Pat Pat     －以另一隻手由下而上幫小B拍嗝（手掌需要呈拱形）慢慢輕拍小B背部   當聽到小B發出 「嗝聲」之後，可以再抱多小B 十五至二十分鐘， 以確保小B 呼吸無問題及無再嘔奶後，就可以將小B放返去床仔架啦。         ♫ ESDlife靚太Club 。 星級榮譽會員 ★sleepyceci  ♬ ♩BK Milk。親子語。駐站Blogger  ★傑。斯與晴  ♪ ♫ Mami Buy香港媽咪幫。駐站Blogger ★傑。斯與晴  ♬ ♩Ohpama。Oh爸媽。駐站Blogger  ★傑。斯與晴  ♪   歡迎追蹤 小JM 既Fanspage 「傑。斯與晴」：   如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯   與   晴 （Jolie Babe。小JM の 成長印記）