傳聞中的隱世童話小屋，2017第一日終於有機會上到嚟吸一吸仙氣！點知發現小屋原來只不過... 話說新一年新一天好想行山作為我哋今年第一個景點，諗嚟諗去想搵個易行D短D又近巿區行完落嚟可以即刻嘆番個Tea嘅山行 最後就諗起行灣仔峽道上去會一會「隱世童話小屋」同埋「警察博物館」 我哋由灣仔峽道開始起步，越行就越斜！只係行咗幾步芊芊就開始話好辛苦... 嚇死我唔係咁快想我抱卦！ 好在佢冇...我諗佢都係俾即時反應我話我知行斜路好辛苦啫，因為我同佢嚟之前講好咗，點辛苦都唔準抱！ 雖然有D斜，但係見到咁好天越行就越起勁！我在路邊執起D樹枝同樹葉，芊芊就成個精神哂，邊行邊搵吓有冇其他樹葉樹枝 大約行咗10分鐘見到馬路啦，但係未行完！只係到咗堅尼地道，過去對面馬路樓梯繼續直上 上到另一段灣仔峽道更加辛苦，幾乎45度咁斜！ 芊芊拎住支樹枝當拐杖繼續努力向上 呢度曙光好有希望呀，令我繼續享受同呀囡嘅呢段時間！呢一刻心裡只係想「如果唔駛番工幾咁好」 因為真係太斜，所以行到中途會發現有D小休憩區 差唔多行到尾聲啦，見到有個雨水排放隧道，又可以乘機教下小朋友常識啦！ 我拎住個環保袋，執執下一袋都係樹葉同樹枝，佢就輕鬆啦只係拎住兩條樹枝咁大把(唔好唔記得我仲手拎住部單反) 其實唔係真係斜到咁，我只係影得誇張咗...哈哈 呢張先至真...但係都真係幾斜囉 終於到......一段啦又，我哋仲未上到去隱世小屋，呢度只係寶雲道同灣仔峽道交界 其實寶雲道健身徑都好啱一家大細嚟行㗎，我下次等埋老婆同哥哥一於過嚟呢度再行吓睇埋「恩緣石」 呢度原來有個小公園仔同埋公廁，大家如果想抖抖可以喺呢度歇一歇 仲有小橋流水都幾舒服㗎喎！ 嘩呢張相呀囡成個少女咁嘅 仲有部飲水機喺度，真係唔怕唔夠水！ 影多幾張靚相又再準備出發繼續上啦 呢個位望番落去就係頭先嗰個雨水排放隧道，如果夏天的話應該都有個小瀑布睇吓！ 我哋繼續出發啦，呢度又可以叫做「灣仔自然徑」 沿路見到呢揀豪宅Opus，真係好有型！我諗呢一世都冇機會住得到㗎啦...但係可以同佢哋一樣享受到呢度行山樂 芊芊開始冇力喇...頂住呀，我仲攰呀大佬 最後一個髮夾彎 一路行有陣時都會發現D得意嘢，唔知係乜東東嚟㗎呢？ 再行埋呢一小段就到㗎！ 最後嚟到荷蘭徑，個路牌上面仲有個小風車喺度，好卡娃耳呢！ 再行多兩分鐘就上到嚟山頂道啦，整個行程大概用咗50分鐘(未計停留小公園的時間) 行過對面馬路就見到警隊博物館個大招牌(記住過馬路要小心D，都好多車經過) 再行入去就見灣仔峽道遊樂場 好嘢！終於俾我哋見到呢個隱世童話小屋啦 但係估唔到佢原來只係一塊大木板！就好似睇舞台劇搭出嚟嗰D佈景板 不過一場嚟到都影番幾張靚相先啦！ 呢個灣仔峽遊樂場都同一般的差唔多 不過最特別的係有個小賣部，大家行到上嚟都可以喺度補給一下(當然揸車上嚟另計) 唔單止燒賣魚蛋，就連玩嘅都好齊全！唔知平日佢會唔會開檔㗎呢？ 沿住斜路走上嚟過條小馬路去對面就會見到另一個遊樂場「甘道兒童遊樂場」 其實我都唔知點解呢度平日唔多人嘅地方都要整兩個遊樂場喺度，不過今日假日又真係幾多人唔夠玩 我哋買咗魚蛋燒賣上嚟邊玩邊食，$10五粒都唔算貴 呢個芊芊我一路想影佢，佢就一路走避開我 呢張相我捕咗幾次先偷影到，最父母最開心都莫過於見到小朋友呢個笑容！ 繼續同我相機玩捉依因 呢個妹冇咩叻最叻係玩嗰陣大膽！ 玩到咁上下，同佢行去警察博物館，起初我都搵唔到邊度係入口，原來就係遊樂場後面的停車場，有個大大嘅招牌，隔離條樓梯行上去就係喇 樓梯行大概3分鐘就見到博物館，不過博物館內係嚴禁攝影，所以我只有同芊芊周圍行行就出番嚟(大家可以上番官網睇相)，最緊要去入面洗手間，因為比較乾淨！ 館外有個簡單小模型同埋一支大炮可以影吓相 芊芊小姐請問呢個係咩姿勢呢？ 最後我哋落番去遊樂場逛逛，同童話小屋講聲拜拜就走了，我哋搭番15號巴士落山 Photo by CANON 5D Mark IV, Len | EF 24-70mm f2.8L II USM 想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2 呀劍評分: 10分 呀劍評語: 新年行行山，人又精神D又係一個新開始，童話小屋係有少少攪笑，不過當係景點影吓相又無妨，警察博物館都係值得去參觀㗎！ 警察博物館 簡介 警隊博物館的前身是1964年成立的「警察歷史紀錄委員會」。該委員會搜集了不少與警隊歷史有關的文物，並建議建立一所博物館展出這藏品。警隊博物館於1976年成立，原址位於警察總部，但規模不大，其後遷往灣仔大生商業大廈，再於1988年遷至現址。 地址 香港山頂甘道27號 開放時間 星期三至星期日：上午九時至下午五時 星期二：下午二時至下午五時 休館日：逢星期一、星期二上午、公眾假期及農曆新年初一至初三 (團體參觀請先致電本館預約時間) 免費入場 交通 乘坐新巴第15號巴士(交易廣場往山頂方向) ，至灣仔峽道站下車。 查詢電話 2849 7019 (以上資料更新至文章當日) Facebook專頁: 呀劍萬帥 kimfamilytravel Blog網誌 : kimfamilytravel.blogspot.hk
