正所謂「民以食為天」，一講到食，有邊個會唔開心㗎？飲飲食食係生活好重要嘅一部份。但係大家又對飲食文化了解有幾多？我哋就唔多喇！不如一齊去博物館長知識啦！ 稻鄉飲食文化博物館位於火炭，大紅燈籠高高掛，再行前少少果座幾層高嘅大廈就係喇！ 地下果層係稻香酒樓，而博物館就響上一層，跟住嚟啦！ 六十年代嘅打粉桶，朗朗好似玩梗賽車咁款喎！XD 樓梯間擺放咗好多古色古香嘅餐具同裝飾~ 好似呢啲木碗同埋木匙羮~ 仲有木造嘅酒壼，就好似番咗去古代咁呀！ 事不延遲，我哋入去睇下囉！gogogo~ 斬料，斬料，斬大舊叉燒！客官想要肥嘅定半肥瘦呀？ 小販檔係香港特有嘅飲食文化，50至70年代最盛行。你又幫襯過邊啲檔口呢？ 我幫襯過串燒、咖喱魚蛋、牛什、腸粉....大家最熟悉嘅應該係雞蛋仔喇！ 燒味真係人見人愛，無論香港人定外國人，總係會難以抵擋叉燒嘅誘惑~ 現今啲扒房已經買少見少喇！每次去幫襯一啲所剩無幾嘅扒房時，總會感覺好似穿越咗時空，回到過去，好懷舊呀！ 一於試下做小販啦！埋嚟睇埋嚟揀，好靚嘅牛什同雞蛋仔喇喂！~  「我要5蚊牛什丫唔該！」 「嚟嚟嚟！好嘅！好快得喇！」 嘩！大件夾抵食喎！XD 食完咸就梗係想食番啲甜嘢，雞蛋仔幾錢呀？要埋格格餅添丫！唔該！^^ 通過隨意門，遙身一變就去到傳統中式酒樓嘆茶嘆點心。大包整番兩籠先~ 痰罐係舊式茶樓不可或缺嘅物品，而家諗番起都覺得幾唔衞生㗎喎！^^''' 各式各樣嘅傳統酒樓擺設，每件手工都好精緻，當係藝術品咁欣賞都唔錯！ 唔同時代所用嘅茶壼茶杯，嘆茶嘅衝動油然而生~ 仲有麻雀枱都好重要，相信呢款已經絕跡喇！而家啲酒樓已經陸逐採用電動式麻雀枱啦！ 以前啲人結婚擺酒都清一色用呢款backdrop，其實睇番都幾有氣勢、幾靚㗎喎！ 設宴招呼親朋好友，當然要用上等嘅食材啦！好豐富呀！ 水仙、壽眉、潽洱、香片一應俱全，想嘆咩茶呢？隔離嘅龍鳳立體浮雕係傳統酒樓嘅標記，栩栩如生。唔好話老土，其實都幾欣賞以前啲人嘅設計㗎！ 古時用嚟磨稻米嘅機器，點樣操作就唔識喇！不過一向古裝片至會見到嘅嘢，而家活現眼前，真係大開眼界呀！ 不同種類嘅香料，大家比較熟悉嘅應該係胡椒、肉桂、豆蔻同小茴香喇！ 館內設有介紹稻米嘅互動資料，稻米係中華飲食之中最重要嘅部份呀！ 學下啲村姑用古代鑊器炒餸先~ XD 仲有好多唔同時代、唔同用途嘅用具呀！ 刨冰機(左)同榨汁機(右)，如果立即可以榨番杯鮮橙汁你話幾好呢？ 展示嘅物品真係好多，而我對於餅模最有興趣~ 見到唔同形狀嘅餅模，就好自然會聯想到新鮮出爐嘅月餅或水晶糕，真係諗起都流晒口水喇！ 晴晴對於唔同嘅廚具都好有興趣喎！ 仲好努力嘗試操作呢部榨蔗汁機添！不過唔駛人去操作㗎！係以動物拖行嘅力嚟帶動下層齒輪轉動，咁蔗汁就會榨到出嚟㗎喇！ 今晚姨媽姑姐設宴，我哋入去嘆番餐囉！不過預備咗人情未先？XD 港島區唯一一間未經過搬遷嘅傳統中式酒樓 - 龍門大酒樓屹立灣仔已經60年。於2009年結業前席，莚開37席「龍門夜宴」，同近400名食客宴別。可以想像到當晚嘅熱鬧盛況，無論係伙記定食客都一定好唔捨得喇！ 走廊掛咗一啲同飲食有關嘅畫同poster畀我哋慢慢細味欣賞~ 全部都係稻香集團推出過嘅宣傳poster嚟呀！ 「壹蚊雞」呢幅我都有啲印象，為慶祝服務廿載，1蚊就可以食到1隻雞喇！ 臨走響lift口見到晴晴至愛嘅蛋撻，不過咁大個點食得晒呀？XD 館內不同位置設有印章機，晴朗好雀躍去打印，離開前都可以儲齊晒。好叻呀！Yeah!!! 咩話？睇唔到啲印？細心啲睇下啦！係冇顏色嘅浮水印嚟呀！ 參觀完博物館之後，不但對各地飲食文化認識多咗，仲可以模擬一下充當小販嘅樂趣。又好玩又學到嘢，好值得帶小朋友嚟睇下呀！睇完再過埋酒樓嘆下午茶咁就very good喇！ 稻鄉飲食文化博物館 開放時間：9:30~12:30及14:30~17:30 星期一(公眾假期除外)、農曆年初一至初三休息 公眾導賞團(粵語)只在星期六、日及公眾假期提供(需預約) 地址：新界沙田火炭坳背灣街13號1樓 電話：3989 7000 網址：http://www.taoheung.com.hk/tc/museum/introduction/index.html