喬B快要4歲啦 成日諗返當日佢搶閘出世真係嚇餐死 (一踏入32週掉左頭就穿水) 半夜穿水老公又唔係香港,即刻打比2老 拿拿林車我去醫院,途中已經打電話去產房 所以一上到去產房開門已經好多人迎接 做完檢查,由於未有其他生得既跡象 所以要留院醫生話要訓床直到足夠週數 點知到第2朝快速地所有野見紅陣痛一次過黎晒 拿拿林打電話比媽咪, 不過快到佢地出到黎既時候我就已經生完 好感恩喬B好鍚我呢個媽咪唔洗我咁辛苦. 姑娘好好人,知道仲未有人黎到主動問我有無執到手提落黎 幫我影喬B比屋企人睇,因為喬b太細同早產 所以要快速入保溫箱同去嬰兒ICU特別照顧 (說實話我第一次見初生b,當下我完全唔知喬b有任何問題) 直到第2日我身體好d落到床先過去睇佢 一見到心都離埋,我都真係忍唔住問姑娘呢個真係我個B? 胸骨未成型,未可以自行呼吸要靠機器 真係樣都睇唔到,見到好心痛. 都因為見到佢咁我好努力咁按胸希望快D上奶 一有就拎過去,唔夠飲就拎黎做口腔護理. 希望佢快D長大. 幸運地喬B係醫院住左一個月就可以出院 QEH出院要求無其他醫院咁高,只要佢發展良好就可以 唔洗好似有d醫院咁到達一定既磅數先走得 所以佢一個月都係得4磅左右. 雖然呢個月好漫長,我都無休息過, 日日都出去陪佢同拎奶奶比佢 但好多謝QEH d姑娘真係好好 係病房望喬B既期間,佢地過黎教識左我好多野. 等我出院返到屋企識得點照顧喬B. 所以今次我再選擇返係QEH生妹妹, 佢地都因為第一胎早產,今胎check得好嚴格 完全唔洗出去睇私家.