大家仲記唔記得細過去既公園條點呢？今日既公園設施，差不多九成九已經係塑膠做架啦，莎拉細過玩既公園設施全部都係鐵做既，今時今日少之又少了，不過咁又唔代表已經絕跡既，莎拉就發現大埔近宏福苑附近仲保存了一啲鐡皮滑梯，於是就帶埋陶寶B去找尋莎拉既兒時記憶了. 陶寶B一見到條滑梯就衝埋去.  講真同今時今日既滑梯真係大不同，因為樓梯斜度大好多加上又高，對小朋友嚟講真係挑戰！莎拉都唔客氣自己上埋去玩一次，尋找兒時回憶！但點知瀡落去時一啲都唔跣既，唔通我記錯，我明明記得細過玩時係好跣架！ 除了呢條漩轉鐡皮滑梯，另一邊仲有個懷舊爬架，呢種玩意真係好少見了！ 如果小朋友怕高又可以玩另一條短啲既鐵皮滑梯！ 呢一款舊款搖馬莎拉都好似好少玩, 不過因為係鐵所以好似唔係好搖到! 另一邊有一個現代搖搖板, 呢個就真係好好玩, 不過莎拉咁重, 玩既時候要就一就, 如果唔你就彈唔起陶寶B啦. 玩完之後，莎拉仲同陶寶B分享自己童年鐘意玩咩遊戲，一路行一路傾不知幾開心, 大家不防同小朋友分享吓自己兒時玩意啦!