同朋友傾湊仔經, 最經常聽到嘅一句說話就係:「我以前咪又係咁!」   咩時候會講呢句野呢? 就係當兩代有某D 價值觀出現矛盾時, 上一代為左維護自己個套價值觀, 就會搬呢句野出黎講。   呢句說話嘅潛台詞就係: 我以前都得, 你而家都應該得, 而如果你唔得, 就代表你比唔上我。而呢種由上一代硬塞俾下一嘅價值觀, 往往係造成兩代矛盾嘅根源。   家母係八十年代開製衣廠, 個個年代做廠絕對係用血汗賺錢, 今時今日, 家母依然時常掛係咀邊嘅一句話就係:「我以前做廠個陣, 怕D 工人唔聽話, 日日都擔心起唔切貨, 經常通宵加班, 月尾又要搵錢出糧俾工人, 又要湊住你地兩個, 個種辛苦同你地而家冇得比啦, 你地而家有幾辛苦姐?」 當然我明白家母後生時係好辛苦, 但呢D 說話只係代表佢唔明白我地呢一代嘅處境, 有次我為左令佢明白呢個道理, 我講左以下一番說話:   「阿婆以前係大陸, 經歷過日本侵華, 又經歷過大饑荒, 文化大革命, 生於呢個時代嘅人隨時命都冇, 如果阿婆同你講: 你做廠有幾辛苦?大不了蝕錢, 再嚴重D 就係盤生意倒閉, 然後去打工, 最壞結果都唔係死, 你話辛苦邊夠我辛苦? 咁你又覺得係咪唔應該呻辛苦呢?」 上一代生活可能比新一代艱苦D, 所以我地一下代都可能過得比我地好, 但原因只係社會確實係不斷進步緊。 講「我以前咪又係咁!」嘅人, 又肯唔肯定自己可以過得番以前咁嘅生活? 就算可以, 又有冇咁嘅必要? 聽呢句話嘅人, 佢無可能體驗番上一代有幾叻幾勁, 所以講呢句話嘅唯一結果, 就係令下一代覺得上一代唔明白自己, 因而加深世代矛盾, 甚至衝突。   與其成日同下一代講自己以前係點, 不如花多D 時間了解下佢地而家係點, 以前個D, 咪同番以前D 人講囉。