好快就到復活節喇！除咗到處都熱賣復活蛋外，各大小商場都會有不同佈置，好有節日氣氛！最開心就當然係一連幾天嘅假期啦！除咗朱古力復活蛋之外，其實可以花少少心思，創作復活節杯子蛋糕。我哋最近參加咗Baby Kingdom舉辦嘅「親子快樂復活節 Cupcake D.I.Y.」活動。不但好玩又好味，仲學識咗翻糖技巧添！一齊睇下當日盛況啦！ 到達會場嘅時候，嚇咗一跳呀！原來有咁多家庭參與，未試過響咁大地方學整嘢食㗎！好期待！ 我哋將會整兩款cupcake，一款有雞仔，另一款就只得個兔pat pat，好可愛呀！唔知我哋又整唔整得到咁靚呢？hehee~ 事不延遲，來自Twinkle Baker Decor嘅導師開始教我哋點整喇！無論大人定小朋友都好專心喎！抵讚！ 枱面上已經放咗預先整好嘅cupcake同埋材料，馬上動手囉！ 首先就整咗白兔pat pat先啦！將白色糖膏分開兩份~ 再將其中一份分成一大一小，一個搓圓形，按扁少少製作兔pat pat。另一細份就碌扁佢，用來整兔腳板~ 用模具吸出4隻小腳板~ 話咁快搞掂！hehee~ 擠少少糖水(糖霜+水)響兔pat pat中間，再落少少白色珠珠上去，兔尾巴就會變得好突出，好靚㗎喇！ 跟住就要用模具吸出粉紅色嘅腳枕喇！ 在小腳板上擠少少糖水，再貼上腳枕~ 兔pat pat就ok喇！但啲腳板仲未好似樣喎！ 咁就似晒喇！^^ 接住落嚟，要整雞仔喇！將黃色糖膏搓成圓形，用嚟整雞仔嘅身體~ 導師預先已經為我哋準備好用糖膏整嘅蛋殼，擠少少糖水落去~ 將身體部份貼落去蛋殼度~ (咁快就想放入口食？未食得住㗎！) 用橙色糖膏搓成細小嘅三角形，貼在雞仔身體部份，雞仔有嘴喇！但好似仲爭咁啲嘢咁喎！ 貼埋兩隻小眼睛~ 雞仔同埋兔pat pat都完成喇！Yeah!!! 整完主角，就到整配角。在導師預先準備好嘅小花上放上珠珠做花芯~ 在cupcake上擠上butter cream做綠草。好好玩呀！ 放上唔同顏色嘅珠珠做點綴~ 將兔pat pat放上去~ 兔仔cupcake完成！ 再放埋雞仔上去~ 雞仔cupcake都完成喇！ 全部工序都可以自己動手做，好有滿足感呀！ 係咪好靚呢？真係唔敢相信係我哋整㗎！*o* 但好快就唔見咗一個，大家找找呢幅相嘅亮點~ ^^''' 既然係咁，我都唔客氣喇！食番個先~ umm...自己整嘅cupcake真係特別好味呀！一於留兩個帶番屋企請朗朗同晴朗爸爸食啦！ 晴晴小廚師好滿意今次活動，仲又食又拎添呀！~ XD 番到屋企，又食過...仲邊吃邊教哥哥cupcake係點整嘅添！有機會，我哋都想響屋企再整過呀！ 如果大家都有興趣趁住復活節假期創作節日cupcake，不仿參照由Twinkle提供嘅食譜： (可按圖放大) 小朋友愛甜食，其實女人都一樣咁愛呀！鍾意食嘢嘅人，多數都鍾意埋整，因為可以邊整邊偷食丫嘛！在製作兩款cupcake過程中，晴晴最鍾意係搓出動物公仔，就好似玩泥膠咁呀！而我就鍾意在cupcake上擠花，好有滿足感！同小朋友一齊用心製作，共享親子時光，好享受亦好開心！Baby Kingdom經常都會舉辦呢啲親子班，要密切留意住佢哋幾時再有新班先得喇！ Baby Kingdom: http://www.baby-kingdom.com Twinkle Baker Decor: http://hk.twinkle-bd.com