2016.03.25 我地隻象仔係2016年3月25日剛好40週呢一日準時報到! 我零晨3點半，有便意，上廁所，但未有得去，返床再瞓，廿分鐘後，感覺又到，終於知道咩叫<陣痛>，叫醒潮爸開始計時，廿分鐘一次，十五分鐘一次，到十分鐘一次… 挨到清晨5點半就call uber拎埋走佬袋入院，出門口前whatsapp通知陳醫生, user嚟架Tesla，又唔塞車，所以唔駛廿分鐘就由太子到跑馬地。 一到步眼見大堂無長長嘅人龍等，門口個哥哥仔仲幫我地㩒lift，心裡暗爽! 之前一直擔心塞車，塞人，都一一避過，呢個bb真係錫我地! 上到27樓，姑娘問我有無打電話嚟，我話無，咁佢就帶我入佢房攪入院手續，簽名，簽名同簽名! 中途有兩個媽媽都一齊入院，攪到啲姑娘都手忙腳亂! 到6點半左右我就入咗自己個半私家病房，姑娘幫我插喉，量血壓體溫，駁機聽象仔心跳，攪攪下都7點幾，因為象仔未出嚟，生仔套餐未有得用，咁老公就落去買早餐上嚟食。 到8點半左右陳醫生到，話我開得兩度，問我打唔打催生針，我話唔駛啦，仲咁早，等吓先，咁佢就話晏少少再嚟睇我。 因為我一早選擇了無痛分娩，要到3度先可以打，所以12點幾老公又落去買午餐! 挨到差不多1點，姑娘入嚟check話夠3度啦，可以打epidural，你換衫我地call麻醉師，再同你入產房。 痛咗10個鐘，麻醉師終於係1點45分幫我打咗無痛分娩針。 打嘅時候要卷到個人好似隻熟咗嘅蝦咁，過程好快，打完嘅感覺就好似腳痺咁，無乜力。 得3度，係產房做乜好? 更係爭取時間瞓吓啦! 我同潮爸一齊瞓，到5點幾，陳醫生又上嚟，佢話開咗6度，我有啲發燒，所以要打摧生針啦! 又話今晚一定出嚟，叫我地去買飯食先(係，又食過!) 係產房睇住電視，係完全唔痛嘅情況下，我唔知仲要等幾耐，好彩到8點左右，姑娘話開哂喇，而陳醫生又咁啱出現，咁大家就各自各準備。 姑娘叫我聽佢指令，吸氣數十下再呼氣，每次宮縮做三組就可以休息一下，到下一輪宮縮又嚟過，經過四五輪吸氣，呼氣，終於見到象仔啲頭髮! 係大家嘅12345678910嘅鼓勵下，象仔最終係晚上8點53分出世! 重3.03kg, 身長51.5cm，無黃疸，好健康! 很感恩，從此325就係我人生最難忘的一天! 謝謝上天賜予我地一個可愛的象仔! 謝謝老公一直在身邊陪伴我幫我打氣! 謝謝象仔你選擇了我地做你嘅父母，我地會永遠愛你保護你支持你! 生產小插曲: 話說當時電視正在播放公公出宮，醫生努力為我接生時，姑娘A無端端面向電視叫姑娘B大聲啲，我地大家都以為佢叫另一位姑娘開大聲啲個電視機，點知原來係指我隔離聽住bb心跳嗰部機，大家都笑咗! 所以好慶幸我整個生產過程都咁輕鬆又有歡樂! 題外話，養和嘅設施、 保安系統真係一流! 首先BB腳仔有個感應器，如果同媽媽手上嘅扣配對得啱就會有音樂，所以唔會怕拎錯人地嘅BB架! 另外半私家房可以朝8晚8放BB係自己房，如果BB係BB房，親友可以拎個房牌去BB室外，姑娘就會推BB去個玻璃房俾佢地望吓BB。 三日兩夜嘅套餐，潮爸全程都係醫院陪住我，而房入面張櫈，夜晚就做咗佢嘅床喇(雖另加錢)，而呢個亦係我之前考慮係養和生嘅其中一個原因!哈哈!