又食放題？冇錯呀！上次去完大井町之後，食日式放題食到上咗癮丫嘛！今次就試下大獲好評嘅「瀛喜」。呢間啲嘢又得唔得？跟貼啲，跟住我哋嚟啦！ 瀛喜位於荃灣嘅荃好景大厦2樓全層，唔知係咪身處舊樓嘅關係，一路行樓梯上去有啲鬼秘嘅感覺~ XD 進入店內，燈光昏暗，環境都幾啱情侶撐枱腳。不過今次嚟係幫好友慶生日，拆餐勁呀！唔好意思！飛甩咗晴朗爸爸添！XD 事不延遲，睇下有咩嘢食先！刺身、壽司、炸物...等等，一應俱全。呢度仲有免費wifi提供添喎！ 落完單，出去貢下，睇下自助區有咩選擇~ 有多款飲品... 多到一個雪櫃都放唔晒。咦！仲見到有我鍾意嘅道地果茶添喎！ 我試咗蜜桃、檸檬同荔枝味，全部都啱我口味呀！ 唔想飲罐裝飲品嘅話，可以選擇餐廳嘅熱菜蜜~ 甜品就有芝麻糊... 同埋各式各樣嘅糕點~ 雪糕有牛奶公司四款口味。芝麻味最正呀！ 仲有雪米糍同多款雪條添！好似成個超市甜品櫃搬咗過嚟咁~ XD 食物好快就上晒枱喇！同大家逐一介紹先下啦！ 嚟得呢度，梗係要試下佢哋主打嘅磯燒海鮮，唔食過點稱得上嚟過瀛喜呀？ 磯燒海鮮：order咗海鮮之後，就會有個爐畀你燒食物㗎喇！ 燒扇貝 燒蠔 沙律/小食：芒果蟹籽沙律 柚子霜燒吞拿魚沙律 味付螺肉、芝麻八爪魚 泰式生蝦 溫泉玉子 刺身：三文魚、吞拿魚、大頭甜蝦、深海鱸魚、油甘魚、希靈魚、八爪魚、鮑片、馬刀貝、榮螺片，餐牌有嘅都畀我哋叫晒喇！XD 壽司：黑松露三文魚壽司、北海道辣汁帶子壽司 醬燒三文魚壽司、原條穴子壽司 燒焗：芝士蛋黃醬焗蠔 北海道芝士焗帆立貝 天婦羅：海蝦、紫心蕃薯同埋南瓜天婦羅 炸物：吉列蝦、芝麻雞翼、榴槤炸彈 榴槤炸彈爆漿勁好味呀！ 甜品：自助區嘅甜品 款款細細件，啱晒！可以試多幾款喇！ 食咗一round已經好飽，我哋要抱住個大肚腩走喇！YEAH!!! 遺憾嘅係試唔到原板海膽，要4位或以上先有，仲要1日前預訂呀！ 最後，畀埋餐牌大家過目啦！(可按圖放大) 瀛喜嘅食物質素唔錯，我最鍾意佢哋嘅燒扇貝、焗蠔、焗帆立貝同埋榴槤炸彈。可以即場自己燒海鮮嚟食，扮下廚師又幾過癮喎！不過要將個爐放遠少少，因為見隔離枱隻蠔燒到「卜」一聲，飛彈咗啲嘢出嚟。驚驚呀！今餐真係大滿足！日式放題嚟講，呢度款唔算多，但已經足夠塞飽我哋個肚喇！如果未試過即場磯燒海鮮嘅朋友，不仿嚟試試啦！ 瀛喜日本料理 Double Happiness Japan Restaurant收費：(可按圖放大) 地址：荃灣海霸街83-93號荃好景大厦2樓全層電話：3564 8051, 3564 8052facebook: https://www.facebook.com/doublehappinesshk