又來囉～ 又係時候回味一下福岡既旅程！   例牌都係個句：  有著小B雖然可以到既景點唔多， 但當中既回憶卻值得令人回味！   今次要為大家介紹既係「博多運河城」！   博多運河城 其實係以「都市劇場」為概念， 係一座結合左Shopping Mall、展覽場地及辦公室於一身既大型商城！ 所以博多運河城可以話係九州其中一個著名既Shopping Mall之一。 運河城之內店鋪林立（據說有超過200間商店喔！），各式各樣既商店都有。 係一個購物既好去處。   博多運河城 地址：福岡市博多區住吉1-2 電話：092-282-2525  營業時間： 商店 11:00-21:00 餐廳 10:00-23:00(因個別店舖而定)   交通資訊：  －市區循環巴士「博多運河城前」下車即達  －地下鐵「中洲川端站」下車，步行約7分鐘  －西鐵巴士「博多運河城前」下車    運河城內設有退稅counter，方便旅客購物後退稅。 所以到步後記得去退稅counter拎返本小冊子睇下有咩店鋪有得退稅， 同埋有邊啲係免稅添！     Shopping部份唔多說了， 因為每個人的購物喜好都不同。 今次來到運河城既另一個原因，其實係因為 －「姆明Cafe」！   或者，你會問我：「點解香港都有，你來日本都要去呢？」 其實答案好簡單，因為小JM鍾意囉！ （當然，爸爸媽媽都鍾意啦！） 再者其實因為香港既姆明Cafe俾我既感覺一般， 所以想帶小JM去日本搵下「肥肥」。   去到只係等左十分鐘就已經有枱， 係等枱個陣小JM已經發現左「肥肥」既影蹤， 仲不停手指指、四圍指添。   終於有枱啦！ 一坐底我地幾個大人就忙住放低啲袋同準備小JM開餐用既野， 都未來得切望下周圍， 小JM就已經拍晒手，同自己拎餐牌。 原因好簡單，原來佢見到「肥肥」， 仲忍唔住錫左餐牌上面既肥肥一啖， 好彩咁岩舉機，所以影到呢一幕！   坐定定之後，大人就開始點餐， 而小JM呢？原來一直留意緊對面枱個隻「陪食肥肥」！ 係咁指住人地隻肥肥， 我地就只好話俾小JM知一陣哥哥姐姐會拎來， 唔駛心急，要食飯先！   係食飯中途，哥哥姐姐終於拎公仔過來啦， 不過就唔係姆明，而係「史力奇」！ 小JM係有啲疑問，可能心諗呢個係邊位，做咩坐埋來～ 諗住照樣叫小JM同史力奇影下相， 點知小JM只係不得回頭望史力奇同推開史力奇！ 仲要慘到扁晒咀咁， 所以我地都要安撫下小JM，話俾佢知一陣哥哥姐姐可以帶肥肥過來。 但最後其實哥哥只係安排到姆明媽媽咋， 小JM雖然都有啲抗拒， 但都願意同肥肥媽媽合照既。   講返間餐廳， 裝修同佈置滿滿都係姆明同朋友仔們， 小朋友一入到去就會覺得好開心。 無論係餐廳天花、裝飾、枱面、餐具同食物都充滿住肥肥， 我地可以好易就搵到肥肥既蹤影。   餐具同食物都擺得好靚好整齊。 而且飲品都一樣有肥肥係上面。。。   食飽仲可以去隔離既精品店睇下野添。 小JM都鍾意睇，但就只限於姆明一個，其他既都被小JM所嫌棄。   食飽之後，當然唔少得繼續購物啦！ 逛完一輪大家都有唔少既收獲。 臨走前我地仲欣賞左運河城既噴泉表演添！ 小JM都睇到拍晒手掌！     Lunch滿足左小JM， 咁夜晚呢，就係要滿足返我地啲大人啦， 今晚我地去左食 － 釣魚茶屋（天神店）！   餐廳真係好特別，特別在於設計成船一樣， 等你感覺好似置身於船上去享受晚餐， 而且仲可以釣魚添架！ 釣魚部份都分為兩種：  1.）船釣 2.）養殖池釣   其實價錢係一樣，只係船釣需要購買魚餌， 魚餌約100日元， 如果唔好彩俾魚魚食左魚餌又未釣到， 咁就可能要買過魚餌架啦！   爸爸同契媽媽就揀左去養殖池釣， 因為佢地怕要釣好耐先有得食喎！哈哈！   結果呢，佢地兩個不出十五分鐘已經釣左一條鯛魚，兩隻龍啦！ 成績都算唔錯呀！   服務生哥哥好Nice，好好人， 見到我地有小B會主動幫我地拎櫈仔俾小JM， 可惜小JM無時停，只係坐得一陣仔。   因為想俾啲熟魚小JM食既關係， 我地將原本全刺身既鯛魚分左幾Part來整。 服務生哥哥好快手幫我地落單寫左一部份係燒，一部份係刺身， 而剩底既魚頭仲可以拎去用醬汁煮添，真係好野味！ 龍蝦呢，我地就整左刺身， 食完刺身服務生哥哥仲幫我地幾個龍蝦頭拎左去煮湯添！   我地額外加左兩個小食，一個係炸魷魚，另一個就係芥辣魷魚。 但就似乎芥辣魷魚比較一般， 爸爸同契媽媽都話似擦子膠！ 你睇，係咪好豐富呢？ 食完呢餐真係好滿足！ 食飽行多陣就返左酒店準備休息， 期待聽日一早去「由布院」嘆溫泉，食好西！       ♫ ESDlife靚太Club 。 星級榮譽會員 ★sleepyceci  ♬ ♩BK Milk。親子語。駐站Blogger  ★傑。斯與晴  ♪ ♫ Mami Buy香港媽咪幫。駐站Blogger ★傑。斯與晴  ♬ ♩Ohpama。Oh爸媽。駐站Blogger  ★傑。斯與晴  ♪   歡迎追蹤 小JM 既Fanspage 「傑。斯與晴」：   如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯   與   晴 （Jolie Babe。小JM の 成長印記）