最近剛好有幾位新任媽媽朋友， 咁岩傾開有關「新生嬰兒黃疸病」既問題， 勾我左舊年小JM剛剛出世時因為「新生嬰兒黃疸病」問題而需要照燈既回憶， 當下真係令我又擔心又緊張， 真係攪到媽媽我半夜都喊餐飽。   雖然小JM只係留左院半日去照燈， 但已經足夠令媽媽我折騰左一整日， 而家諗返起都覺得心驚驚， 所以「新生嬰兒黃疸病」既問題真係對新手媽媽們既一大驚嚇！   咩係「新生嬰兒黃疸病」？ 「新生嬰兒黃疸病」最容易出現係初生既小B身上，而且亦都係好普遍既。   而「新生嬰兒黃疸病」係指一種會導致皮膚、身體組織和體液變黃既疾病。 呢個病會令小B皮膚或眼白部位變成黃黃地既顔色。 原因係因為小B既膽紅素係血液入面堆積而造成既， 膽紅素係一種會隨著紅血球分解而釋放進入血液既色素， 簡單而言，即係膽紅素過高就會引致「新生嬰兒黃疸病」架啦。   而呢一種既黃疸大部份都會隨住小B慢慢長大而減退既， 健康院姑娘話呢啲又叫「生理性黃疸」， 所以叫媽媽都唔駛太擔心， 只要按時返健康院覆診、檢查黃疸指數就可以啦。     「黃疸」會有咩徵狀？ 當小B有黃疸既時候，大多數會出現以下幾項徵狀： 1.）活動力下降，會成日想訓覺 2.）會胃口下降，食奶都會想訓 3.）小便次數不足（即唔夠濕片） 4.）皮膚同眼白會稍黃   因為「生理性黃疸」多數會出現係小B出世後既數天， 所以當小B一出世既時候未必會即時發現到。 而健康院姑娘會建議俾小B飲足夠既奶量， 無論係母乳或奶粉，因為都會有助避免降低小B脫水既機會， 而且對小B退黃亦有一定幫助。 同時，姑娘亦再三同媽媽們講唔需要太擔心， 只要小B有足夠既濕片 （每日約為數六條或以上）， 食得、訓得、bubu得就自然好快退黃架啦。   因為我係全母乳， 所以姑娘亦有同我提過可能會因為咁而比餵奶粉退黃退得慢少少， 但只要小B體重有增長，夠濕片就無問題， 可以繼續以母乳餵哺小B。   如有需要小B會被轉介入院接受檢查和治療，例如照燈。 照燈同其他治療方法一樣亦有可能產生副作用， 所以如果膽紅素並無急升既話小B就唔需要照燈。   而小JM個次之所以要照燈， 都係因為連續三次黃指數高， 但好彩明顯小JM係有增磅， 所以黃疸並唔嚴重。 （只係過左十度、十度、十度咋  就要同小JM分開一晚）   就係因為黃疸指數高過標準十度， 所以而且住院半日，要第二日先接得小JM出院。 個晚對媽媽我來講可以話係一個十分漫長既一晚， 心入面不停諗起小JM係燈箱入面照燈個樣。 真係令媽媽好心痛。 還好當時爸爸即刻請左半日假陪我不停來回院醫， 亦好感謝當下爸爸既支持、體諒同安慰。   小JM照燈時既豬樣 （媽媽到而家見到都仲會好心痛） ＊小B係燈箱照燈個陣係要戴一個專用眼罩來保護眼晴架＊       黃疸冷知識：  曾經有長輩們話小B如果黃既話就帶小B去曬太陽就可以， 我亦都就呢個做法而問過醫生同健康院姑娘， 而得到既答案係：  「曬太陽係唔可以有效地治療黃疸，    相反更有可能導致嬰兒既皮膚灼傷或眼睛受損。」 因此我亦無再跟從長輩既話俾小B曬太陽， 寧願俾小B食多啲，訓多啲。   ＊曬太陽對孕媽媽來講係可以吸收維他命架＊       ♫ ESDlife靚太Club 。 星級榮譽會員 ★sleepyceci  ♬ ♩BK Milk。親子語。駐站Blogger  ★傑。斯與晴  ♪ ♫ Mami Buy香港媽咪幫。駐站Blogger ★傑。斯與晴  ♬ ♩Ohpama。Oh爸媽。駐站Blogger  ★傑。斯與晴  ♪   歡迎追蹤 小JM 既Fanspage 「傑。斯與晴」：   如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯   與   晴 （Jolie Babe。小JM の 成長印記）